Romanu 11:1-36
11 E tawamhã, ꞌRe ihâimana uꞌâsi mono hã tinhibꞌaꞌuwẽ norĩ hã ma tô te te siwi ꞌre wẽꞌõ zaꞌra, Izaraéu nhihudu norĩ hã. Mare di. Te te siwi ꞌre awẽꞌõ mono õ di. Mare uptabi di. Wa hã bété, Izaraéu nhihudu, ꞌre ĩmorĩ hã, duré Abraꞌãhã nhihudu ꞌre ĩmorĩ hã e te te siwi ꞌre ĩwẽꞌõ. Duré Bẽzamihĩ nhihudu norĩ siré ꞌre ĩmorĩ wamhã, e ma tô siwi ĩwẽꞌõ, Izaraéu nhihudu, ꞌre ĩmorĩ nherẽ. Mare di. Te te siwi ĩwẽꞌõ õ di, ꞌRe ihâimana uꞌâsi mono hã.
2 11:2-3 Tinhibꞌaꞌuwẽ norĩ hã, tô sena te te siwi ꞌre awẽꞌõ mono õ di ꞌRe ihâimana uꞌâsi mono hã, duréihã isãnaꞌrata hawimhã, te te sima ꞌre iꞌapisutu mono norĩ hã. Duréihã Eliasi ꞌRe ihâimana uꞌâsi mono zadawa ꞌmahârâꞌwa hã ma tô Izaraéu nhihudu norĩ ãma iwasété na ãma saꞌra, ꞌRe ihâimana uꞌâsi mono ma. Ãne na te te ãma irobꞌuiꞌérézé hã, aima waihuꞌu pese zaꞌra waꞌaba di. Ãne ma tô ãma robꞌuiꞌéré:
“Wanhibꞌapito, asadawa ꞌmahârâꞌwa norĩ hã ma tô ta norĩ hã te te ꞌre simro. Duré ẽtẽ zaꞌra ꞌmanharĩ hã, isisiwi aima danhoprubzéb da, marĩ, da te iwa ꞌre isaꞌra zaꞌra mono zé hã ma tô uburé te te ꞌre prub zaꞌra, ẽne hã. Ĩsiwaprosi uptabi, wa oto ꞌre ĩhâimana, te ꞌre iꞌasawi pese mono hã. Taha ꞌru te, te duré ĩzada ꞌre hâimana zaꞌra, ĩzama te te siwi ĩwĩrĩ da.”
3 ꞌMadâꞌâ 11:2
4 Tawamhã ꞌRe ihâimana uꞌâsi mono hã e niha ma tô asa tãma waihuꞌu, Eliasihi ma. Ãne ma tô tãma waihuꞌu:
“Wa tô ĩsima tété zaꞌra, aibâ norĩ 7 miu na ihâiba na, tisiré norĩ wazari siꞌutõrĩ tõ da dame, ihâibaꞌõ na dame ãma ꞌre iwata zaꞌra mono õ norĩ hã, Baau na romhâiba nhisi ãma hã. Ta norĩ si, te ĩzarina ꞌre hâimana uꞌâsi zaꞌra.”
5 Tane te duré ãhã na hã dama ꞌre romhâimana zaꞌra. Daꞌãma ꞌre pẽꞌẽzé mono wa, daꞌãma ꞌre isiwãrĩ mono zéb zarina, ma tô ꞌRe ihâimana uꞌâsi mono hã Izaraéu nhihudu norĩ hã te te sima ꞌre apisutu, umro na, isibꞌaꞌuwẽ uptabi si oto ꞌre hâimana zaꞌra mono da.
