2 Pedru 3:1-18
3 Ĩsisãnawã norĩ, ĩma iꞌasawi pese zaꞌra waꞌaba norĩ hã, ã hã maparane ãma, wa ãma aima robꞌuiꞌéré zaꞌra waꞌwa. Ã hã maparane iwaꞌõtõ na, te aima irobꞌuiꞌéré zaꞌra waꞌaba na hã, wa ĩsima wẽ, te ãma aipoꞌre puꞌu zaꞌra waꞌaba da, asimirosaꞌrada iwẽ u duré iꞌuptabi u, ãma ꞌre aipoꞌre puꞌu zaꞌra waꞌaba mono da.
2 Wa ĩsima wẽ, duréihã aimawi ꞌre ihâimana zaꞌra mono ꞌRe ihâimana uꞌâsi mono zadawa ꞌmahârâꞌwa da si, te te irobꞌuiꞌéré zaꞌra zém na ãma aipoꞌre puꞌu zaꞌra waꞌaba da, duré Uburé Wanhibꞌapito Wanhoꞌreptuiꞌwa nhimiroti na hã, Wanhibꞌapito zadawa wasuꞌuꞌwa norĩ te te aima irowasuꞌu zaꞌra waꞌaba zém na, Rowasuꞌuwẽ itém na hã.
3 Ipire uptabi imorĩꞌrata na hã, sô amnhasi zaꞌra waꞌaba, waihuꞌu zaꞌra waꞌaba da. Robꞌrãsutu ãma hã, aibâ norĩ te za sihâiꞌré zaꞌra, te te sima iwẽ zaꞌra zarina hâimana nhiséb õ na, za ꞌre ihâimana zaꞌra mono norĩ hã. Ta norĩ hã te za aiꞌãma ꞌre waꞌẽ zaꞌra waꞌwa.
4 Ãne te za ta norĩ hã ꞌre mreme zusi: “E marĩ ma tô ãma tihâiba, ropisudu ihâimana na hã, Cristu hã za apâ we imorĩzém na hã. Wahiꞌrata norĩ hã idâꞌâ zaꞌra hawim haré, te marĩ hã uburé õhõ haré ꞌre hâimana zaꞌra, ropoto naꞌrata hawim haré.”
5 Ta norĩ hã te te sima iwẽ zaꞌra zéb zarina, ma tô ãma poꞌre haimrami pese zaꞌra, ꞌRe ihâimana uꞌâsi mono hã timreme na si hâiwa duré tiꞌa hã, te te ipoto zahuré zém na hã. Tiꞌa hã â hawi te te ipoto na duré â na te te ipoto na ma tô duré ãma poꞌre haꞌâri zaꞌra,
6 duré iꞌâpusi mono na, duréihã te te idaꞌaꞌuprosi na.
7 Tane nherẽ, hâiwa duré tiꞌa hã ãhã na ꞌre ihâimana zahuré mono hã, te ꞌRe ihâimana uꞌâsi mono te te ꞌre ꞌmadâꞌâ zahuré, tô õ hã timreme na te te ãma iroti siromo zahuré zém na, za niwa unhama na te te tô iꞌuprosi zahuré na hã. Bâdâ Daꞌãma rowairébézé za ihâimana u hã te ꞌRe ihâimana uꞌâsi mono hã te te ꞌre ꞌmadâꞌâ zahuré aꞌâ, duré niꞌwam norĩ ꞌRe ihâimana uꞌâsi mono te te waihuꞌu zaꞌra tõ da, te te sima ꞌre iwẽ zaꞌra mono õ norĩ za te te iꞌuprosi zaꞌra zéb u hã.
8 Ĩsisãnawã norĩ, ĩma iꞌasawi pese zaꞌra waꞌaba norĩ hã, maꞌãpé ãma aipoꞌre siꞌâri zaꞌra waꞌaba tõ, ãhã na hã: Uburé Danhibꞌapito ma hã, misi bâdâ hã aiwa miu na wahum ne duré miu na wahu hã aiwa misi bâtâ ne, tãma hã.
9 Uburé Danhibꞌapito zô hã sô ꞌre rowaptâꞌâ mono õ di, tinhimiropisudu te te ãma ꞌre iꞌaꞌuwaimrami mono da hã, niꞌwam norĩ hã ãne na te te ãma ꞌre rosaꞌrata upa zaꞌra mono nherẽ. Tazahã, simiꞌẽi hâ uptabi di. Te te ꞌre asapari ze zaꞌra waꞌwa. E marĩ wa. Te te sima wẽ õ wa, niꞌwa te te iꞌuprosi da hã. Tãma iwẽ hã uburé dawasété na dasisãmri zaꞌra wa, itẽme idasipizari zaꞌra da si, dawasété hawi.
10 Tazahã, Uburé Wanhibꞌapito te bâdâ apâ we imorĩzé hã te za wi, isimisaihuri, sô danhimipari õ nherẽ, nimomo ꞌre isisisi mono ne. Taha bâtâ na hã, hâiwa duré hâiwa na uburé marĩ ꞌre isimasa mono hã te za aimani zaꞌra, robruru ipipa uptabi na. Duré uburé marĩ, hâiwa na ꞌre ihâimana zaꞌra mono hã te za ꞌRe ihâimana uꞌâsi mono hã ãma aroꞌo. Tiꞌa zama duré uburé marĩ iwa ꞌre ihâimana zaꞌra mono hã te za aimani zaꞌra za.
