წმინდა შურ რე ღორონთიშ მოქმედ ძალა (მიქა 3:8; ლუკა 1:35). ღორონთ წმინდა შურს გიმირინუანს, ნამდა შეასრულას მუშ განზრახვა (ფსალმუნი 104:30; 139:7).

 ბიბლიას სიტყვა „შური“ თარგმნილ რე ებრაულ სიტყვაშე „რუახ“ დო ბერძნულ სიტყვაშე „პნევმა“. ხშირ შემთხვევეფს თე სიტყვეფ ნიშნენს ღორონთიშ მოქმედ ძალას — წმინდა შურს (დაბადება 1:2). მარა ბიბლიას თე სიტყვეფ შხვა მნიშვნელობათ ხოლო რე გიმორნაფილ:

•   სუნთქვა (აბაკუმი 2:19; გამოცხადება 13:15).

•   ბორია (დაბადება 8:1; იოანე 3:8).

•   სასიცოცხლო ძალა (იობი 34:14, 15).

•   ადამიანიშ განწყობა დო დამოკიდებულება (რიცხვები 14:24).

•   ღორონთ დო თიშ სულიერ ქმნილებეფ, ანგელოზეფ (1 მეფეები 22:21; იოანე 4:24).

 თე ჟიშე გიმოკოროცხილ მნიშვნელობეფ თოლშო უძირაფ რე, მარა შეულებ თიცალ შედეგეფ მიღას, მუთ არძას შეულებ ძირას. თეშნერო, ღორონთიშ წმინდა შურ „ქარბორიაცალო თოლშო უძირაფ დო ძალიერ რე“ (Vine’s Expository Dictionary of New Testament Words).

 ბიბლიას ღორონთიშ წმინდა შურ მოშინაფილ რე, მუჭოთ ღორონთიშ „ხელეფ“ ვარდა „კითეფ“ (ფსალმუნი 8:3; 19:1; ლუკა 11:20; ქეშუდარით მათეშ 12:28). მუჭოთ მოქანდაკე გიმირინუანს მუშ ხელეფს დო კითეფს, მუშ საქმეშ შეიოსრულებერო, თეშნერო ღორონთიქ ხოლო გიმირინუ მუშ წმინდა შურ, მუჟამსით:

•   გაჭყჷ სამყარო (ფსალმუნი 33:6; ესაია 66:1, 2).

•   ოჭარაფუ ბიბლია (2 პეტრე 1:20, 21).

•   ჯვეშ დროს მუშ მსახურეფს სასწაულეფ ოკეთებაფუ დო მეჩჷ ენთუზიაზმ ქადაგებაშო (ლუკა 4:18; საქმეები 1:8; 1 კორინთელები 12:4—11).

•   მეხვარ, ჯგირ თვისებეფიშ გავითარებას, თინეფს, მით ომორჩილუდ თის (გალატელები 5:22, 23).

წმინდა შურ ვა რე პიროვნება

 ბიბლია წმინდა შურს მიშინუანს, მუჭოთ თიშ „ხელეფ“, „კითეფ“ დო „სუნთქვა“, მუთ ოძირანს, ნამდა წმინდა შურ ვა რე პიროვნება (გამოსვლა 15:8, 10). მუჭოთ მოქანდაკეშ ხელეფს ვეშულებ გონებაშ დო სხეულიშ უმშო იმოქმედას, თეშნერო, ღორონთიშ წმინდა შურს ხოლო ვეშულებ თიშე დამოუკიდებელო იმოქმედას (ლუკა 11:13). თეს გეძინელ, ბიბლია ღორონთიშ წმინდა შურს ადარენს წყარს დო აკავშირენს რწმენა დო რჩქინაწკუმა. თე შედარება ხოლო ართშა ამტკიცენს, ნამდა წმინდა შურ პიროვნება ვა რე (ესაია 44:3; საქმეები 6:5; 2 კორინთელები 6:6).

 ბიბლიას ინოჭარილ რე იეჰოვა ღორონთიშ დო თიშ სქუაშ, იესო ქრისტეშ სახელ, მარა სოთინ ვა შეფხვადუთ წმინდა შურიშ სახელს (ესაია 42:8; ლუკა 1:31). მუჟამსით ქრისტიან წამებულ სტეფანეს სასწაულებრივ ხილუა უღუდ, თიქ ძირჷ ჟირ პიროვნება დო ვართ ხოლო სუმ. ბიბლია იჩიებ: „სტეფანექ, წმინდა შურით ეფშაქ, გეიჯინ ცაშა, ქოძირ ღორონთიშ დიდება დო იესო, ნამუთ თიშ მარძგვანშე გერდჷ“ (საქმეები 7:55). ზუსტას ღორონთიშ მოქმედ ძალაქ, წმინდა შურქ ოძირაფუ თე ხილუა სტეფანეს.