6 E tawamhã, marĩ hã te te ꞌre iꞌmanharĩ wẽ zaꞌra mono zéb zarina, ma tô te te sima ꞌre apisutu, ꞌRe ihâimana uꞌâsi mono hã, zudeu norĩ hã. Mare di. Taha zarina te te sima ꞌre apisutu mono õ di. Taré ãma ꞌre ipẽꞌẽzé zaꞌra mono zéb zarina, ãma ꞌre siwãrĩ ze zaꞌra mono wa, ma tô siꞌuihâ na te te sima ꞌre apisutu, õhõ ãma si ꞌre hâimana uꞌâsi zaꞌra mono da. Marĩ hã da te ꞌre iꞌmanharĩ wẽ zaꞌra mono zéb zarina, te te sima ꞌre daꞌapisutu mono ꞌwaꞌâhã, ãne zarina ꞌwaꞌâhã, aré senai õ di, ꞌRe ihâimana uꞌâsi mono, daꞌãma ꞌre ipẽꞌẽzé mono zéb zarina si, daꞌãma ꞌre isiwãrĩ mono zé hã.
7 Tawamhã e niha, wa za ãne na hã ãma waihuꞌu pese zaꞌra ni. Ãne, wa za oto ãma waihuꞌu zaꞌra ni. Izaraéu nhihudu norĩ hã ꞌRe ihâimana uꞌâsi mono, iwasédé hã te te oto ãma ꞌre abꞌmadâꞌâ tõ mono da, duré taha zarina te te ꞌre iwẽsãmri zaꞌra mono zéb da hã, sô ꞌre sõpré uꞌâsi mono nherẽ, te te sina tãma ãma ꞌre uwaimrami zaꞌra mono õ di, ta norĩ hã. ꞌRe ihâimana uꞌâsi mono, umro na te te sima ꞌre ipisutu zaꞌra mono norĩ si, ma tô te te sina tãma ꞌre uwaimrami zaꞌra, ꞌRe ihâimana uꞌâsi mono te te ꞌre iwẽsãmri zaꞌra mono zém na hã. Tane nherẽ, niꞌwam norĩ hã Izaraéu nhihudu nherẽ, ꞌRe ihâimana uꞌâsi mono nhiti ꞌre ihâimana zaꞌra mono norĩ hã, ta norĩ si ma tô ꞌRe ihâimana uꞌâsi mono hã poꞌre nhitob zaꞌra, imreme hã te te ꞌre waihuꞌu zaꞌra mono ãna, aꞌâ ꞌre nomro mono da.
8 Duréihã Mozési hã ma tô ãne na ãma robꞌuiꞌéré:
“ꞌRe ihâimana uꞌâsi mono hã ma tô ta norĩ hã tiwaihuꞌu pese na te te ꞌre poꞌre nhitob zaꞌra, simipari ãna pẽꞌẽ tete na ꞌre hâimana zaꞌra mono da aꞌâ. Ta norĩ hã ma tô duré te te ꞌre ꞌrãiwamnarĩ zaꞌra, rosaꞌrata waihuꞌu ãna, aꞌâ ꞌre nomro mono da. Tahawa, te ta norĩ hã ꞌRe ihâimana uꞌâsi mono te te siwi ꞌre waihuꞌu zaꞌra mono ãna, siwaꞌru ꞌre hâimana zaꞌra.”
9 Dawi hã ma tô duré ãne na ta norĩ ãma robꞌuiꞌéré zaꞌra, zudeu norĩ ãma hã:
“ꞌRe ihâimana uꞌâsi mono hã ta norĩ ma, iwẽ na tãma ꞌre sõprub zaꞌra mono wẽ te, ma tô ꞌre siꞌmadâꞌâ ze zaꞌra, taha na tãma ꞌre rowẽ zaꞌra mono da newa. Tahawa, marĩ wasété pire na ꞌre siꞌmarõpãrĩ zaꞌra mono neza, ꞌrâwi. Duré ꞌRe ihâimana uꞌâsi mono hã te te hâ zaꞌra neza.
10 Te te duré ꞌre tõmo nhitob zaꞌra mono neza, datobꞌa na ꞌre idanomro mono ne, ꞌre nomro mono da oto. Duré ta norĩ hã marĩ pire hã da te ꞌre ꞌwasari mono wa, iré ꞌre idanhihâpâ zaꞌra mono ne, te te ꞌre robzépata uꞌâsi zaꞌra mono neza.”
