Vaovao Tsara Nisoratin’i Matio 4:1-25
4 Tafaran’izen̈y, Jesosy nindesin’ny fan̈ahy masin̈y tamy tany paiky tan̈y. Tan̈y Devoly nitsapa jery izy.
2 Tan̈atin’ny 40 andra ndreky 40 alin̈y izy nifady hanin̈y,* ke silaon̈o mare izy.
3 Navy amizay Mpitsapa jery nivolan̈a taminany karaha ty: “Izikoa anao zanakan’ny Zan̈ahary, ivoà môfo vato aby io.”
4 Fa ho Jesosy: “Ty raha efa voasoratra: ‘Tsy hanin̈y zaraiky fo ny raha mahavelon̈o olombelon̈o, fa volan̈a jiaby baka amy vavan’i Jehovah koa.’ ”
5 Jesosy baka tiô nindesin’ny Devoly tamy tanàna masin̈y, aviô izy napetrany tamy faritry farany an̈abo amy riban’ny* tempoly.
6 Ke ho izy tamy Jesosy: “Izikoa anao zanakan’ny Zan̈ahary, mitandatsaha ambany arỳ, fôtony ty raha efa voasoratra: ‘Izy handefa anjelinany aby io han̈ampy anao’, ke ‘irô hitondra anao amy tan̈anandrô, baka vitinao tsy hantreky amy vato.’ ”
7 Ho Jesosy taminany: “Mbala voasoratra fo koa: ‘Anao aza mitsapa jery Jehovah Zan̈aharinao.’ ”
8 Aviô izy nindesin’ny Devoly tamy bongo an̈abo mare, ke naboakan’ny Devoly izy fanjakan̈a jiaby misy amy donia ty ndreky voninahitrindrô io.
9 Ho izy tamy Jesosy: “Hamiako anao aby raha jiaby io, izikoa anao mankôhoko indraiky fo man̈oloan̈a zaho.”
10 Kanefa ho Jesosy taminany: “Mandihana an̈y anao Satana, fôtony ty raha efa voasoratra: ‘Anao tsy maintsy mankôhoko man̈oloan̈a Jehovah Zan̈aharinao, baka iô izy zaraiky fo tsy maintsy an̈anaovanao fanompoan̈a masin̈y.’ ”
11 Ke niala taminany tiô Devoly, baka iô nisy anjely navy nikarakara izy.
12 Izikoa fa ren̈in’i Jesosy fa Jaony nisambôrin̈y, lôso izy nandeha ta Galilia.
13 Tafaran’izen̈y izy niala ta Nazareta, baka iô izy nandeha nipetraka ta Kapernaomy, tanàna amôron-dranomasin̈y amy faritry Zebolona ndreky Naftaly.
14 Ke tanteraka raha nirahin̈y nambaran’ny mpaminan̈y Isaia ty:
15 “Anao Galilia, tany pitrahan’olo baka amy firenena hafa, tanin’i Zebolona ndreky tanin’i Naftaly; amôron’ny lalan̈a mandeha an-dranomasin̈y tany misy anao sady andaforehin’ny Ten̈aranon’ny Jordany!
16 Olo nipetraka tamin’ny hiziky nahita hazavan̈a mazava be, aviô nisy hazavan̈a nipiriaka tamindrô olo aby nipetraka tamy faritry misy kandindon̈on’ny fahafatesan̈a.”
17 Nanomboko tamy zen̈y, Jesosy nitory karaha ty: “Anarô mibibaha, fôtony efa marikitry Fanjakan̈an’ny lan̈itry.”
18 Tandraraiky, tamy Jesosy nandeha tamy sisin’ny Ranomasin̈in’ny Galilia in̈y, izy nahita olo mpirahalahy: Simona na koa Petera, aviô Andrea rahalahiny. Irô tamin’io nan̈atsipy haratondrô tan-dranomasin̈y, fôtony irô mpan̈arato.
19 Ho izy tamindrô: “Anarô man̈araha zaho, fa anarô hataoko mpan̈arato olo.”
20 Direkty nambelandrô haratondrô, aviô irô nan̈araka izy.
21 Izy koa fa nanohy dianany, nahita olo aroe mirahalahy hafa koa izy: Jakoba ndreky Jaony, zanakan’i Zebedio. Irô tamy zen̈y tan̈atin’ny sambo niaraka tamy babandrô, nan̈amboatra raha robaka tamin’ny haratondrô. Jesosy nikaiky irô,
22 ke direkty nialandrô sambondrô ndreky babandrô, aviô lôso irô nan̈araka izy.
23 Izy baka iô nandeha nitety faritry Galilia jiaby, nampianatra tamy synagoga ndreky nitory vaovao tsara* momba Fanjakan̈an’ny Zan̈ahary, baka iô nampajanga karazan̈an’ny aretin̈y ndreky antsa isan-karazany.
24 Lazanany niparitaka eraka faritry Syria jiaby, ke nindesindrô taminany lan̈iany olo nijaly ndreky nanehotehoko mare baka tamin’ny aretin̈y isan-karazany, baka iô lan̈iany olo nisaraon̈an’ny demony ndreky voan’ny aretim-bôron̈o, aviô olo tsy afaka nandeha. Nitahany aby irô jiaby.
25 Ke nisy olo marobe baka Galilia, Dekapolisy,* Jerosalema, Jodia ndreky baka tandaforehin’ny Jordany nan̈araka izy.
Lamariky amy Pazy Ambany
^ Na: “nifehy.”
^ Na: “tamin’ny arofanin̈in’ny.”
^ Na: “evanjely; filazantsara.”
^ Na: “Faritry Misy Tanàna Folo.”
