Jises ya mala alamb bol ding mal ma, nalerim olom komna mine epen enjol mom, akling ya mala mam kum. (Jon 8:23) Got komna wei wal ende ere nasem kunum, ngangem yero ersem, ala ngangem ermol dam pakeronge enjel wal porpor enjil. Jova olom olom ermolo Jises ersem, embe pile Baibel Got ngalem “dingri wei” padom. (Jon 1:14) Jises dam yu kep ye pile, dam olom “Yu’’ panim.​—Provep 8:22, 23, 30; Kolosi 1:15, 16 gerdel.

Jises komna mine epen dam kin mom, ba akling Jova olom kolmem si ya mala Juda amb ende ye bol napam kumbola kelnge kangilnom, amb kangem Maria. Embe pile Jises ya mala dam ende namom. (Luk 1:30-35) Jises ya mala wom wo (1) Got yu wei nengonal newom, (2) kenem ombun duwom kawo Got konganem pra ermoramen mal taninal newom, (3) Olom golo kenem “topro siyem” ninal newom.​—Matyu 20:28 gerdel.

Topro siyem kesim panim e, alamb ende ermolo ende pakero kelnde nagora. (Kisim Bek 21:29, 30) Kenem tuwa se golmolo enamen ne Got ernasem. Embe paiyem kenem nalmal pilkane esmen? Komna Got Adam ersem se embe nim, nim “sin” erin dal, gorol panim. Embe pam pile Adam sin na enange, olom na gorange. (Stat 2:16, 17; 5:5) Baibel dom ne, Adam alla erim bar gonjip mambnem mala “mine” wom padom. Adam sin erim bar kenem kopam man porpor gosmon. Alamb ende golo kenem topro siyem kera ambsik wei pam nalerim, Adam gonjip mem kenem ngom.​—Rom 5:12; 6:23 gerdel.

 Kenem gosmon mem namal topro siyem ninda pam? Kenem gosmon e, sin enjin bar topom simen. Kenem poro sin paim pile, mala alamb ende golo kenem topro siyem ninda kaple naenem.​—Song 49:7-9 gerdel.

Jises ye dulto wei, kenem sin paim mal ma. Olom sin ende wei naerim pile, olom gora bar mem ka napam. Ba Jises, kenem sin pilgom. Got wal jelmal wei ende erim e, kenem kankawei wei kane, ngangem kelnge wo kenem sin pilgom. Wal ende, Jises kenem kanka kane, Dam yu nim karkar ere kenem sin pile golo topro siyem nim.​—Jon 3:16; Rom 5:18, 19 gerdel.

Jises ya mala mom kunum, alamb kes tom si kolnga kele, gonjip si akle ala ombun kerma kau monjip pakerom. Olom wal mand erim e, alamb yu karkar esim ga bol, wal akling enda mal tanim. (Matyu 15:30, 31; Jon 5:28) Jises golnge, Got si akile kipka nganj ngom. (1 Pita 3:18) Jises pu Got angel weiro kui mol punge, Jova olom kongan omblum bol ngo, king molo mal porpor tawol endil panim. (Hibru 10:12, 13) Yipe Jises mine epen King meim, alamb olom karkar esim ga, yu kawei nesi mal yemyem porpor pum.​—Daniel 7:13, 14; Matyu 24:14 gerdel.

Jises King omblom dongal konganem ere, ombun porpor paim topor ne, alamb erkerambe ombun duwom mine wonom alamb, pra topor ninda kunum mand wei enim. Alamb porpor Jises bol pilgi ne olom karkar er meim ga, ya mala paradise senda bar kawei wei moram.​—Song 37:9-11 gerdel.