ʼE Fakapapau e Te ʼAtua ʼe Tuʼu Anai Totatou Kele ʼo Talu Ai
“Ko te kele ʼe tuʼu maʼu pe anai ia.”
Koʼena he ʼu palalau neʼe fai e he kutuga faifekumi ʼo te malamanei ʼo ʼuhiga mo te fetogi ʼo te agaaga ʼo te kele. Kapau ʼe kotou tui ʼe ʼi ai he tahi neʼe ina fakatupu te kele pea mo tokaga lelei ki te tagata pea ʼe kotou ʼio anai ki te talamanatu ʼa te kutuga faifekumi ʼaia. Neʼe fakatupu e te ʼAtua ia te kele ke ina fai he ʼu gaue kehekehe moʼona fakamaʼa tokotahi.
ʼE kua lahi te ʼu maumau ʼe hoko ʼi te kele ʼuhi ko te tagata. Koia, ʼe mole gata pe anai ki te ʼu gaue ʼo te natula ka tokoni ki te tuʼu ʼo totatou kele ʼo talu ai. He koʼe ʼe tou tui papau ʼe fai anai e te ʼAtua he puleʼaki ki te faʼahi ʼaia?
Kotou vakaʼi te ʼu vaega Tohi-Tapu ʼae ʼe hoa mai he ʼe tou maʼu he fakalotofimalie ko te kele ʼe tuʼu anai ʼo talu ai pea ʼe maʼuli lelei anai.
Neʼe fakatupu totatou kele e te ʼAtua. “ ʼI te kamataʼaga, neʼe fakatupu e te ʼAtua te lagi pea mo te kele.”—Senesi 1:1.
Ko totatou kele ʼe ʼa Sehova. “ ʼE ʼa Sehova a te kele pea mo meʼa fuli ʼe maʼu ai.”—Pesalemo 24:1.
Neʼe fakatupu e te ʼAtua te kele ke tuʼu ʼo talu ai. “Neʼe ina fakatuʼu te kele ki ʼona fakatafito. ʼE mole feala anai ke toʼo kehe mai ai.”—Pesalemo 104:5.
ʼE fakapapau mai e te ʼAtua ʼe tou maʼuli fiafia anai ʼi te kele ʼo talu ai. “Te ʼAtua moʼoni, Ia Ia ʼae neʼe ina faʼu te kele, . . . Ia ia ʼae neʼe mole ina fakatupu noa, kae neʼe ina faʼu ke nofoʼi.”—Esaia 45:18.
ʼE fakapapau mai e te ʼAtua ʼe tou maʼuʼuli anai ʼo heʼe gata ʼi te kele. “ ʼE maʼu anai e te kau faitotonu te kele pea ʼe natou maʼuʼuli ai anai ʼo heʼe gata.”—Pesalemo 37:29.
Neʼe fakatupu e te ʼAtua te kele ke maʼuli fiafia ai te tagata kae ke mole hoko he tuʼutamaki ki ai. Neʼe fakakikite ʼi te Tohi-Tapu ʼe fakagata anai e Sehova ʼAtua ia te maumauʼi mo te ʼulihi ʼo totatou kele, ʼi tona temi totonu.—Fakaha 11:18.
ʼE fakapapau mai ʼi te Tohi-Tapu ʼe fakaliliu anai e te ʼAtua totatou kele ko he palatiso ʼe maʼa mo matalelei, pea ʼe ina ‘fakahoko anai te fakaʼamu ʼo te ʼu meʼa maʼuli fuli.’—Pesalemo 145:16.
a Ko Sehova ʼe ko te huafa ʼaia ʼo te ʼAtua.—Pesalemo 83:18.