Luka 6:1-49
-
Ko Sesu, “te ʼAliki ʼo Te Sapato” (1-5)
-
Te fakamalolo ʼo te tagata ʼe nima mate (6-11)
-
Te kau apositolo ʼe toko 12 (12-16)
-
ʼE faiakonaki ia Sesu pea mo ina fakamalolo te kau mahahaki (17-19)
-
Natou ʼae ʼe manuʼia pea mo natou ʼae ʼe malaʼia (20-26)
-
Te ʼofa ki te ʼu fili (27-36)
-
Tuku takotou fakamau (37-42)
-
ʼE iloʼi he fuʼu ʼakau ʼi tona fua (43-45)
-
Te ʼapi neʼe lelei tona laga, pea mo te ʼapi neʼe mole malohi tona fakatafito (46-49)
6 ʼI te tahi sapato, neʼe fakalaka ʼi te ʼu gaueʼaga fulumeto pea neʼe fusi e ʼana tisipulo te fulumeto, ʼo milihi ʼaki ʼonatou nima pea mo natou kai.
2 Pea neʼe ui fenei e ʼihi ʼi te kau Faliseo: “He koʼe ʼe kotou fai ia te meʼa ʼae ʼe mole gafua ke fai ʼi te ʼaho ʼo te Sapato?”
3 Kaʼe neʼe tali fenei age e Sesu kia natou: “Neʼe mole kotou lau koa la te meʼa ʼae neʼe fai e Tavite ʼi te temi ʼae neʼe fia kai ai ia ia mo ʼona kaumeʼa?
4 Neʼe hu ki te fale ʼo te ʼAtua pea ina maʼu te ʼu pane ʼae neʼe molagaʼi. Neʼe ina kai pea mo foaki age ʼihi pane ki ʼona kaumeʼa, kaʼe neʼe mole gafua ʼi te Lao ki he tahi ke ina kai, gata pe ki te kau pelepitelo.”
5 Neʼe ina hoko atu fenei: “Ko te Foha ʼo te tagata ʼe ko te ʼAliki ʼo Te Sapato.”
6 ʼI te tahi age sapato, neʼe hu ki te sinakoka pea kamata faiakonaki. Pea neʼe ʼi ai te tagata neʼe mate tona nima mataʼu.
7 Pea neʼe lamalama e te kau sekelipa pea mo te kau Faliseo ia Sesu pe ʼe ina fai anai he fakamalolo ʼi te Sapato, ke natou maʼu ai he faʼahi moʼona fakalakahalaʼi.
8 Kaʼe neʼe ina iloʼi ʼanatou manatu, koia neʼe ina ui fenei age ki te tagata nima mate: “Tuʼu ake pea ke haʼu ki lotomalie.” Neʼe tuʼu ake ai ʼo haʼu ki lotomalie.
9 Pea neʼe ui fenei age e Sesu kia natou: “ ʼE au fehuʼi atu: ʼE gafua koa ʼi te Lao ke fai he meʼa ʼe lelei peʼe kovi ʼi te Sapato, ke haofaki ai he maʼuli,* peʼe ke matehi?”
10 ʼI te hili ʼo tana sio kia natou fuli, neʼe ina ui fenei age leva ki te tagata: “Faoʼi tou nima.” Neʼe ina faoʼi tona nima pea neʼe lelei ai.
11 Kaʼe neʼe kovi ʼosi tonatou iita, ʼo natou kamata feuiʼaki pe kotea ʼae ka natou fai anai kia Sesu.
12 ʼI te ’u ʼaho ʼaia, neʼe hake ai ki te moʼuga ʼo faikole, pea neʼe faikole ai ki te ʼAtua ʼi te po katoa.
13 Pea ʼi te ʼaho ake, neʼe ina pauʼi ʼana tisipulo kia te ia pea mo filifili ia natou he toko 12, ʼae neʼe ina toe fakahigoaʼi ko te kau apositolo:
14 ko Simone, ʼae neʼe toe fakahigoaʼi ko Petelo, mo Atelea tona tehina, mo Sakopo, mo Soane, mo Filipo, mo Paletolomeo,
15 mo Mateo, mo Tomasi, mo Sakopo te foha ʼo Alefeo, mo Simone ʼae ʼe toe higoa ko “te tagata faʼafai,”
16 mo Sutasi te foha ʼo Sakopo, pea mo Sutasi Isekaliote, ʼae ka ina lavakiʼi ia ia.