11 Tawamhã ãne hã aima waihuꞌu pese zaꞌra waꞌaba di oto, uburé marĩ hã za isiꞌutõrĩ zaꞌra na hã. Tawamhã bété e niha aihâiba na ꞌre aihâimana zaꞌra waꞌaba mono da, te amnhasi zaꞌra waꞌwa. Maꞌãpé aihâimanazém na ꞌRe ihâimana uꞌâsi mono ma si ꞌre rowẽ zaꞌra waꞌaba mono da, ꞌre aihâimana zaꞌra waꞌaba mono. Duré ꞌRe ihâimana uꞌâsi mono ma romhuri si, ꞌre ꞌmadâꞌâ pese zaꞌra waꞌaba mono.
12 Maꞌãpé ꞌre asimipari zaꞌra waꞌaba mono, ꞌRe ihâimana uꞌâsi mono te, bâdâ apâ we imorĩzé iwisizéb zô. Duré aihâimanazém na ꞌre wapsé zaꞌra waꞌaba mono, apâ wei morĩ suꞌu da. Taha bâtâ na hã hâiwa te za aiꞌutõ za. Duré uburé marĩ ãma ꞌre ihâimana zaꞌra mono hã te za tiꞌuwa zaꞌra za, unhama waꞌro zé te.
13 Tazahã, wa norĩ hã ꞌRe ihâimana uꞌâsi mono te te iropisutuzéb zarina, wa mapari zaꞌra ni, hâiwa itéb zô duré tiꞌa itéb zô zama. Tamemhã iꞌuwaibaba si te za uburé marĩ hã ꞌre hâimana zaꞌra.
14 Tahawa, ĩsiwaihuꞌu norĩ, ĩma iꞌasawi pese zaꞌra waꞌaba norĩ hã, ãne hã za iromhâimanazéb zô asimipari zaꞌra waꞌaba ré hã, maꞌãpé sada ꞌre asiptete zaꞌra waꞌaba mono, rowẽ sina, ꞌRe ihâimana uꞌâsi mono ãma ꞌre aihâimana zaꞌra waꞌaba mono da, aiꞌuptob ãna duré marĩ na ꞌre upa zaꞌra waꞌaba mono ãna isõꞌremhã.
15 Maꞌãpé, ãma ꞌre aipoꞌre puꞌu zaꞌra waꞌaba mono, Uburé Danhibꞌapito waꞌa suꞌu õ zém na hã. Danhoꞌreptuzé da te dasina ꞌre uwaimrami zaꞌra mono da, te daꞌãma waꞌa suꞌu ãna ꞌre hâimana. Wasisãnawã wama isawi pese zaꞌra Paulu hã ma tô ã hã wasuꞌu na aima robꞌuiꞌéré zaꞌra waꞌwa, rowaihu ꞌRe ihâimana uꞌâsi mono te te tãma isõmrizéb zarina.
16 Ãhã wasuꞌu na ma tô robꞌuiꞌéré tô, uburé tinhimiꞌuiꞌéré te te iꞌmanharĩ zaꞌra na hã. Isimiꞌuiꞌéré na hã, nima norĩ hã ipire te tihâimana zaꞌra, isadaihuꞌu da hã. Tahawa ꞌRe ihâimana uꞌâsi mono nhimiroti waihuꞌu õ ꞌwa norĩ hã duré sibꞌuwa na ꞌre ihâimana zaꞌra mono norĩ hã te siwaꞌru te te ãma dama ꞌre rowasuꞌu upa zaꞌra. Tane te duré Ibaihâ Iwazé pese na robꞌuiꞌéré na ihâiba amo aimawi norĩ ãma hã te te ꞌre upa zaꞌra. Tahawa te ta norĩ hã ꞌrâwi ꞌre siꞌuprosi.
17 Tazahã, a norĩ waꞌwa, ĩsiwaihuꞌu norĩ, ĩma iꞌasawi pese zaꞌra waꞌaba norĩ hã, ãne hã aima waihuꞌu pese zaꞌra waꞌaba di oto. Tahawa, maꞌãpé ãma ꞌre pibui pese zaꞌra waꞌaba mono, da te ꞌre asimroi waꞌaba mono tõ da, dahâimana nhiséb õ na ꞌre idahâimana mono u duré asiptete na ꞌre iꞌaihâimana zaꞌra waꞌaba mono zém hawi ꞌre airereꞌe aba mono tõ da.
18 Maꞌãpé, ꞌre aiprédub uꞌâsi zaꞌra waꞌaba mono, ꞌRe ihâimana uꞌâsi mono nhimipawaptobzé iwaꞌâbâꞌõ na duré rowaihu Wanhibꞌapito duré Uburé Wanhoꞌreptuiꞌwa Zezu Cristuhu te na. Taha ãma si ꞌre wawata zaꞌra waꞌaba mono, ãhã na duré õne uꞌâsi! Tane tô!