11 E tawamhã, zudeu norĩ hã ꞌRe ihâimana uꞌâsi mono wi, ꞌre siꞌmarõpãrĩ zaꞌra mono nherẽ, apâ itẽme ꞌre wahutu waihuꞌu zaꞌra mono õ di za. E tawamhã apâ itẽme ꞌre sipizari waihuꞌu zaꞌra mono õ di za. Te za tô apâ itẽme ꞌre sipizari zaꞌra. Ta norĩ hã ꞌRe ihâimana uꞌâsi mono wi, ꞌre sipizari zaꞌra mono wa, tiwasédé hã te te ꞌre ꞌmanharĩ zaꞌra mono wa, ma tô ꞌRe ihâimana uꞌâsi mono hã zudeuꞌõ norĩ ma aꞌâ pisutu zaꞌra, te te ꞌre idaꞌanhoꞌreptui mono zé hã. Zudeu norĩ hã te te ãma ꞌre ꞌruiwapari zaꞌra mono da, ma tô zudeuꞌõ norĩ ma aꞌâ pisutu zaꞌra, te te ꞌre idaꞌanhoꞌreptui mono zé hã, zudeu norĩ hã apâ itẽme ꞌre sipizari zaꞌra mono da, te te ꞌre idaꞌanhoꞌreptui mono zém niwĩ.
12 Zudeu norĩ hã ꞌRe ihâimana uꞌâsi mono te te ꞌre iwẽsãmri zaꞌra mono zéb da hã, te te sina tãma ꞌre uwaimrami zaꞌra mono õ wa, ma tô ꞌRe ihâimana uꞌâsi mono hã zudeuꞌõ norĩ ma, hâiwa hawi marĩ iwẽ na tãma ꞌre sõprub zaꞌra, daro mono bâ. Tawamhã zudeu norĩ hã ꞌRe ihâimana uꞌâsi mono niwĩ, ahâ uptabi na apâ za itẽme ꞌre sipizari zaꞌra mono wamhã, tawapsi, te za oto marĩ iwẽ uptabi hã te te dama ꞌre anhomri, ꞌRe ihâimana uꞌâsi mono hã hâiwa hawi, uburé tinhibꞌaꞌuwẽ norĩ ma hã.
Zudeuꞌõ norĩ, ꞌRe ihâimana uꞌâsi mono te te ꞌre iꞌanhoꞌreptui mono zé wasuꞌu
13 Zudeuꞌõ norĩ, wa za oto aima ĩsiwasuꞌu zaꞌra waꞌwa. Wa hã Cristuhu zadawa wasuꞌuꞌwa, wa aima ꞌre ĩhâimana zaꞌra waꞌwa. Wa hã te aima ꞌre iromhuri zaꞌra waꞌaba mono zé hã, taréi hãi õ di. Tahawa, wa za tô ĩnhimiꞌẽ na te aima ꞌre romhuri uꞌâsi zaꞌra waꞌwa.
14 Wa hã te aima ꞌre romhuri zaꞌra waꞌaba mono wa, ĩsiré zudeu norĩ hã te te ãma ꞌre aiꞌruiwapari zaꞌra waꞌaba mono da, wa tô ta norĩ si te ĩsima ꞌre wẽ zaꞌra, niꞌwam norĩ hã apâ ꞌRe ihâimana uꞌâsi mono u ꞌre sipizari zaꞌra mono wa, te te ꞌre anhoꞌreptui mono da.
