მოსეშ კანონით ღორონთ იწონუანდჷ ქოთ გვრიტიშ დო ქოთ ტორონჯიშ შეწირუას. თე ჟირ ფრინველ ირო ართო რდჷ მოშინაფილ მსხვერპლიშ შეწირუაწკუმა დაკავშირებულ კანონს (ლევ. 1:14; 12:8; 14:30). მუშენ რდჷ თენა ჯგირ? თეშ ართ-ართ მიზეზ რდჷ, ნამდა გვრიტ ირო ვა რდჷ ხეშამალაფარ. მუშენ იფჩიებუთ თეს?

გვრიტეფ ტიბ ქიანეფშა მეფურინუნან ფერ ფრინველეფ რენა. თინეფ ირ დამორჩილს სამხრეთჸურე გინოფურინუნა ტიბ ქიანეფშა დო ისრაელშა გაზაფხულს ირთუნა (ქებ. 2:11, 12; იერ. 8:7). თენა თის ნიშნენდჷ, ნამდა ბიბლიურ დროს ისრაელეფშო ძნელ იჸუაფუდ გვრიტიშ შეწირუა ზოთონჯის.

თეშ გინაწონს, ტორონჯეფ სოთინ ვეგნოფურინუნდეს, ათეშენ თინა ირო რდჷ ხეშამალაფარ; თეს გეძინელ, ისრაელეფს ტორონჯეფ მოშინაურებულ ხოლო აფდეს (ქეშუდარით იოანეშ 2:14, 16). წიგნის „ბიბლიურ მცენარეეფ დო ცხოველეფ“ ჭარჷ: „პალესტინაშ არძა სოფელს დო ქალაქის მოშინაურებულ აფდეს ტორონჯეფ. თექ ჸუდეშ არძა მინჯეს მუშ ჸუდეს კეთებულ აფუდ ტორონჯიშ ბუდე“ (ქეშუდარით ესაიაშ 60:8).

თეშნერო, იეჰოვაქ ქაძირუ, ნამდა რე მოჸოროფე დო გონიერ პიროვნება, მუშენდა ისრაელეფშო ხეშამალაფარ რდჷ ჟირხოლო ფრინველ, ნამდგაშ შეწირუა მთელ წანაშ დინახალე შეულებდეს.