17 Neʼe haʼu leva mo natou ki he koga meʼa laulelei, pea neʼe kaugā malie ai ʼana tisipulo, mo te hahaʼi mai Sutea katoa pea mo Selusalemi pea mai te ʼu koga fenua ʼo Tile mo Sitoni, neʼe natou ʼomai ke natou fakalogo kia te ia pea ke ina fakamalolo natou mai ʼonatou mahaki.
18 Neʼe toe fakamalolo mo natou ʼae neʼe fakamamahiʼi e te ʼu laumalie kovi.
19 Pea neʼe faigaʼi e te hahaʼi fuli ke natou fa kia te ia, koteʼuhi neʼe haʼu mai ia te ia he malohi pea neʼe natou malolo fuli ai.
20 Pea neʼe sio ki ʼana tisipulo mo ina ui fenei age:
“Manuʼia ia koutou ʼae ʼe masisiva, he ʼe ʼa koutou te Puleʼaga ʼo te ʼAtua.
21 “Manuʼia ia koutou ʼae ʼe fia kakai ʼi te temi nei, he ʼe kotou makokona anai.
“Manuʼia ia koutou ʼae ʼe fetagihi ʼi te temi nei, he ʼe kotou kakata anai.
22 “Manuʼia ia koutou ʼae ʼe fehiʼaʼinaʼi, peʼe kapu koutou, peʼe laukoviʼi koutou, peʼe fakalainoaʼi ʼokotou higoa ʼuhi ko te Foha ʼo te tagata.
23 Kotou fakafiafia ʼi te ʼaho ʼaia pea mo kotou mahiki fakafiafia, he ʼe lahi tokotou fakapale ʼi selo, koteʼuhi ko te ʼu meʼa pe ʼaia neʼe fai e ʼanatou kui ki te kau polofeta.
24 “Kaʼe malaʼia kia koutou ʼae ʼe maʼu koloa, he ʼe kua kotou maʼu tokotou fakafimalie katoa.
25 “Malaʼia kia koutou ʼae ʼe makokona ʼi te temi nei, he ʼe kotou pakupaku anai.
“Malaʼia kia koutou ʼae ʼe kakata ʼi te temi nei, he ʼe kotou putu mo fetagihi anai.
26 “Malaʼia moka palalau lelei te ʼu tagata fuli ʼo ʼuhiga mo koutou, koteʼuhi ko te meʼa pe ʼaia neʼe fai e ʼanatou kui ki te kau polofeta loi.
27 “Kaʼe ʼe au tala atu kia koutou ʼae ʼe fakalogo mai: Kotou haga ʼoʼofa ki ʼokotou fili, mo fai ia te meʼa ʼae ʼe lelei kia natou ʼae ʼe fehihiʼa ia koutou,
28 mo tapuakiʼi ia natou ʼae ʼe natou fakamalaʼia koutou, mo hufakiʼi ia natou ʼae ʼe natou leakoviʼi koutou.
29 Ko ʼae ʼe ina pāki hou kauʼahe, fakahaga age mo ʼae, pea ko ʼae ʼe ina toʼo tou pulupulu, ʼaua naʼa ke fakafisi age mo tou kofu loto.
30 Foaki kia ia ʼae ʼe ina kole atu, pea ko ʼae ʼe ina toʼo ʼau meʼa, ʼaua naʼa ke kole age ke ina toe liufaki atu.
31 “Tahi ʼae, ko te meʼa ʼae ʼe kotou loto ke fai atu e te hahaʼi, kotou fai feia maʼa natou.
32 “Kapau ʼe kotou ʼoʼofa pe kia natou ʼae ʼe ʼoʼofa kia koutou, kotea ia te lelei ʼae ʼe kotou fai? He ʼe toe ʼoʼofa pe mo te kau agahala kia natou ʼae ʼe ʼoʼofa age.
33 Pea kapau ʼe kotou agalelei pe kia natou ʼae ʼe agalelei atu, kotea ia te lelei ʼae ʼe kotou fai? He ʼe toe fai feia pe mo te kau agahala.
34 Pea tahi ʼae, kapau ʼe kotou foaki* kia natou ʼae ʼe kotou ʼamanaki ʼe natou toe liufaki atu anai, kotea ia te lelei ʼae ʼe kotou fai? He ʼe toe fai feia pe mo te kau agahala, ʼe natou foaki ki te kau agahala ke toe liufaki age.
35 Kaʼe ke kotou haga ʼoʼofa ki ʼokotou fili, mo fai te meʼa ʼae ʼe lelei, mo foaki ʼo mole kotou ʼamanaki ʼe liufaki atu anai. ʼE lahi anai tokotou fakapale, pea ʼe kotou liliu anai ko he ʼu foha ʼo te Maʼoluga, koteʼuhi ʼe agalelei kia natou ʼae ʼe maʼuli galo pea mo agakovi.