15 Ta norĩ hã te te ꞌre saze zaꞌra mono õ wa, ma tô ꞌRe ihâimana uꞌâsi mono hã asa te te siwi ꞌre awẽꞌõ, aꞌâ. Ãne wa, ma tô aꞌâ aiꞌãma si ꞌre siwadi zaꞌra waꞌwa, zudeuꞌõ norĩ ãma. Tane nherẽ, ta norĩ hã niwapsi ꞌRe ihâimana uꞌâsi mono u, apâ ꞌre isipizari zaꞌra mono zéb zarina, te te ꞌre wẽsãmri zaꞌra mono wa, te za oto rowẽ uptabi na ꞌre hâimana zaꞌra, iwasédé hã te te oto ãma ꞌre iꞌabꞌmadâꞌâ mono õ zarina. ꞌRe dadâꞌâ zaꞌra mono wa, apâ ꞌre dahâiwaꞌutu zaꞌra mono wa, dama ꞌre irowẽ zaꞌra mono ne, te za oto ta norĩ hã rowẽ uptabi na ꞌre hâimana zaꞌra.
16 Ãne na, wa za oto aima ãma romnhimiréꞌé zaꞌra waꞌwa. Iꞌuꞌẽtẽ wapu hã da te ꞌre ꞌmanharĩ zaꞌra mono wamhã, sebre õ ré, te za suru na da te ꞌre poꞌo zaꞌra, ꞌRe ihâimana uꞌâsi mono ma, da te ꞌre sõmri zaꞌra mono da. Misi iꞌuꞌẽtẽ waꞌõno hã da te tãma ꞌre sõmri zaꞌra mono nherẽ, wahuré da te tãma ꞌre isõmri zaꞌra mono zé, te wasuꞌu. Duré ãté niꞌwa hã te za ꞌRe ihâimana uꞌâsi mono ma tinha, ãne: “Ã hã wede ꞌre isa mono zari hã wa aima pisutu, ate da.” Ãne hã wede hã zahadu ꞌre sa mono ré, niꞌwa hã wedezari si ꞌRe ihâimana uꞌâsi mono te da, te te tãma pisutu nherẽ, ipanhipti zama ite hã za. Ã hã wedezari hã, Izaraéu nhihudu norĩ hiꞌrata norĩ, te wasuꞌu. Duré ipanhipti hã ta norĩ nhihudu norĩ, te wasuꞌu. Izaraéu norĩ hiꞌrata norĩ hã, ꞌRe ihâimana uꞌâsi mono ma si, ꞌre hâimana zaꞌra mono da, te te ꞌre ipisutu zaꞌra mono ne, te za duré isihudu norĩ zama tãma ꞌre hâimana zaꞌra, wedezari si ꞌRe ihâimana uꞌâsi mono te da, da te tãma ꞌre pisutu zaꞌra mono nherẽ, ipanhipti zama ite ne tãma ꞌre hâimana zaꞌra mono da oto.
17 Ãne na, wa za duré aima ãma romnhimiréꞌé zaꞌra waꞌwa. Ãté azeitona wede hã te aꞌubuni wi ꞌre sa, oriwera na isisi hã ꞌmadâꞌâ ãna iprédu hã, tedeꞌwai õ nherẽ. Ta hã zudeuꞌõ norĩ, te wasuꞌu. Duré azeitona wede hâiba amo hã te duré ꞌre sa, danhoꞌa da te dasiwi ꞌre iꞌmadâꞌâ pese mono hã. Ta hã zudeu norĩ, te wasuꞌu. Tawamhã ãté azeitona wede hã danhoꞌa ꞌre isa mono panhipti hã te za nima niwĩp si panhipti nhiꞌẽ zaꞌra ni, taré simiꞌwara da, dasiré ꞌre ꞌrã zaꞌra mono õ wa. Ta hã, zudeu norĩ hã ꞌRe ihâimana uꞌâsi mono te te ꞌre isaze zaꞌra mono õ norĩ, te wasuꞌu. Ãté aꞌubuni wi azeitona wede ꞌre isa mono panhipti hã te za misi wẽꞌẽ ni, azeitona wede hâiba amo hã dama iꞌmadâꞌâ pese u iwede wãi wa, da te ãma wasisi da, dasiré oto ꞌre ꞌrãi mono da. Ta hã, zudeuꞌõ norĩ ãma, ꞌRe ihâimana uꞌâsi mono, oto ãma ꞌre isibꞌaꞌuwẽ zaꞌra mono zé, te wasuꞌu. Tawamhã azeitona wede, dama iꞌmadâꞌâ pese wede waꞌu na te za oto tipanhipti prédu, wẽ na, aꞌubuni wi azeitona wede ꞌre isa mono panhipti hã robꞌrãi wede amoi u, da te ãma iwasi hã. Tane duré, zudeu norĩ ma, ꞌRe ihâimana uꞌâsi mono hã marĩ wẽ na tãma ꞌre isõprub zaꞌra mono zé hã, te duré aima ꞌre hâimana zaꞌra waꞌwa oto, zudeuꞌõ norĩ na ꞌre aihâimana zaꞌra waꞌaba mono ma hã.
