An̈isany tsy itiavanolo Vavolombelon̈o Jehovah letrizay, iro man̈araka raha koran̈iny Baiboly, ke tsy man̈eky ampidiran̈a lio foeky. (Asan’ny Apostoly 15:29) Maro koa dokotera tsy nan̈eky hevitrindro io taloha, fotony iro mivolan̈a fa fampidiran̈a lio zaraiky fo fitahan̈a farany tsara.

Izioty fo, efa mahaimaro dokotera man̈eky fa tsara ankitin̈y fitahan̈a tsy ampiasan̈a lio io.

Tamy 2013, nisy gazety araiky Stanford Medicine Magazine, nikoran̈a raha momba lio io fo. Tapany amizio, lohateninany “Mahaimaro Olo Miala amy Mahazatra ke Tsy Mety Ampidiran̈a Lio.” Karaha ty nivolan̈iny Sarah Williams, nanoratra izio: “Izikoa atao konty, amy lopitaly jiaby erantany, tan̈atiny folo taon̈o tato, maro dokotera tia mampiditry lio aminolo marary, na amy tran̈o fandidian̈a zen̈y na amy tran̈o fandriany marary.”

Koran̈iny gazety io koa fa misy olo araiky, Patricia Ford an̈arany, an̈isany pan̈orin̈y ndreky pitantan̈a “Foibeny Fitahan̈a Ndreky Fandidian̈a Tsy Ampiasan̈a Lio, amy Lopitaly Pennsylvania”, nivolan̈a karaha ty: “Tsy miala aminy eritreritrindro dokotera aby io fa olo araiky koa tsy ampy lio, ke tsy ampidiran̈a lio, maty edy. Efa lio fo zen̈y edy hevitry farany hitandro. Raha hita fo, a aminy ankamarozany marary, tsy marin̈y raha zen̈y.”

Isaka taon̈o, Dokotera Ford mitaha Vavolombelon̈o Jehovah kadiriny 700. Volan̈iny karaha ty: ‘Maro dokotera nikoran̈a taminaka diso hevitry, fotony iro nivolan̈a fa izikoa olo marary tsy ampidran̈a lio, izy efa tsy avotro eky. Ndray zaho koa taloha mba nieritreritry karaha zen̈y. Tsy elanizin̈y fo, efa hitako edy fa kaiky misy tekniky tsotra fo mety itahan̈a olo marary.’

Taminy Aoty 2012, gazety Archives of Internal Medicine nan̈ambara valiny fandinihan̈a natao tan̈atiny 28 taon̈o, momba olo nididian̈a fô tamy lopitaly araiky. Nambarany fa Vavolombelon̈o Jehovah nididian̈a tsy natao lio beriny malaky janga, toizay olo aby nampidiran̈a lio. Mora tahan̈a koa iro, baka io tsy atahoran̈a ho maty tampoko, izikoa fa vita didy. Na olo ampidiran̈a lio, na izy tsy ampidiran̈a lio, samy mety ho velon̈o fo iro io an̈atiny 20 taon̈o afarany nandidian̈a iro.

Nisy gazety araiky koa, The Wall Street Journal, niboaka tamy 8 Avrily 2013, nivolan̈a karaha ty: “Efa tan̈atiny taon̈o maro zay nan̈anovan̈a fandidian̈a tsy ampiasan̈a lio io taminolo aby tsy man̈eky hampidiran̈a lio, baka amy raha inoany. Mahaimaro fo izioty lopitaly man̈eky han̈ano zen̈y, fotony izio mampihen̈y vola lanindro. Dokotera pandidy aby io mivolan̈a fa mandany vola fividianan̈a lio ndreky fikarakaran̈a izio, baka io fikajian̈a izio ndreky fampidiran̈a izio aminolo marary. Malaky miboaka lopitaly koa olo marary tsy ampidiran̈a lio, fotony iro tsy atahoran̈a avoany aretin̈y hafa ndreky raha ratsy maro azo baka amy lionolo.”

Tsy boriny Robert Lorenz, sefony sampandraharaha miandraikitry lio amy lopitaly araiky a Cleveland, Etazonia koa nivolan̈a karaha ty: “Anao mieritreritry fa mampatsara olo marary io ampidiran̈a lio ... kanefa izikoa fa mandeha fotoan̈a, hita tsarabe fa ten̈a tsy nahatsara izy natao izin̈y.”