1. სოვრეშე შემლებნა გებგათ, მუ მელუ თე ქიანს?

დღას ქუნორღვენო შემთხვევა, მუჟამს ახალ ამბეშ მორჩქილაფაშ უკულ გაკვირებულს გითქუალუ: „მუ ოხვარ თე ქიანას?!“ შურო ველუქინ თეშ თიცალ უბედრობეფ მუთმოხვადუ, ნამდა მუთუნ კოჩის ვარაგადე, მუს მომღანა ჭუმანერ დღა (იაკობი 4:14). მარა იეჰოვა ღორონთის უჩქ, მუ მელუ თე ქიანას (ესაია 46:10). საუკუნეეფიშ წოხლე მუშ სიტყვა, ბიბლიას, თიქ წინასწარ რაგადუ, მუ უბედრობეფ მოხვადუდ ჩქინ დროს დო თი ჯგირ მოვლენეფიშ გურშენ ხოლო, ნამუთ მალას ოკო იჸუას.

2, 3. მუ შეკითხეს მოწაფეეფქ იესოს დო მუჭო უპასუხ თიქ?

² იესო ქრისტე იჩიებუდ ღორონთიშ სამეფოშ გურშენ, ნამუთ მოსპუნს უბადობას დო დედამიწას სამოთხეთ გინართინუანს (ლუკა 4:43). ხალხის ოინტერესუდ, მუჟამს მიშუ თე სამეფო. ართშა მოწაფეეფქ იესოს კითხეს: „ქომწით, მუჟამს მოხვადუ თენა, მუ იჸუაფ სქან მოულაშ დო თე ქიანაშ აღსასრულიშ ნიშანი?“ (მათე 24:3). იესოქ უპასუხუ, ნამდა ხვალე იეჰოვა ღორონთის უჩქუდ თე სისტემაშ აღსასრულიშ ზუსტ  დრო (მათე 24:36). მარა იესოქ წინასწარ რაგადუ მოვლენეფ, ნამუქით ოკო მოხვადუკო, სოიშა ღორონთიშ სამეფო მიშუ დო ხალხის მშვიდობა დო უსაფრთხოებას მოუღანდ. იესოშ წინასწარნარაგადა ჩქინ დროს ისრულებუ!

³ სოიშა დიბჭყანდათ თიშენ მსჯელობას, ნამდა „თე ქიანაშ აღსასრულიშ“ ბოლო დღალეფს ფცხოვრენთ, ჭიჭე ქიფჩუათ ჩხუპიშ გურშენ, ნამუთ მითინ კოჩის ვაუძირ. თე ჩხუპიქ მოხვად ზეცას დო თიშ შედეგეფქ მსოფლიოს ქიგიოდოხოდ.

4, 5. ა) მუქ მოხვად ზეცას იესოშ გამეფებაშ უკულ? ბ) მუქ მაჸუნ ზეცას მოხვალამირ ჩხუპის, მუჭოთ თეს გამოცხადებაშ 12:12 მოძირანა?

⁴ თე წიგნიშ წოხოლენ დუდშე გებგით, ნამდა 1914 წანას იესო ქრისტექ ზეცას გემეფუ (წეკითხი დანიელიშ 7:13, 14). სამეფო ძალაუფლებაშ მიღებაშ უკულ იესოქ მოქმედება ქიდიჭყუ. ბიბლია იჩიებ: „გეტირხ ჩხუპიქ ზეცას, მიქაელი [იესოშ შხვა სახელი] დო თიშ ანგელოზეფ ოჩხუპუდეს დრაკონს [სატანა ეშმაკი]. ჩხუპენდეს დრაკონ დო თიშ ანგელოზეფ“. * სატანა დო თიშ უბადო ანგელოზეფქ, დემონეფქ, წაგეს თე ჩხუპის დო ზეცაშე დედამიწაშა იჸუეს გითორღვაფილქ. თე მოვლენაქ ღორონთიშ ართგურ სულიერ ქმნილებეფი დიდო გახარუ. მარა ხალხის თეცალ ხიოლიშ მიზეზ ვაღვენუდ. ბიბლიას წინასწარ რაგადებულ რდუ: „ვავა დიხას . . . მუშენდა თქვანდა ეშმაკიქ გეგმორთუ, დიდო გაჟღამებულქ, მუშენდა უჩქ, ნამდა ჭიჭე დრო აფუ დოსკილადირი“ (გამოცხადება 12:7, 9, 12).