 არასწორ შეხედულება: „სულიწმინდა“ იგივე წმინდა შურ, რე პიროვნება დო სამებაშ ნაწილ, მუჭოთ თენა მოშინაფილ რე 1 იოანეშ 5:7 დო 8-ს (საქორთუოშ საპატრიარქოშ გიშაშქუმალა).

 სიმართლე: საქორთუოშ საპატრიარქოშ გიშაშქუმალას 1 იოანეშ 5:7 დო 8-ს ჭარჷ: „მუშენდა სუმ ამოწმენა ზეცას: მუმა, სიტყვა დო სულიწმინდა; დო თე სუმ ართ რენა. დო სუმ ამოწმენა დიხას“. მარა, მუჭოთ მკვლევარეფ იჩიებნა, თე სიტყვეფ მოციქულ იოანეს ვა უჭარ, ათეშენ ვა რე თინა ბიბლიაშ ნაწილ. ართ-ართ ბიბლეისტ ბრუს მეცგერ მუშ ნაშრომს «ტექსტუალურ კომენტარეფ ბერძნულ ახალ აღთქმაშე, ჭარუნს: „თე სიტყვეფ მოგონილ რე დო ოკო ვა ჭარდას ახალ აღთქმას“».

 არასწორ შეხედულება: ბიბლია წმინდა შურს აპიროვნენს, მუთ ოძირანს, ნამდა წმინდა შურ პიროვნება რე.

 სიმართლე: ბიბლია მინშა მართალო აპიროვნენს წმინდა შურს, მარა თენა ვა ნიშნენს, ნამდა თინა პიროვნება რე. ბიბლია სიბრძნეს, ღურას დო ცოდვას ხოლო აპიროვნენს (იგავები 1:20; რომაელები 5:17, 21). მაგალთო, ბიბლიას ბკითხულენთ, ნამდა სიბრძნეს უღჷ „საქმეეფ“ დო ჸუნს „სქუალეფ“; თეწკუმა ართო, ცოდვაშე ხოლო ბკითხულენთ, ნამდა თინა მიოჩილითუანს, ჸვილუნს დო გლახა სურვილეფს ურჩქინანს კოჩის (მათე 11:19; ლუკა 7:35; რომაელები 7:8, 11).

 თეშნერო, მოციქულ იოანექ, მუჟამსით იესოშ სიტყვეფიშ ციტირება აკეთ, გაპიროვნჷ წმინდა შურ დო თინა მიშინუ, მუჭოთ „მოხვარე“ („პარაკლეტე“), ნამუთ ამოწმენს, ხემძღვანელენს, იჩიებ, ირჩქილე, აცხადენს, ადიდენს დო ღებულენს. თიქ სიტყვა „მოხვარეშ“ აღმნიშვნელო გიმირინუ მამრობით სქესიშ ნაცვალსახელეფ (იოანე 16:7—15). თენა თიშენ აკეთ, ნამდა სიტყვა „მოხვარე“ (ბერძნულო „პარაკლეტოს“) მამრობით სქესიშ არსებით სახელ რე, ნამუთ ბერძნულ გრამატიკაშ მიხედვით მამრობით სქესიშ ნაცვალსახელს გიმოხანტუნს. მუჟამსით იოანექ წმინდა შურ მიშინუ, თიქ გიმირინუ საშუალო სქესიშ ნაცვალსახელ „პნევმა“ (იოანე 14:16, 17).

 არასწორ შეხედულება: წმინდა შურით ნათუა ოძირანს, ნამდა წმინდა შურ პიროვნება რე.

 სიმათრლე: ბიბლია მინშა გიმირინუანს „სახელს“, ძალაშ დო ავტორიტეტიშ ოძირაფალო (კანონი 18:5, 19—22; ესთერი 8:10). თეცალო, მუჟამსით იბჩიებუთ „კანონიშ სახელით“ ვა ბგულისხმენთ, ნამდა კანონ პიროვნება რე. პიროვნება, ნამუთ ინათუ „წმინდა შურიშ სახელით“ აღიარენს წმინდა შურიშ ძალას დო თიშ როლს ღორონთიშ ნებაშ შესრულებას (მათე 28:19).

 არასწორ შეხედულება: იესოშ მოწაფეეფს დო ჯვეშ დროს მახორუ ქრისტიანეფს ჯერდეს, ნამდა წმინდა შურ პიროვნება რე.

 სიმართლე: თეს ვართ ბიბლია ამტკიცენს დო ვართ ისტორია. „ენციკლოპედია ბრიტანიკა“ იჩიებ: „ახ. წ. 381 წანას კონსტანტინოპოლს ... წმინდა შურს პიროვნებაშ მნიშვნელობა მიანიჭეს“. თე დროშო მოციქულეფიშ ღურაშე 250-შე მეტ წანა რდუ მიკულირ.