18 Tahawa, robꞌrãi wede, dama iꞌmadâꞌâ pese panhipti hã ꞌre ꞌrã zaꞌra mono õ wa, da te ꞌre isiꞌẽ zaꞌra mono ne, ꞌRe ihâimana uꞌâsi mono aꞌâ te te siwi ꞌre iꞌawẽꞌõ mono norĩ ma, aipire na tãma ꞌre aihâimana zaꞌra waꞌaba mono zém na, asina ꞌre saꞌra waꞌaba mono õ di za. E iwede panhipti waꞌui hawi, te iwede zari hã ꞌre prédub zaꞌra. Mare di. Iwede zari hawip si, te iwede panhipti hã ꞌre prédub zaꞌra. Tane, a norĩ waꞌwa hã zudeu norĩ ma, aipire na ꞌre aihâimana zaꞌra waꞌaba mono õ di. Tahawa, aipire na tãma ꞌre aihâimana zaꞌra waꞌaba mono zém na, ꞌrâwi asina ꞌre aiwata waihuꞌu zaꞌra waꞌaba mono õ di za.
19 Zudeuꞌõ norĩ, ãté ãhã wasuꞌu zarina, te za ãne asima ꞌre inharĩ zaꞌra waꞌaba mo: “ꞌRe ihâimana uꞌâsi mono hã robꞌrãi wede panhipti, da te ꞌre isiꞌẽ zaꞌra mono ne, e marĩ da, ma tô te te siwi ꞌre awẽꞌõ, zudeu norĩ hã. Wa norĩ hã iwaꞌrãmi ꞌre wahâimana zaꞌra mono da, ma tô ta norĩ hã te te siwi ꞌre awẽꞌõ. Robꞌrãi wede amo panhipti hã iwede amo na da te ãma ꞌre iwasisi zaꞌra mono ne, wa oto wa norĩ hã ꞌre wahâimana zaꞌra, iꞌupana zaꞌra.”
20 Ãne na asima ꞌre nharĩ zaꞌra waꞌaba mono wamhã, iꞌuwaibaba te za tô asima ãma ꞌre irowaihuꞌu zaꞌra waꞌaba mo, ta norĩ ãma hã. Ta norĩ hã ma tô te te ꞌre awẽꞌõ tô siwi, te te ꞌre saze zaꞌra mono õ wa. A norĩ waꞌaba si ꞌre sazei pese zaꞌra waꞌaba mono wa, te tô ta norĩ waꞌrãmi ꞌre aihâimana zaꞌra waꞌaba mo. Tane nherẽ, a norĩ waꞌwa hã asina ꞌre aiwata zaꞌra waꞌaba mono õ di za. Tôꞌã. Tahawa, te za ꞌRe ihâimana uꞌâsi mono si asiwi ꞌre iwazéb zaꞌra waꞌaba mo.
21 E ꞌRe ihâimana uꞌâsi mono hã zudeu norĩ ma, tinhimihâzé te te tãma ꞌre baꞌa zaꞌra mono õ nherẽ, te za bété a norĩ waꞌaba ma tinhimihâzé hã te te aima ꞌre baꞌa zaꞌra waꞌwa, tiwi ꞌre aipizari zaꞌra waꞌaba mono wamhã. Mare di. Te za tô te te ꞌre aihâ zaꞌra waꞌwa, tiwi ꞌre aipizari zaꞌra waꞌaba mono wamhã. Tahawa, te za ꞌRe ihâimana uꞌâsi mono si asiwi ꞌre iwazé pese zaꞌra waꞌaba mo.
