Masony kananavy aby io mahita tsarabe. Kanefa izikoa fa alin̈y andra ke mahiziky be in̈y, ankamarozandro io mandefa onjampeo mba hahaizandro ino aby raha man̈odidin̈y iro ao, avio farifary aia misy raha aby io. Feo alefandro in̈y baka io mbala mimpody amindro fo. Ke elan̈elan̈any fotoan̈a handihanany feo in̈y ndreky fotoan̈any himpodiananizio amindro ahaizandro farifary aia misy raha araiky. Ohatra, baka aminy halakisany fikopakopakany elatrany biby madiniky araiky ahaizany kananavy sasany asa izio moko sa vangory.

 Diniha hely baka: Ankamarozany kananavy man̈aboaka feo maresaka be baka amy lohatraokonany ao, ke izio miboaka amy vavany na aminy lavakoron̈onany. Baka io amy zay, sofin̈y benany in̈y hampiasainy hitandrin̈esan̈a tsarabe akony feo in̈y izikoa fa loso amy raha man̈odidin̈y izy an̈y izio. Ke baka amy feo mimpody in̈y man̈ampy izy hahazoazo antsain̈y raha misy man̈odidin̈y izy. Hainy kananavy io man̈avaka farifary aia toeran̈a misy raha araiky, avio karakory habosany ndreky halavirany raha io miala amy tany misy izy iô, ndray misy kananavy hafa koa ankilanany iô mandefa feo.

 Tokony ho marin̈y tsarabe kontikonty ataony kananavy izikoa fa mandefa feo ndreky mitandren̈y izio mimpody aminany. Fotony izikoa diso hely fo izio, ndray segondy hely fo, efa mety ho vosotro edy rembinany fotony tara izy vo navy, ke na efa amy 17 santimetara tsy avian̈a amy remby io fo izy, raha io efa loso. Pikaroko sasany mivolan̈a fa “karaha tsy marin̈y” izikoa raha araiky mahavita man̈ano konty marin̈y tsara firaka amy segondy jiaby zen̈y. Kanefa izikoa fa natao eksperiansy, hita fa vitany kananavy aby io mikonty firaka aminy ampahazato tapitrisa segondiny fotoan̈a impodianany feo io aminany an̈y. Ke zen̈y man̈ampy izy hahay elan̈elany tany misy izy ndreky raha araiky. Tsy diso foeky kontinany ndray milimetara araiky na latsakanizen̈y.

 Pikaroko aby io nan̈amboatra tongozo elektroniky afaka mandefa feo ndreky mikonty impodianany feo io, mba hahaizanolo jamba io raha man̈odidin̈y izy. Tongozo io man̈ampy olo jamba hiala amy raha mety hikon̈o lohanany, an̈isanizen̈y vodindraha. An̈isany nan̈amboatra tongozo io Brian Hoyle ndreky Dean Waters. Karaha ty nambarandro: “Tamy zahay nan̈amboatra tongozo io, zahay nangala tahaka fahaizany kananavy raha baka aminy onjampeo.” Tongozo kananavy ten̈a an̈aran̈a fikahian̈a izio.

 Akory hevitrinao? Navinavy hoazy fo ma fahaizany kananavy raha baka aminy onjampeo, sa izio nisy namoron̈o?