OLO FIVADIANY
1: Aza Mieritreritry Hisaraka Foeky
KARAKORY MA ZEN̈Y?
Izikoa olo fivadiany samy tapakevitry han̈aja voady nataondro, iro tsy hieritreritry hisaraka zen̈y foeky. Hifampatoky fo iro, ke tsy hifampiala foeky na an̈atiny sarotro.
Misy olo fivadiany efa tihisaraka mare fa tsy imboany namandro na havandro na olo miaraka miasa amindro. Fa iro fivadiany koa mifankatia ndreky mifan̈aja, iro tsy hieritreritry hisaraka zen̈y foeky.
TOROHEVITRINY BAIBOLY: “Lelahy tsy tokony hiala vadiny.”—1 Korintianina 7:11.
“Anao koa man̈aja voady nataonao, anao tsy ho mora meloko amy vadinao. Tsy ho sarotro aminao halaky hamela helokonany ndreky hiala tsin̈y aminany. Izikoa fa misy problemo, mifen̈a fo anaro mamaha izy fa aza atao raha hampisaraka anaro izio.”—Micah.
NAN̈INO RAHA ZEN̈Y TEN̈A ILAIN̈A?
Olo fivadiany koa tsy tapakevitry han̈aja voady nataondro, iro hitady fomba hisarahan̈a fo. Iro mety hivolan̈a karaha ty: “Tsy fandanja foeky zahay.”
“Misy olo mbala vo miditry amy vadian̈a fo fa mieritreritry hisaraka edy koa fa tsy fan̈araka. Iro tsy tapakevitry han̈aja voady nataondro foeky.”—Jeanne.
INO HEVITRY?
MANDINIHA HELY
Anaro koa fa mankany mare...
Mahatsiaro nanen̈iny ma anao nanambady vadinao io?
Asa anao man̈inofy miaraka aminolo hafa?
Asa anao mivolan̈a karaha ty: “Anao ialako” na “Zaho sambaranao tsy mahita olo tia zaho”?
Izikoa ia amalianao araiky amindro fan̈ontanian̈a aby io na iro jiaby, anao mila man̈ano raha malaky.
DINIHA MIARAKA AMY VADINAO
Nan̈ino ma atsika ty e? Tsao atsika ty efa tsy tapakevitry han̈aja voady nataontsika in̈y e?
Ino raha mety hataontsika baka atsika hahavita han̈aja voady nataontsika in̈y?
SOSOKEVITRY
Andifasa mesazy izy ndraikindraiky, ke sorata ao fa anao tia izy
Asiava sariny vadinao amy birônao
Anao koa fa ampiasan̈anao an̈y, na nisy dia nataonao, aza adin̈a mikaiky izy amy telefony
TOROHEVITRINY BAIBOLY: “Olo koa fa natambatra Zan̈ahary lazioga araiky, tsy tokony hisarahinolo eky.”—Matio 19:6.