22 Ãhã wasuꞌu na, wa za ꞌRe ihâimana uꞌâsi mono nhimizawi pese zé hã ãma waihuꞌu zaꞌra ni. Isimihâzé pire na zama, wa za duré ãma waihuꞌu pese zaꞌra ni. Tiwi ꞌre isiꞌmarõpãrĩ pese zaꞌra mono norĩ si, te za te te ꞌre ahâ zaꞌra zaꞌẽtẽ. Tane nherẽ, a norĩ waꞌwa hã ꞌRe ihâimana uꞌâsi mono te te ꞌre asawi pese zaꞌra waꞌaba mono zéb zarina, marĩ iwẽ na te te ꞌre aipawaptob zaꞌra waꞌaba mono zéb da hã, tãma asina ꞌre uwaimrami uꞌâsi zaꞌra waꞌaba mono wamhã, te za tô rowẽ hã te te aima ꞌre pisutu uꞌâsi zaꞌra waꞌwa, hâiwa hawi, aiꞌãma ꞌre ipẽꞌẽzé zaꞌra waꞌaba mono zéb zarina. Ãne na tãma asina ꞌre uwaimrami zaꞌra waꞌaba mono õ wamhã, a norĩ waꞌaba zama te za tô te te siwi ꞌre aiwẽꞌõ pese zaꞌra waꞌwa, robꞌrãi wede panhipti hã ꞌre ꞌrã zaꞌra mono õ wa, da te ꞌre isiꞌẽ zaꞌra mono ne.
23 Duré zudeu norĩ hã Zezusihi zazeiꞌõꞌwa na ꞌre ihâimana zaꞌra mono norĩ hã, ꞌRe ihâimana uꞌâsi mono u oto ꞌre sipizari zaꞌra mono wamhã, te za oto apâ ãma ꞌre sibꞌaꞌuwẽ zaꞌra, ta norĩ ãma. Ãne hã ꞌRe ihâimana uꞌâsi mono ma, waihuꞌu pese di, zudeu norĩ ma, apâ te te ꞌre iꞌmanharĩ wẽ zaꞌra mono zéb da hã.
24 Ãne na, wa za oto rowasuꞌu na aima ꞌrãsutu zaꞌra waꞌwa, azeitona wede panhipti wasuꞌu na ãma isimiréꞌézém na hã. A norĩ waꞌwa hã zudeuꞌõ na ꞌre aihâimana zaꞌra waꞌaba mono norĩ hã, aꞌubuni wi azeitona wede panhipti, da te ꞌmaiwẽꞌẽi wa, azeitona wede dama iꞌmadâꞌâ pese wede u, da te ãma iwede wasisi ne, te oto simisutu ꞌre aihâimana zaꞌra waꞌaba mo, zudeu norĩ me. Duré zudeu norĩ hã azeitona wede dama iꞌmadâꞌâ pese panhipti ne, te ꞌre hâimana zaꞌra. Taha wede panhipti hã da te ꞌre siꞌẽi mono wa, da te ꞌre isãmra mono hã iꞌmadâꞌâꞌwai ma, tãma wapure di, tô iwede na apâ te te ãma ꞌre iꞌato mono da hã. Tane duré, ꞌRe ihâimana uꞌâsi mono ma hã wapure di, zudeu norĩ ãma apâ ꞌre isibꞌaꞌuwẽ zaꞌra mono zéb da hã, ta norĩ hã tiwi ꞌre sipizari zaꞌra mono nherẽ, aré.
