ʼE Mahino Koa Ia Te ʼAtua Kia Koe?
TE AKO MAI TE FAKATUPU
Fakakaukauʼi age muʼa te faʼahiga felogoi ʼae ʼe makehe age, ʼae ʼa he ʼu mahagā. ʼE tala fenei e te mahagā ko Nancy Segal, ʼe pule ʼi te fale faifekumi ʼo ʼuhiga mo te ʼu mahagā: “ ʼE mole feala ke femahinohalaʼaki he ʼu mahagā.” Pea neʼe ui fenei e te tahi fafine ʼo ʼuhiga mo ʼana felogoi mo tona mahagā: “ ʼE au iloʼi ia meʼa fuli ʼo ʼuhiga mo ia pea ʼe toe feia pe mo ia, ʼe mahino katoa pe kia au.”
Kotea ʼape ʼae ʼe tupu ai te faʼahiga felogoi lelei ʼaia? Neʼe fai te ʼu fekumi pea neʼe maʼu ai ʼe mole fakalogo pe ki te faʼahiga taupau ʼo te ʼu mahagā. Kae ʼe tupu tafito mai te tatau ʼo tonā faʼu.
FAKAKAUKAUʼI AGE MUʼA: ʼE iloʼi e te Tupuʼaga te faʼahiga faʼu fakaofoofo ʼo te takitokotahi. Koia ʼae neʼe tala fenei ai e te tagata faipesalemo ko Tavite: ‘Neʼe ke “fau au i te fatu o taku fae. Nee mole pe ugia he koga o toku sino ia koe, i te temi ae nee ke fau ai au i he kogamea fakapulipuli. . . . I te temi ae nee kei au nofo ai ko he mea noa, nee sio ou mata kia au. Pea i tau tohi nee tohi fuli ai.” ’ (Pesalemo 139:13, 15, 16) ʼE ko te ʼAtua pe ʼae ʼe ina iloʼi katoa totatou faʼahiga faʼufaʼu pea mo totatou ʼuluagaaga. Koia, ʼe tou tui papau ai ʼe mahino lelei kia aluʼaga fuli ʼo totatou maʼuli.
TE SIO POTO ʼA TE ʼATUA ʼI TE TOHI-TAPU
Neʼe faikole fenei ia Tavite: “Sehova! Neʼe ke sivisivi au pea ’e ke iloʼi au. ’E ke iloʼi te temi ʼae ’e au heka ai, pea mo te temi ʼae ’e au tu’u ai. Neʼe ke tokagaʼi ʼaku manatu, mai mama’o. Koteʼuhi ’e mole heʼeki lea toku ʼalelo ki he meʼa, kae koʼeni ia, ʼoi Sehova, kua ke iloʼi katoa pe.” (Pesalemo 139:1, 2, 4, MN) Koia, ʼe iloʼi e Sehova te ʼu loto pea “e ina ulufi te u fakatuutuu fuli mo te u manatu fuli.” (1 Koloniko 28:9; 1 Samuele 16:6, 7) Kotea te ʼu ako ʼe tou maʼu ai ʼo ʼuhiga mo te ʼAtua?
ʼE lagi mole tou fakaha fuli ʼatatou manatu mo te ʼu meʼa ʼae ʼe tou logoʼi ʼi ʼotatou loto, ʼi te faikole. Kae ʼe iloʼi e te Tupuʼaga pe kotea ʼae ʼe tou fai pea kotea tona tupuʼaga. Pea ʼe ina toe tokagaʼi mo te ʼu gaue lelei fuli ʼe tou fia fakahoko, logo la pe ʼe mole tou kakusia ʼuhi ko ʼotatou tuʼakoi. ʼE ko Sehova ʼae neʼe ina tuku ki ʼotatou loto te fealagia ʼofa, koia ʼae ʼe ina fia iloʼi ai mo fia mahino ki ʼatatou manatu.—1 Soane 4:7-10.
