Hayahay an kinabuhi nira Madián ngan Marcela nga taga-Medellín, Colombia. Daku an sweldo ni Madián amo nga nakaukoy hira ha maopay nga apartment. Pero may panhitabo nga nakaaghat ha ira nga usisahon utro an ira mga prayoridad, sugad nga mga alagad ni Jehova nga Dios. “Han 2006 tinambong kami ha espesyal nga asembleya nga ‘Tipigi nga Simple an Imo Mata.’ Ginpabug-atan han damu nga pahayag an pagpasimple ha aton kinabuhi basi mas makag-alagad ha Dios hin bug-os,” siring nira. “Kahuman han asembleya, nakapamurubuot kami nga kabaliktaran an amon ginbubuhat. Patigda-tigda kami ha pagpalit ngan daku an amon utang.”

 Gintikangan dayon nira Madián ngan Marcela nga pasimplihon an ira kinabuhi. “Waray na kami magginasto hin daku,” siring nira. “Binalhin kami ha mas gutiay nga apartment, ginbaligya an amon awto, ngan nagpalit hin motorsiklo.” Waray na liwat hira kumadto ha mga mall basi diri hira maengganyo nga magpinamalit. Mas daku na nga panahon an ira gin-gamit ha pakiistorya ha iba mahitungod ha Biblia. Nakig-upod liwat hira ha ira kasangkayan nga mga espesyal payunir a nga madasigon nga mga alagad ni Jehova.

 Waray pag-iha, nagdesisyon hira Madián ngan Marcela nga pauswagon an ira pag-alagad pinaagi ha pagbalhin ha gutiay nga kongregasyon ha usa nga baryo nga nanginginahanglan hin bulig. Basi mahimo ito, nag-resign hi Madián ha trabaho. Pero diri ito masabtan han iya superbisor. Salit ginpakianhan hiya ni Madián: “Daku an imo kità, pero malipayon ka ba?” Gin-amin niya nga diri, kay damu an iya problema nga diri niya masulbad. Katapos nagsiring hi Madián ha iya: “Amo nga an importante ngay-an diri an kadaku han imo kità, kondi kon ano gud an nakakapalipay ha imo. An pagtutdo ha iba mahitungod ha Dios an nakakapalipay ha amon nga mag-asawa, ngan karuyag namon nga magin mas malipayon pa gud pinaagi ha paggamit hin mas daku nga panahon hini nga buruhaton.”

 Kontento gud ngan malipayon hira Madián ngan Marcela kay prayoridad nira an pag-alagad ha Dios. Ha naglabay nga 13 ka tuig, nag-alagad hira ha mga kongregasyon nga may daku nga panginahanglan ha norte-weste han Colombia. Ngan yana, nag-aalagad hira sugad nga mga espesyal payunir.