⁵ დეფიქრი, მუქ ოკო მაჸუნკო ზეცას მოხვალამირ ჩხუპის. გაჟღამებულ სატანა დედამიწაშა „ვავას“ ანუ უბედრობას მიღანდუ. თე დუდშე ქიგეგენქ, ნამდა ჩქი ზუსტას თე დროს ფცხოვრენთ. მარა თე დრო შედარებით ჭიჭე ხანს  გეგრძელებუ. თენა სატანას ხოლო გვალო ჯგირო უჩქუ. ბიბლიას დროშ ათე პერიოდის „ბოლო დღალეფი“ ჯოხო (2 ტიმოთე 3:1). მუ სახიოლო რე, ნამდა ღორონთი მალას ბოლოს მუღენს სატანას დო თიშ კვალ ვეჸუაფუ დედამიწას! მორთ, გუვარჩუათ ბიბლიას წინასწარნარაგადა მოვლენეფ, ნამუთ ჩქინ დროს მუთმოხვადუ. თავრეშე ქობძირუნთ, ნამდა ბოლო დღალეფს ფცხვორენთ დო ღორონთიშ სამეფო იეჰოვაშ მოჸოროფე ხალხის მალას მარადიულ ბედნერობას მოუღანს. პირველ რიგის, გუვარჩუათ იესოშ წინასწარნარაგადა ნიშანიშ ოთხ მოვლენა, ნამუთ ჩქინ დროს იჸუაფუდ.

6, 7. მუჭო ისრულებ იესოშ სიტყვეფ ჩხუპეფ დო ოჭკომალიშ სინაკლებეშ გურშენ?

⁶ „რჯულ რჯულს გეგნენტერებუ დო სამეფო სამეფო გეგნენტერებუ“ (მათე 24:7). ულირ საუკუნეს მოხვალამირ ჩხუპეფს მილიონობით ხალხიქ გოჭყორდ. ართ ბრიტანელ ისტორიკოს იჩიებ: „მა-20 საუკუნეს არძაშ უმოს ზისხირქ დოწუ . . . თე საუკუნეს ჩხუპეფ თითქმის ვემეჭყოლადე. ხვალე მუსხირენ ჭიჭე პერიოდ რდუ, მუჟამს ვამოხვალამე შეიარაღებულ კონფლიქტეფი“. „უორლდ უოთჩიშ ინსტიტუტიშ“ მეცნიერულ მონაცემეფ ოძირანს, ნამდა „მა-20 საუკუნეშ ჩხუპეფს ხალხიშ  ღურა სუმმაგო მეტ რდუ, ვინემ პირველ საუკუნეშე დოჭყაფილ 1899 წანაშ მეთვალირო არძა ჩხუპის“. 1914 წანაშე დოჭყაფილ ჩხუპეფს 100 მილიონშე მეტ კოჩიქ ღურუ. შილებე მითინ მაფუდან ჩხუპის ნაღურა, მარა იშენით ძნელ რე ბოლოშა ქიგებგათ თი ჭუა, ნამუთ მილიონობით კოჩის აფუ გინნაღელი.

⁷ „იჸუაფუ ოჭკომალიშ სინაკლებე“ (მათე 24:7). სპეციალისტეფ იჩიებნა, ნამდა ბოლო 30 წანაშ დინახალე ოჭკომალ პროდუქტის უმოსის გიშმაშკვანა, მარა ბრელს იშენით ვაუღ დასაბაღ ოჭკომალ. ხალხის ვაუღ ვართ ოჭკომალიშ დო ვართ დიხაშ ოჸიდე ფარა მოსავალიშ მაჸუნაფალო. ღარიბ ქიანეფს მილიარდობით კოჩიშ ართ დღაშ შემოსავალ ართ დოლარ ვარდა ართ დოლარშე ნაკლებ რე. თინეფიშ უმენტაშ შკირენულ რე. „ჯამრთელობაშ დაცვაშ მსოფლიო ორგანიზაცია“ იჩიებ, ნამდა გლახა კვებაშ გურშენ ირ წანას 5 მილიონშე მეტ ბაღანა ღურუ.