Zudeu norĩ hã, ahâ na ꞌRe ihâimana uꞌâsi mono u, za apâ ꞌre isipizari zaꞌra mono zé wasuꞌu
25 Ĩsisãnawã norĩ, zudeuꞌõ na da te ꞌre aiwaptẽrẽ zaꞌra waꞌaba mono norĩ hã, marĩ aré dama iwaihuꞌuꞌõ na roti ipire wasuꞌu na hã wa za oto aima rowasuꞌu zaꞌra waꞌwa, asimizaꞌrese ãna ꞌre aihâimana zaꞌra waꞌaba mono tõ da. Zudeu norĩ upana, ꞌRe ihâimana uꞌâsi mono hã aiꞌãma waꞌaba si ꞌre sibꞌaꞌuwẽ mono newa, ꞌrâwi asiꞌãma ꞌre aiwata zaꞌra waꞌaba mono tõ da, wa za oto ãne na aima rowasuꞌu zaꞌra waꞌwa. Izaraéu nhihudu norĩ hã ꞌRe ihâimana uꞌâsi mono wi, pẽꞌẽ tete uptabi na ꞌre hâimana zaꞌra mono nherẽ, pẽꞌẽ tete uꞌâsi, tiwi ꞌre hâimana zaꞌra mono õ di za. Duréihã, ꞌRe ihâimana uꞌâsi mono te te sima ipisutu siromo zéb zarina, zudeuꞌõ norĩ hã daꞌahâ uptabi na Cristu za da te ꞌre isaze zaꞌra mono norĩ zaꞌratazé hã, oto iwa waptãꞌã wapsi, te za oto zudeu norĩ hã ahâ uptabi na itẽme ꞌre sipizari zaꞌra, õhõ ãma si oto ꞌre nomro mono da.
26 Ãne ꞌRe ihâimana uꞌâsi mono te te ꞌre isõꞌreptu zaꞌra mono zéb da hã, Izaraéu nhihudu norĩ hã. Ãne na ma tô duréihã Izaia hã ãma robꞌuiꞌéré siro, ta norĩ ãma hã:
“Danhoꞌreptuiꞌwa da hã, Zeruzalẽ ãma Siã na saꞌa nhisi ãma, dasiré za ꞌre ihâimana mono hã, tame.Ta hã Zacoho nhihudu norĩ ꞌre iwasété zaꞌra mono zé hã te za te te tãma ꞌre apari.
27 ꞌRe ihâimana uꞌâsi mono hã ma tô ta norĩ ãma tinhimirosaꞌrada hã waihuꞌu siro, ãne: ‘Ta norĩ ma, te iropisutuzé hã wa za tô tãma ãma uwaimrami zaꞌra, iwasédé te tãma ꞌre iꞌapari mono zém na.’ ”
28 Zudeu norĩ hã Cristuhu wasuꞌuwẽ hã ma tô ahâ na te te siwi ꞌre wẽꞌõ zaꞌra. Tahawa, te oto ꞌRe ihâimana uꞌâsi mono nhitobꞌru ne ꞌre hâimana zaꞌra. Taha waꞌrãmi, ma tô aiꞌãma ꞌre siwadi zaꞌra waꞌwa, asiré zudeuꞌõ norĩ ãma hã. Tane nherẽ, isibꞌaꞌuwẽ ꞌre nomro mono da, te te pisutu zaꞌra wa, te ta norĩ hã te te ꞌre azawi pese uꞌâsi sima, ta norĩ hiꞌrata ma, te te sina iropisutu zaꞌra zéb zarina.
29 ꞌRe ihâimana uꞌâsi mono te te sima ꞌre daꞌapisutu mono nherẽ, duré marĩ iwẽ na dama ꞌre sõpru mono nherẽ, e te za tinhimirosaꞌrata na te te ãma ꞌre saprĩ. Mare di. Misi haré, isimirosaꞌrada hã te tãma ꞌre hâimana uꞌâsi.