36 Kotou haga manavaʼofa, ohage pe ko takotou Tamai ʼe manavaʼofa.
37 “Tahi ʼae, tuku takotou fakamau, pea ʼe mole fakamauʼi anai koutou, tuku takotou fakatuʼā, pea ʼe mole fakatuʼā anai koutou. Kotou fakamolemole, pea ʼe fakamolemole atu anai.
38 Kotou haga foaki, pea ʼe foaki atu anai e te hahaʼi kia koutou. ʼE natou huaʼi anai ki ʼakotou taga* he fua ʼe lahi, ʼe lulu anai, mo lomi pea ʼe fonu gutugutu anai. He ʼe fakafuafua anai koutou ʼo mulimuli ki takotou faʼahiga fakafuafua.”
39 Neʼe ina fai age te lea fakatata ʼaeni: “ ʼE mole feala ki he kivi ke ina taki he tahi age kivi. He ʼe nā fetoki anai ki he luo.
40 ʼE mole maʼoluga age he tahi ʼe ako* ʼi hana faiako, kaʼe ko ʼae ʼe lelei tona akoʼi ʼe liliu anai ohage ko tana faiako.
41 He koʼe ʼe ke tokagaʼi koe te moʼi eveʼi ʼakau ʼae ʼi te mata ʼo tou tehina, kaʼe ʼe mole ke tokagaʼi koe te lalago ʼae ʼi tou mata?
42 ʼE feafeaʼi hau lava ui ki tou tehina: ‘Tehina, tuku ke au toʼo te moʼi eveʼi ʼakau ʼae ʼi tou mata,’ kaʼe ʼe mole ke tokagaʼi te lalago ʼae ʼi tou mata? Tagata malualoi! Toʼo muʼa ia te lalago ʼae ʼi tou mata, ke feala hau sio lelei pea hoki ke toʼo leva te moʼi eveʼi ʼakau ʼae ʼi te mata ʼo tou tehina.
43 “He ʼe mole fua kovi he fuʼu ʼakau ʼe maʼuli lelei, pea ʼe mole fua lelei he fuʼu ʼakau ʼe maʼuli kovi.
44 He ʼe tahi iloʼi pe te fuʼu ʼakau ʼi tona fua. Ohage la, ʼe mole toli e te hahaʼi he ʼu fuaʼi fiku ʼi he vao talatala, peʼe ko he ʼu fuaʼi vite ʼi he ʼakau talatala.
45 Ko te tagata ʼae ʼe agalelei ʼe ina toʼo mai tona koloa ʼae ʼe lelei ʼi tona loto ia te ʼu meʼa ʼae ʼe lelei. Kaʼe ko te tagata ʼae ʼe agakovi ʼe ina toʼo mai tona koloa ʼae ʼe kovi te ʼu meʼa ʼae ʼe kovi. He ʼe haʼu mai tona gutu te meʼa ʼae ʼe fonu ʼi tona loto.
46 “He koʼe ʼe kotou fakahigoaʼi au ‘ ʼAliki!’ kaʼe ʼe mole kotou fai te ʼu meʼa ʼae ʼe au ui atu?
47 Ko ʼae ʼe haʼu kia te au mo logo ki ʼaku folafola pea mo ina maʼuliʼi, ʼe au fakaha atu pe ʼe ko te faʼahiga tagata feafeaʼi:
48 ʼE hage ko he tagata neʼe ina laga he ʼapi, ʼo ina keli loloto ʼo fakatafito ki te maka. Neʼe hoko mai leva he puvai, ʼo pa te vai ki te ʼapi kaʼe neʼe mole feʼauga tona malohi moʼo fakagaūgaūe, koteʼuhi neʼe lelei tona laga.
49 Kaʼe ko ʼae ʼe logo pea ʼe mole ina maʼuliʼi, ʼe hage ko he tagata neʼe ina laga he ʼapi ʼi te fuga kele kaʼe mole hona fakatafito. Neʼe pa mai te vai ki ai, ʼo holo atu aipe pea mo lahi tona maumau.”
Nota ’i te lalo pasina
^ ʼI te Fakakeleka, psukhê. Vakaʼi Te ʼu Kupu Mo ʼOna Fakaʼuhiga.
^ Ko tona fakaʼuhiga, ʼe mole hona tupu.
^ ʼI te temi muʼa, neʼe peluki e te hahaʼi ʼonatou kofu moʼo fai ʼaki he taga ʼe tafa ki muʼa. Pea neʼe natou fakaʼaogaʼi te taga ʼaia moʼo fafaʼo meʼa.
^ Peʼe “he tisipulo.”