8, 9. მუ ოძირანს, ნამდა ისრულებ იესოშ წინასწარნარაგადა დიხანწალუა დო ეპიდემიეფიშ გურშენ?

⁸ „იჸუაფუ დიდ დიხანწალუეფი“ (ლუკა 21:11). ამერიკაშ შეერთებულ შტატეფიშ გეოლოგიურ სამსახურ აცხადენს, ნამდა ირ წანას სოდგარენ 19 თიცალ ძლიერ დიხანწალუა მუთმოხვადუ, შენობეფი იზიანებუ დო დიხა  ინწკირუ. თეშ გარდა, დახე ირ წანას რე თიცალ დიხანწალუეფი, ნამუშ დროს მთლიანო აკმოცენს შენობეფი. ამდღარ მონაცემეფით, 1900 წანაშე დოჭყაფილ დიხანწალუეფიშ დროს 2 მილიონშე მეტ კოჩიქ ღურუ. ართ-ართ წყარო იჩიებუ, ნამდა ტექნიკაშ განვითარებას ბრელ მუთუნ ვაუთირუ, ხალხი იშენით ღურუ.

⁹ „იჸუაფუ . . . ეპიდემიეფი“ (ლუკა 21:11). მართალ რე, მედიცინა წოხლე მეურს, მარა კაცობრიობას იშენით დუდქ ვემდაღინ ჯვეშ დო ახალ ლახალეფშა. ართ დოკუმენტი იჩიებ, ნამდა 20 მიჩქუნა ფერ ლახალაქ, თინეფ შკას ტუპერკულიოზი, მალარია დო ქოლერაქ ბოლო ვით წანაშ დინახალე უმოსო გევრცელუ დო ნამთინე ლახალაშ მედიკამენტეფით სკილადაქ ხოლო უმოსო გერთულუ. არძაშ უნაკლებაშ 30 ახალ ლახალა რე მუკორჩქინელი. თინეფშე ნამთინე დიოდღარო ვესკილიდენ ფერ დო კოჩიშ მაჸვილარ რე.

10. მუჭოთ 2 ტიმოთეშ 3:1—5-ის რე წინასწარნარაგადა, მუ თვისებეფიშ მენდულ რე ხალხი?

¹⁰ ჟიშე გენიფხილითინ თი მოვლენეფიშ გარდა, ბიბლიას თინა ხოლო რდუ წინასწარნარაგადა, ნამდა ბოლო დღალეფს ხალხი დითირუდუ. მოციქულ პავლექ ეჭარ, მუნერ იჸუაფუდ ხალხი საერთოთ. თინა მირაგადნა: „ბოლო  დღალეფს ძნელ გინაღალარ დრო დოდირთუ“ (წეკითხი 2 ტიმოთეშ 3:1—5). პავლექ თქუ, ნამდა ხალხ იჸიდ:

• დუდიშ მოჸოროფეეფი

• ფარაშ მოჸოროფეეფი

• მშობლეფიშ უდუჯერებელეფი

• მოღალატეეფი

• ჸოროფა ვაუღუნან ფერეფი

• დუდ უშუკებუეფი

• სასტიკეფი

• ღორონთიშ უმოსო სიამოვნებაშ მოჸოროფეეფი

• ღორონთიერო იძირენა, მარა სინამდვილეს ღორონთიშ ართგურეფ ვა რენა.

11. მუჭო რე ეჭარილ ფსალმუნიშ 92:7-ის უბადოშ მაკეთებელეფიშ ბოლო?

¹¹ რენანო სქან განს თეცალ კათა? ალბათ იჸინა თეცალეფი. გლახა თვისებეფიშ კათა ირდიხას რე. თენა თის ნიშნენს ნამდა, ღორონთი მალას მიჩომილუანს თინეფშო. ბიბლია იჩიებ: „მუჟამს დოლოცალო გეულა უბადოეფი დო უბადოშ მაკეთებელეფ გოფალნან, სამუდამოთ მისპუნა თინეფი“ (ფსალმუნი 92:7).

12, 13. მუჭო ქიმიძინ რჩქინაქ „ბოლო დროს“?

¹² მუჭოთ ბიბლიას რე წინასწარნარაგადა, ბოლო დღალეფს მართალო ბრელ გლახა მუთმოხვადუ. მარა  თე აბორჯებულ ქიანას იეჰოვაშ თაყვანიშმცემელეფშენ ხოლო ისრულებ სახიოლო წინასწარნარაგადუეფი.

