Provébiu 3:1-35
3 Ĩꞌra, ĩnhimiroti na hã aipoꞌre siꞌâri tõ. Aipẽꞌẽ ꞌre asima tété.
2 Aima ĩnhimiroti wẽ zé hã, te za ꞌre iꞌaihâimana hâ mono zéb da hã, duré asima ꞌre irowẽ zaꞌẽtẽ mono zéb zama aima tisõ.
3 Asimizawizé hã, duré dama aiꞌumnhasizé hã ꞌre rẽme mono õ di za. Te za õne uꞌâ aipẽꞌẽ na asima ꞌre itété uꞌâsi mo.
4 Ãne hã ꞌre ꞌmanharĩ mono wamhã, te za ꞌRe ihâimana uꞌâsi mono ma, saꞌẽtẽ na asina tãma ꞌre irowẽ zani mo. Duré tiꞌai ãma zama te za asina dama ꞌre irowẽ zani mo. Te za duré da te dasima ꞌre aiwasuꞌu wẽ zaꞌra.
5 Maꞌãpé aipẽꞌẽ na Uburé Danhibꞌapito si, asina ꞌre umnhasi zaꞌẽtẽ mono. ꞌRâwi asimirowaihuꞌu na si ꞌre asiꞌmadâꞌâ mono tõ.
6 Uburé marĩ ꞌre iꞌabꞌmanharĩ mono na ꞌRe ihâimana uꞌâsi mono ãma ꞌre aipoꞌre puꞌu mono. Taha wamhã bâdâdi awaꞌawi inomro hã te za te te aima ꞌre hâiꞌré uꞌâsi.
7 Aiꞌrãi waihuꞌu pese na, asina ꞌre rosaꞌrata mono tõ. Uburé Danhibꞌapito hã ꞌre wazé mono. Aiba niwĩ uburé marĩ iwasété wi hã tãma ꞌre aipâi mono, marĩ ꞌre abꞌmanharĩ tõ mono da.
8 Ãne wamhã, te za aihâzéꞌõzé hã aima tisõ. Te za duré te te ꞌre aihi nhiptete uꞌâsi.
9 Maꞌãpé ꞌRe ihâimana uꞌâsi mono ꞌre wazé mono, asimarĩ na duré amnho iwẽ imorĩꞌrata na ꞌre iꞌatehâri mono ꞌrã na tãma ꞌre iꞌasõpru mono zém na.
10 Ãne hã ꞌre ꞌmanharĩ mono wamhã, te za ate amnho ubumrozém norĩ hã ꞌmasisi na ꞌre simasa. Te za duré uwa ꞌrãi waꞌu isé nhemezé ꞌmasisi tâi wa, isadawa hawimhã ꞌre puꞌu zaꞌra.
11 Ĩꞌra, niwa Uburé Danhibꞌapito te te ꞌre aiꞌahâri mono wamhã, asina ꞌre wẽꞌõ mono tõ. Duré te te aima ꞌre nharĩ mono wamhã, aiwi ꞌre robzeiꞌõ mono tõ.
12 E marĩ wa. Uburé Danhibꞌapito te tô tãma isawi norĩ hã te te ꞌre hâ zaꞌra, damama norĩ tiꞌra te te ꞌre ihâ zaꞌra mono ne, ihâimanazé te te tãma ꞌre saꞌra wẽ zaꞌra mono da.
13 Niꞌwa hã rowaihu iwẽ hã te te sõpẽtẽ wamhã, duré tiꞌrãi waihuꞌu wẽ na marĩ te te ꞌre awaihuꞌu mono wamhã, tãma ꞌre rowẽ mono di za.
14 Ã hã iwẽ uptabi te te ãma dama ꞌre irowẽ zani mono zéb da hã, ẽtẽ waipo prã prata nhipai u hã, duré ẽtẽ waipo pré oru nhipai u hã.
15 Rowaihu iwẽ hã, ẽtẽ waipo iwaꞌâbâ zaꞌẽtẽ mono nhipai u hã wẽ uptabi di. Uburé marĩ zô ꞌre irobꞌruiwapari mono hã tarére tãma hã, marĩ dai õ wa.
16 Rowaihu iwẽ hã te za ꞌre iꞌaihâimana hâ mono zé hã, duré asimarĩ pese zé hã duré da te ꞌre iꞌaiwazé mono zém na hã te te aima ꞌre anhomri.
17 Te za dapẽꞌẽ ꞌremhã dahâimanazé iwẽ ise hã te te dama ꞌre anhomri. Te za duré rowẽ na dasima iwẽ na ꞌre idahâimana zaꞌra mono zé hã te te ꞌre daꞌanhimro.
18 Rowaihu iwẽ hã te za ꞌre idahâimana hâ zaꞌra mono zé hã te te dama ꞌre sõmri zaꞌra, aiwa wede ꞌre isimasam hâ mono ne. Niꞌwa te te sima sawi wamhã, te za rowẽ na ꞌre hâimana.
