1 Timotiu 6:1-21
6 Iwadaꞌuri zarina si, pawaꞌâbâ ãna dama romhuriꞌwa norĩ hã te za tiꞌmadâꞌâꞌwa hã isimiroti na te te ꞌre wazéb zaꞌra. Ãne ꞌre hâimana zaꞌra mono õ wamhã, ãté te za ꞌRe ihâimana uꞌâsi mono nhisi na da te ãma ꞌre wasété zaꞌra. Ãté waꞌãma zama te za duré da te ꞌre wasété zaꞌra, isazeiꞌwa norĩ ma, wa te ꞌre roti wasété zaꞌra mono newa.
2 Ãté pawaꞌâbâ ãna dama romhuriꞌwa norĩ ꞌmadâꞌâꞌwa hã te za isazeiꞌwa ꞌre ꞌmaimo. E tawamhã imreme hã te te ꞌre ꞌmadâꞌâ pese zaꞌra mono õ di za, isisãnawã ne tãma ꞌre ꞌmaihâimana mono nherẽ, iꞌmadâꞌâ ꞌwa hã. Mare di. Isimiroti na te za te te ꞌre wazéb zaꞌra. Isazeiꞌwa ꞌre ꞌmaimorĩ wa, duré tãma sawi pese zaꞌra wa, te za tiꞌmadâꞌâꞌwai ma, te te tãma ꞌre romhuri wẽ uptabi zaꞌra. Ãne na te aima ꞌre iroti mono zéb zarina, te za isazeiꞌwa norĩ ma ꞌre iꞌaroti pese mo, ãma ꞌre nomro wẽ mono da.
3 6:3-5 Ãté niꞌwam norĩ hã aimawi na te za isazeiꞌwa norĩ ma te te tãma ꞌre rowasuꞌu zaꞌra. Ãté Wanhibꞌapito Zezu Cristuhu nhimiroti na, ta norĩ hã te te ãma ꞌre saze zaꞌra mono õ di za, tô sena nherẽ, Wanhibꞌapito nhimiroti hã rowẽ na ãma ꞌre idanomro mono zéb da hã, duré dawẽ na si ãma ꞌre idanomro mono zéb da hã. Ãne wamhã, roti tô sena hã tãma waihuꞌu zaꞌra õ di za. Taré te za tinhimiroti wẽ na ꞌrâwi sina ꞌre wata zaꞌra. Ta norĩ ma, wẽ di, marĩ wasuꞌu na ꞌrâwi ãma ꞌre isisadaꞌâbâ zaꞌra mono da hã, duré ꞌrâwi timreme na ꞌre isiꞌwapé zaꞌra mono da hã. Taha zarina, te za tisiꞌruiwapari na te te sima ãma ꞌre waꞌrãmi zaꞌra, ãma ꞌre sisadaꞌâbâ zaꞌra mono da. Te za duré te te ꞌre dawasuꞌu wasété zaꞌra. Te za duré siꞌãma te te ꞌre rosaꞌrata wasété zaꞌra. Roti tô sena hã tãma waihuꞌu pese zaꞌra õ wa, roti tô sena zarina si te te ꞌre rosaꞌrata wẽ zaꞌra mono õ di za. Ta norĩ hã te te duré sima ꞌre rosaꞌrata siwamnarĩ zaꞌra, isazeiꞌwa norĩ hã robꞌuiprazé hã te te tãma ꞌre sõmri zaꞌra mono da, isimirowasuꞌu waꞌrãmi, sibro pese na ꞌre hâimana zaꞌra mono da.
4 ꞌMadâꞌâ 6:3
5 ꞌMadâꞌâ 6:3
6 ꞌRe ihâimana uꞌâsi mono nhimiroti ꞌmadâꞌâꞌwa, ꞌre wanomro mono wamhã, duré marĩ zô si wasima ꞌre wanhopré mono ãna ꞌre wanomro mono wamhã, wama ꞌre rowẽ uptabi zaꞌra mono di za.
7 E robꞌuiprazé ma tô wazababa ꞌre wairébé, wana dubꞌre hawi ꞌre wapoto zaꞌra mono wamhã. Mare di. Wahâiba si marĩ ãna wa tô ꞌre wapoto zaꞌra. Duré ꞌre wadâꞌâ zaꞌra mono wamhã, e wanhimarĩ hã wa za wasiré wa te ꞌre ꞌwasari. Mare di.