ʼE sio ia te ʼAtua kia meʼa fuli. ʼE ina toe tokagaʼi mo ʼotatou mamahi ʼae ʼe mole sio peʼe mahino katoa ki ai ia te hahaʼi
ʼE fakalotomalohiʼi tatou ʼi te Tohi-Tapu
-
“ ʼE sio te ʼu mata ʼo Sehova ki te kau faitotonu pea ʼe fagono ʼona taliga ki ʼanatou kolekole.”—1 PETELO 3:12.
-
ʼE fakapapau fenei mai ia te ʼAtua: “E au ako anai kia koe pea e au fakaha anai kia koe te ala ae e tonu ke ke muli ai. E au tokoni anai kia koe, pea e au tuku tuumau anai oku mata kia koe.”—PESALEMO 32:8.
ʼE MANAVAʼOFA LAHI IA TE ʼATUA
ʼE tokoni feafeaʼi mai tatatou iloʼi ʼae ʼe mahino ia te ʼAtua ki totatou maʼuli pea mo meʼa fuli ʼe tou logoʼi, ke tou haga tauʼi ai te ʼu faigataʼaʼia? Tou vakaʼi te aluʼaga neʼe hoko kia Anna, ʼi Nigéria. ʼE ina fakamatala fenei: “Neʼe au fakaʼofaʼofa ʼaupito pea neʼe au ui neʼe mole kei he ʼuhiga ʼo toku maʼuli. Neʼe kua mate toku ʼohoana, pea neʼe au tokaga tokotahi ki taku kiʼi taʼahine ʼae ʼe kau ʼi te mahaki ʼo te hydrocéphalie (ko te lahi fau ʼo te vai ʼi te ʼuto). Neʼe au toe mahamahaki foki mo au he neʼe au kau ʼi te kosea. Neʼe tonu ke tafa au mo fai te ʼu faitoʼo ʼae ko te chimiothérapie mo te radiothérapie. Neʼe faigataʼa ʼosi tamā faimahaki mo siʼaku kiʼi taʼahine ʼi te lopitali.”
Kotea ʼae neʼe tokoni kia Anna? ʼE ina ui fenei: “Neʼe au metitasio ki te ʼu vaega ohage ko Filipe 4:6, 7 ʼae ʼe tohi ai: ‘Ko te tokalelei ʼo te ʼAtua ʼae ʼe maʼoluga age ʼi te ʼu ʼatamai fuli, ʼe ina taupau anai ʼokotou loto pea mo ʼokotou fealagia fakakaukau.’ Ka au manatuʼi te vaega ʼaia, ʼe au logoʼi ai ʼe au ovi kia Sehova pea ʼe ina iloʼi lelei ia au. Neʼe toe fakalotomalohiʼi au e ʼoku tehina mo tuagaʼane ʼo te kokelekasio Fakakilisitiano.”
“Logo la ʼe kei au mahaki pe, kae kua siasiaʼa leva toku maʼuli mo taku kiʼi taʼahine. ʼE mā iloʼi ʼe nofo ia Sehova mo maua, koia ʼae ʼe mole kei mā lotovaivai gafua ai moka hoko mai he ʼu ʼahiʼahi. ʼE mā maʼu he lotofimalie ʼi te ʼu palalau ʼae ia Sakopo 5:11: ‘ ʼE tou tala ʼe fiafia ia natou ʼae neʼe faʼa kataki. Neʼe kotou logo ki te faʼa kataki ʼa Sopo pea, ʼuhi ko te meʼa ʼae neʼe fai e Sehova maʼa ia, neʼe kotou iloʼi ai ko Sehova ʼe ʼofa mamahi pea mo manavaʼofa.’ ” Neʼe mahino katoa ia Sehova ki te ʼu aluʼaga fuli ʼae neʼe tau mo Sopo. Koia, ʼe tou tui pau ʼe ina toe iloʼi pe te ʼu fihifihia fuli ʼae ʼe tau mo tatou.