¹³ „ქიმიძინანს ჭეშმარიტ რჩქინა“, — წინასწარნარაგადა რდუ ბიბლიაშ წიგნ „დანიელს“. მუჟამ მოხვადუდ თენა? „ბოლო დროს“ (დანიელი 12:4). განსაკუთრებით 1914 წანაშე იეჰოვა ოხვარ, უჯგუშო ქიგეგან ბიბლია თინეფქ, მიდგას შურ დო გურით ოკო თიშ მსახურება. თეშ შედეგო, თინეფქ ქიგეგეს ჭეშმარიტება ღორონთიშ სახელიშ დო თიშ განზრახვაშენ, იესო ქრისტეშ მსხვერპლიშ, ღურელეფიშ მდგომარეობაშ დო გათელებაშ გურშენ. იეჰოვაშ თაყვანიშმცემელეფქ ქიდიგურეს, მუჭო ოკო იცხოვრან ღორონთიშ მოსაწონო. თეცალ ცხოვრებათ მუნეფით ბედნერეფ რენა დო ღორონთის ხოლო განადიდენა. თინეფქ უჯგუშო ქიგეგეს, მუ როლს ასრულენს ღორონთიშ სამეფო დო მუჭო გიშანწყუნს თინა ამდღარ მდგომარეობას. მუს ოკეთებაფუანს თეშ რჩქინა თინეფს? თე კითხვაწკუმა დაკავშირებულ რე ხოლო ართ წინასწარნარაგადა, ნამუთ ბოლო დღალეფს ისრულებუ.

14. მუ მაშტაბით მეურს ღორონთიშ სამეფოშენ სახიოლო ამბეშ ქადაგება დო მი ქადაგენს?

¹⁴ „თე სახიოლო ამბეს სამეფოშ გურშენ იქადაგენა მთელ მსოფლიოს“, — თქუ იესოქ, მუჟამს წინასწარ რაგადანდუ თე „ქიანაშ აღსასრულიშ“ გურშენ (წეკითხი მათეშ 24:3, 14). მთელ მსოფლიოს სახიოლო ამბეს სამეფოშ გურშენ 230-შე მეტ ქიანას ოშობით ნინაშა ქადაგენა. მილიონობით იეჰოვაშ მოწმე გურგედვალირო უქადაგენს ხალხის, მუ რე ღორონთიშ სამეფო, მუს აკეთენს თინა დო მუ მიმეთხუებნა, სამეფოშ ჭყოლოფუათ მიბღათ ღორონთიშ ხვამან. თე სახიოლო ამბეშ მაქადაგებელეფი „ირ რჯულშე დო ტომშე, ხალხშე დო ნინაშე“ რენა (გამოცხადება 7:9). მოწმეეფი უფასოთ ოგურუანა ბიბლიას მილიონობით ხალხის, მიდგას ოინტერეს, ქიგეგას, მუს ოგურუანს ბიბლია სინამდვილეს. მართალო სარკოთ ისრულებ ქადაგებაშ გურშენ წინასწარნარაგადა, თით უმოსო, იესოშ  სიტყვეფს გურს ქუგუჩანთ-და, ნამდა ჭეშმარიტ ქრისტიანეფს ირ კოჩ გიჯოგუანდუნ! (ლუკა 21:17).

15. ა) ქორჯერსო, ნამდა ნამდვილო ბოლო დღალეფს ფცხოვრენთინ? გენწყი. ბ) მუს ნიშნენს „აღსასრულ“ ღორონთიშ მოწინააღმდეგეეფშო დო თინეფშო, მით ომორჩილ ღორონთიშ სამეფოშ მართველობას?