8 Tahawa, tiꞌab ré, wasai ré ꞌre wahâimana zaꞌra mono wamhã, duré waꞌuza ré ꞌre wahâimana zaꞌra mono wamhã, marĩ zô si wasima ꞌre wanhopré mono õ di za, marĩ na wa te wasima ãma ꞌre irowẽ zaꞌra mono zéb da hã.
9 Robꞌuiprazéb zô, da te dasima ꞌre rosaꞌrata siwamnarĩ uꞌâsi zaꞌra mono wamhã, ãté te za da te ꞌre wapari zaꞌra, robꞌuiprazém na waꞌuburé te te dama ꞌre iꞌaroti wasété mono zé hã. Ãne wamhã, ãté isimiroti hã da te ꞌre rẽme waihuꞌu zaꞌra mono õ di za tô oto. Ãté rosaꞌrata ãna te za isimiroti zarina, marĩ zô si oto da te ꞌre robꞌruiwapari zaꞌra, marĩ wasété zô zama. Ãne wamhã, te za oto dawi ꞌre robzeiꞌõ pese zaꞌra. Rowẽ uꞌâsi ꞌre idanomro mono zé hã duré oto dama ꞌre hâimana zaꞌra mono õ di za.
10 E marĩ wa. Robꞌuiprazém na si, da te dasima ꞌre rosaꞌrata zaꞌra mono wamhã, siwaꞌru te za marĩ hã iwasédé hã da te ꞌre ꞌmanharĩ zaꞌra. Niꞌwam norĩ hã roti wẽ hã aré te te ꞌre isaze zaꞌra mono zém hawi, ma tô ꞌre sipa zaꞌra, robꞌuiprazéb zô si te te sima ꞌre robꞌruiwapari zaꞌra mono wa. Ta norĩ hã te oto robzeiꞌõ si hã te te ꞌre sépata zaꞌra.
11 A hã ꞌRe ihâimana uꞌâsi mono ma romhuriꞌwa. Tahawa, ta norĩ ne ꞌre aimorĩ õ di za. Te za ꞌre aihâimana wẽ uꞌâsi mo, ꞌRe ihâimana uꞌâsi mono nhimiroti zarina si. Õhõ si te za ꞌre iꞌmadâꞌâ pese mo, ꞌRe ihâimana uꞌâsi mono si, aiꞌãma ꞌre siwãrĩ uꞌâsi mono da. Te za duré ꞌre idaꞌazawi pese mo. Rowasédé hã taré da te aima ꞌre ꞌmanharĩ zaꞌra mono nherẽ, asiptete sina te za Wanhibꞌapito ãma ꞌre aimorĩ uꞌâ. Atoi uꞌâsi te za duré ꞌre aimo. Taha na si ꞌre aimorĩ da, te za asina ꞌre iꞌmadâꞌâ uꞌâsi mo.
12 A hã isazeiꞌwa, ꞌre aimorĩ wa, te za sô ꞌre asiꞌwapéi uꞌâsi mo, ꞌre iꞌaimorĩ wẽ zéb zô, duré rowẽ uꞌâsi ãma ꞌre aihâimana mono wa, hâiwa ãma hã asina uwaimrami da. Taha da, ma tô bâtâ na aipisutu ꞌRe ihâimana uꞌâsi mono hã, daꞌahâ norĩ nhoꞌa isazeiꞌwa na asiwaihuꞌu wẽ zé para.
13 6:13-14 Ãhã na, wa za aima pisutu, uburé te aima iroti mono zé hã asina ꞌre ꞌmadâꞌâ uꞌâsi mono da. ꞌRe ihâimana uꞌâsi mono nhoꞌa, wa aima pisutu, tiꞌai ãma ꞌre idanomro mono zé hã te te dama ꞌre iꞌapisutu mono nhoꞌa. Cristu Zezusihi nhoꞌa zama wa aima pisutu, Põsiu hã Pilatuhu ma, tihâimanazém na isiwaihuꞌu wẽ nhoꞌa zama. Uburé te aima iroti mono zé hã te za asina ꞌre iꞌmadâꞌâ uꞌâsi mo, apâ we imorĩzéb u, Wanhibꞌapito Zezu Cristu hã. Asina ꞌre ꞌmadâꞌâ uꞌâsi mono wamhã, tawamhã da te aima ꞌre nharĩ zaꞌra mono õ di za, asina ꞌre iꞌmadâꞌâ mono õ zém na hã.