30 Duréihã, aihiꞌrata norĩ waꞌwa hã ꞌRe ihâimana uꞌâsi mono nhimiroti hã te te ꞌre wapari zaꞌra mono ãna, ma tô aré ꞌre hâimana zaꞌra, zudeuꞌõ norĩ hã. Tane nherẽ, zudeu norĩ hã ꞌRe ihâimana uꞌâsi mono si te te ꞌre sazei pese zaꞌra mono õ wa, ma tô oto aiꞌãma ꞌre pẽꞌẽzé zaꞌra waꞌwa, aiꞌãma ꞌre sibꞌaꞌuwẽ zaꞌra waꞌaba mono da, zudeuꞌõ ꞌre aihâimana zaꞌra waꞌaba mono nherẽ.
31 A norĩ waꞌwa hã aré asimipari ãna ꞌre anomro aba mono nherẽ, aiꞌãma ꞌre ipẽꞌẽzé zaꞌra waꞌaba mono ne, te za oto duré zudeu norĩ ãma zama ꞌre pẽꞌẽzé ꞌRe ihâimana uꞌâsi mono hã, poꞌre ãna duré ta norĩ hã tiwi ꞌre hâimana zaꞌra mono nherẽ.
32 ꞌRe ihâimana uꞌâsi mono wi, danhimipari ãna ꞌre danomro mono wa, ma tô te te siwi ꞌre daꞌawẽꞌõ pese, dawasédé hã te te daꞌãma ꞌre iꞌabꞌmadâꞌâ mono hawi. Dazazéb ꞌre, da te ꞌre danheme mono wa, apâ dasiꞌuihâ na ꞌre idawairébé waihuꞌu mono õ ne, dawasété hawi ꞌrâwi ꞌre dasisõꞌreptui waihuꞌu zaꞌra mono õ di. Taha na, dasiꞌuihâ na da te dasina ꞌre waihuꞌu zaꞌra mono da, ma tô te te siwi ꞌre daꞌawẽꞌõ. Uburé daꞌãma ꞌre pẽꞌẽzé mono da, ma tô ãne hã te te dama ꞌre apisutu, ꞌRe ihâimana uꞌâsi mono hã.
Iwaihuꞌu pese na ꞌRe ihâimana uꞌâsi mono wasuꞌu
33 ꞌRe ihâimana uꞌâsi mono hã uburé daꞌãma ꞌre isiwamri mono zé hã tãma saꞌẽtẽ uptabi di, te te dama ꞌre iꞌabꞌmanharĩ wẽ mono zéb da hã. Iwaihuꞌu pe hã tãma saꞌẽtẽ uptabi di duré. E ꞌwa hã te za marĩ hã te te sima ꞌre iꞌapisutu mono zé hã tiwi waihuꞌu. E ꞌwa hã te za duré tiwi waihuꞌu, uburé marĩ hã te te ꞌre iꞌabꞌmanharĩ mono zé hã.
34 Duréihã Izaia hã ma tô ãne na ãma robꞌuiꞌéré:
“E ꞌwai ma, Wanhibꞌapito nhimirosaꞌrada hã waihuꞌu pese di.E ꞌwa hã roti na tãma iwaꞌrãmiꞌwa da hã, te ꞌre hâimana. Robaba di.”
35 Wahiꞌrata hâiba amo hã ma tô duré ãne na ãma robꞌuiꞌéré, Zo na isisi hã:
“ꞌRe ihâimana uꞌâsi mono si, roptedeꞌwa ꞌre hâimana mono nherẽ, e niha te za niꞌwa hã marĩ hã tãma tisõ, iwaꞌrãmi marĩ na te te tãma iwaꞌâbâ da hã. Ãne hã robaba uptabi di, tãma hã.”
36 ꞌRe ihâimana uꞌâsi mono si ma tô uburé te te aropoto, sima. Tahawa, te uburé marĩ hã te te ꞌre abꞌmadâꞌâ, tiwaihuꞌu pese na. Ãne wa, ꞌRe ihâimana uꞌâsi mono ãma, aihĩni, ãma ꞌre wawata uꞌâsi zaꞌra waꞌaba mono, õne uꞌâsi. Tane tô.