¹⁵ ამდღა ჩქინ თოლიშ წოხლე თესხი ბიბლიურ წინასწარნარაგადა ისრულებ! ვათანხმუქო თის, ნამდა ნამდვილო ბოლო დღალეფს ფცხოვრენთინ? მუჟამს იეჰოვა სახიოლო ამბეშ ქადაგებას დასაბაღო ქიმირჩქინანსინ, აღსასრულ აუცილებერო ქუმურს (მათე 24:14). „აღსასრულ“ რე თი დრო, მუჟამს იეჰოვა დედამიწას უბადობას მოსპუნს. იეჰოვა იესოს დო მუშ ძალიერ ანგელოზეფს გიმირინუანს, განადგურას არძა, მით შეგნებულო ოწინააღმდეგ თის (2 თესალონიკელები 1:6—9). სატანა დო მუშ დემონეფს ხალხიშ ჩილათა ვეშიალებედან იჸი. თეშ უკულ ღორონთიშ სამეფო ხვამა დო ჯგირობუას ვემიარკენს თინეფს, მით ომორჩილ თიშ სამართლიან მართველობას (გამოცხადება 20:1—3; 21:3—5).

16. მუშ კეთება იჸუაფუდ ჭკვერული?

¹⁶ სატანაშ ქიანაშ აღსასრულ ხოლოს რე, ათეშგურშენ ოკო ქოპკითხათ ჩქინ დუდის: „მუ ოკო ვაკეთე?“. ჭკვერულ იჸუაფ, მეტ ქიგებგათ იეჰოვაშენ დო მუდგას თინა ითხინსინ თიშენი (იოანე 17:3). გურგედვალირო იგურე ბიბლია. დეახლოვი თინეფს, მით ოცადუ, იცხოვრას იეჰოვაშ მოსაწონო (წეკითხი ებრაელეფიშ 10:24, 25). გეჩინებაფე იეჰოვა მუშ სიტყვაშ დოგურაფათ დო დოთირე სქან ცხოვრება ღორონთიშ მოსაწონო (იაკობი 4:8).

17. მუშენ იჸუაფ უბადობაშ მოსპუალა ბრელშო მოულოდნელი?

¹⁷ იესოქ თქუ, ნამდა ბრელ ვედეჯერენდუ, ბოლო დღალეფს ფცხოვრენთინ თის. უბადობაშ მოსპუალა უცბას დო მითინ ველუნ თეშ იჸუაფ. ბრელშო თენა თიცალ მოულოდნელ იჸი, მუჭოთ მახინჯიშ მოულა სერით (წეკითხი 1 თესალონიკელეფიშ 5:2). იესოქ გუმაფრთხილეს: „მუჭოთ ნოეშ  დროს რდუნ, თიშნერო იჸუაფ თიმწკუმა ხოლო, მუჟამს კოჩიშ სქუა იჸი მოულირ. მუჭოთ დიდწყარალაშ მულაშა ჭკომუნდეს, შუნდეს, ოსურ მოჸუნდეს დო ითხუაფდეს თი დღაშა, სოიშა ნოე კიდობანშა მინიშუ დო მუთუნ ვანარღუდეს, სოიშა დიდწყარალაქ ვა მორთუ დო არძა ვეღუნ, თაშ იჸუაფუ თიმწკუმა ხოლო, მუჟამს კოჩიშ სქუა იჸი მოულირი“ (მათე 24:37—39).

18. იესოშ ნამ გაფრთხილება ოკო გებგონუათ?

¹⁸ იესოქ მუშ მოწაფეეფს უწუ: „ქიდეკვირით თქვან დუდის, ნამდა გურქ ვედგემონკან გინოჸუნელ შუმა-ჭკომუათ დო ირდღაშ ოსოფინალით დო ველუთინ თეშ რაგვიცალო ვეგგანთხან თი დღაქ, მუშენდა თინა დედამიწაშ არძა მახორუს გიანთხუ დუდს. თაშ ნამდა, კურცხას რდათ დო ირიათო თიშ ხვეწინს რდათ, ნამდა დუდ გინიტუათ ირფელშე, მუდგაქ ოკო მოხვადას დო [ღირსუანო] ქაწუდირთათ კოჩიშ სქუას“ (ლუკა 21:34—36). ჯგირ იჸი ქიგეგონუათ იესოშ სიტყვეფი. მუშენდა თინეფი, მით იჸუაფუ იეჰოვა ღორონთიშ დო „კოჩიშ სქუაშ“, იესო ქრისტეშ მოსაწონ, გინასკიდუნა აღსასრულიშ დროს დო მარადიულო იცხოვრენა ახალ ქიანას. თე დრო ნამდვილო ხოლოს რე! (იოანე 3:16; 2 პეტრე 3:13).