19 Uburé Danhibꞌapito ma tô tinhimirowaihuꞌu wẽ na tiꞌa hã poto. Ma tô duré tiwaihuꞌu pese zarina hâiwa ma hã pisutu, iwa ꞌre isaꞌwari mono da hã.
20 Tinhimirowaihuꞌu wẽ na ma tô â mono hã ꞌre ipraba zaꞌra mono da hã pisutu. Ma tô duré hâiwa nhirõtõ hawi tã, tiꞌai u ꞌre itaꞌa mono da hã pisutu.
21 Ĩꞌra, asimirowaihuꞌuzé iwẽ, duré aiꞌrãi waihuꞌu pe hã aipẽꞌẽ ꞌremhã asima ꞌre tété mono. Niwamhã romhâ na aiwi ꞌre hâimana mono tõ da hã, rẽme tõ.
22 Ta hã te za aihâimana hâ zé hã aima te te ꞌre ãwisi. Tawamhã aibutu na danhoꞌrebzu dama iꞌmadâꞌâ ze ne hã te za aihâimanazé hã da te ꞌre ꞌmadâꞌâ ze zaꞌra.
23 Tahawa, aiꞌmarõwĩrĩ ãna te za ate bâdâdi iwẽ na si ꞌre ane mo.
24 ꞌRe asaꞌwari mono wamhã, aipahi ãna te za asimiwaptâ ãma hã ꞌre asaꞌwari mo. Te za duré mara bâre asima iwẽ na aptâ hã ꞌre iꞌmahâpãrĩ mo.
25 ꞌRe aihâtâꞌâ mono õ di za, marĩ ipipa hã saꞌrese õ ré waptu na asô ꞌre ipusi mono ma hã, duré iwasété norĩ wi, marĩ te te ꞌre irowamnarĩ pese zaꞌra mono ma hã.
26 E marĩ wa. Uburé Danhibꞌapito te za ꞌre irobꞌumnhasi mono zé hã aima te te ꞌre anhomri. Duré niwamhã te te airẽme waihuꞌu õ di za, romnhiwasi rosaꞌrese õ ré niha hã aiꞌârizé hã asisiwi waptãꞌã tõ da.
27 Marĩ hã aima ꞌre hâimana mono wamhã, marĩ zô tiwi ꞌre irowaptâꞌâ zaꞌra mono norĩ hã te za ꞌre iꞌapawapto wẽ uꞌâsi mo.
28 Aiwaptoma ꞌre isãmra mono ma hã tãma nharĩ õ di za, awẽb da si simipari da hã, pawaptob da wamhã. Pawapto waihuꞌu pese wamhã, te za tô taha bâtâ na hã ipawapto, marĩ aima hâimana wa.
29 Aiwaptoma ꞌre ihâimana mono ma, marĩ iwasédé tãma ꞌre ꞌmanharĩ mono da hã ꞌre rosaꞌrata mono tõ. E marĩ wa. Aiwaptoma ꞌrâwi aiꞌumnhasi sina ta hã ꞌre hâimana mono wa.
30 Siwaꞌru hã ꞌre daꞌawasuꞌu wasété mono tõ, marĩ, da te aima ꞌmanharĩ wasété nherẽ.
31 Rowasété ꞌmanharĩ zei ꞌwa norĩ hâimanazéb zô hã asima ꞌre robꞌruiwapari mono tõ. Duré õ norĩ te te ꞌre irobꞌmanharĩ zaꞌra mono si ne hã ꞌre robꞌmanharĩ mono tõ.
32 E marĩ wa. Uburé Danhibꞌapito ma hã, ihâimana nhipese norĩ hã tãma ꞌrui wa. Tane nherẽ, iꞌuwaibaba na si ꞌre ihâimana wẽ zaꞌra mono norĩ si te isiwaihu hã tãma ꞌre hâimana zaꞌra.
33 Iwasété norĩ nhorõwa ꞌre, ꞌre idahâimana zaꞌra mono ma hã te Uburé Danhibꞌapito ropipa hã te te tãma ꞌre apisutu. Iꞌuwaibaba na ꞌre ihâimana zaꞌra mono nhorõwa ꞌrep si, te iwẽ hã te te tãma ꞌre apisutu.
34 Daꞌãma ꞌre iwaꞌẽ zaꞌra mono norĩ ãma te za ꞌre waꞌẽ iwaꞌrãmi. ꞌRâwi ꞌre isiꞌmadâꞌâ ze zaꞌra mono õ norĩ si te za te te ꞌre apawapto.
35 Isimizaꞌrese wẽ norĩ hã te za da te ꞌre iwazéb zaꞌra mono zé hã te te sina tãma ꞌre hâimo zaꞌra. Tane nherẽ, duré niha na simizaꞌrese ãna ꞌre ihâimana zaꞌra mono norĩ ãma, te za sidâpâsi isisé hã da te ãma ꞌre saꞌra.