14 ꞌMadâꞌâ 6:13
15 Bâdâ te te ipisutuzém na te za ꞌRe ihâimana uꞌâsi mono hã tãma tinha, apâ wei morĩ da, Wanhibꞌapito hã. Wẽ uptabi di, ꞌRe ihâimana uꞌâsi mono hã. Õhõ si uburé Danhibꞌapito uptabi. Uburé tiꞌai ãma danhibꞌapito norĩ nhipai u, pire uptabi di. Duré uburé dama ipire norĩ nhipai u, pire uptabi di.
16 Õhõ si siwaprosi ꞌre imorĩ uꞌâ hã. Ta hã, rowaꞌa zaꞌẽtẽ na te ꞌre hâimana uꞌâsi. Tahawa, niꞌwa itẽme isébré da hã, mare di. Da te dasiwi ihâiba pibu da hã, mare di duré. Ta hã wẽ uptabi di. Waihuꞌu pese uptabi di duré. Tahawa, wa za ãma ꞌre wawata uꞌâsi zaꞌra.
17 Ãne te za duré isibrob ahâ norĩ ma ꞌre iꞌaroti mo, sibrob ahâ wẽ te, ꞌrâwi sina ꞌre wata tõ zaꞌra mono da. Danhibro hã dama ꞌre hâimana uꞌâsi zaꞌra mono õ di za, dama ãma ꞌre irowẽ zaꞌra mono zéb da hã. Tahawa, tinhibrop si te te ꞌre ꞌmadâꞌâ zaꞌra mono õ di za. ꞌRe ihâimana uꞌâsi mono zô si, te za ꞌre simnhasi zaꞌra, taha si, marĩ wẽ na uburé wama ꞌre sõpru mono wa, wama ãma ꞌre irobze zaꞌra mono zéb da hã.
18 Ãne te za duré isibrob ahâ norĩ ma ꞌre iꞌaroti mo, te te dama ꞌre ꞌmanharĩ wẽ uꞌâsi zaꞌra mono da. Te za duré uburé marĩ wẽ na dama ꞌre sõprub zaꞌra. Te za duré simiꞌẽ na marĩ na te te ꞌre dazari uꞌâsi zaꞌra.
19 Ãne wamhã, ite uptabi da hã te za marĩ hã iwẽ hã sô ꞌre simiꞌwara uꞌâsi zaꞌra, niwa aptoꞌo ré wab da hã. Duré rowẽ uꞌâsi te za ta norĩ hã ꞌre hâimana uꞌâsi zaꞌra, hâiwa ãma.
20 6:20-21 Timotiu, maꞌãpé roti hã tô sena si asina ꞌre ꞌmadâꞌâ uꞌâsi mono za, ꞌRe ihâimana uꞌâsi mono te te aima iwaihuꞌuzé hã, ãma ꞌre idaꞌapawapto mono zéb da hã. Niꞌwam norĩ hã taré te dama ꞌre siwasuꞌu zaꞌra, roti tô sena hã tãma iwaihuꞌu zaꞌra na hã. Tane nherẽ, Zezu Cristuhu nhimiroti hã wa te ꞌre isaze zaꞌra mono zém hawi, ma tô ta norĩ hã ꞌre sipa zaꞌra. Ta norĩ hã te te dama ꞌre irowasuꞌu zaꞌra mono zé hã, Wanhibꞌapito nhimiroti zarinai õ di. Tahawa, roti tô senaiꞌõre wi, te za asina ꞌre asiptete uꞌâsi mo, ꞌre wapari tõ mono da.
Wa ĩsima aiwẽ zaꞌra waꞌwa, rowẽ uꞌâsi ꞌre anomro aba mono da, Wamama hã te te ꞌre iꞌaipawaptob zaꞌra waꞌaba mono zéb zarina si.
21 ꞌMadâꞌâ 6:20
