Zaho teraka ta Székesfehérvár a Hongrie. Izio toeran̈a ten̈a manan̈a tantaranany, fotony efa mandilatrany 1 000 taon̈o zay nisiany tanàna io. Fa malahelo zaho izikoa fa mahatsiaro vokatra ratsiny Ady Lehibe II tamy toeran̈a io.

Tamy zaho mbala hely, dadiko ndreky dadilahiko nitarimy zaho. Iro mbala tadidiko fo, sirto Elisabeth dadiko io. Efa baka taminany edy baka nahavy zaho nino Zan̈ahary. Letry zaho telo taon̈o, isaka ariva, zahay niaraka nan̈ano vavaka nampianariny Tompo in̈y. Fa efa tamy zaho hely tsy feno 30 taon̈o vo ten̈a azoko dikany vavaka io.

Papako ndreky mamako niasa fo, na matsan̈a na alin̈y. Mba tiandro baka hahavoavory vola hividianan̈a tran̈o. Zen̈y nahavy iry dadiko nikarakara zaho tamy zaho mbala hely. Fa isaka sabotsy fanjava misasaka in̈y, zahay jiaby fianakavian̈a mivory miaraka mihina. Tiako mare tamy zen̈y.

Taminy 1958, tanteraka nofinofindry olobeko. Nahavita nividy tran̈o iro. Ela ny ela eky fa hiaraka hipetraka zahay telo mianaka. Aravoan̈anaka! Fa raha zen̈y tsy nahadin̈y ela, fotony tsiota fanjava tafaranizin̈y, Papa natiny kansera.

Nalemy troko mare zaho. Mbala tadidiko fo zaho nivavaka: “A Zan̈ahary e, zaho in̈y nangataka anao mba han̈avotro Papa. Zaho kony mila izy ay. Nan̈ino ma vavakanaka tsy nivalianao?” Tiako ho hay aia tany misy papako ziô: Izy ma nanonga andan̈itry an̈y sa izy efa tsisy eky mandrakizay? Nan̈iry oe zaho nahita tsaiky mbala nisy papa.

Tan̈atiny taon̈otaon̈o, hely tsy ho isanandra zaho nandeha tamy fasan̈any papako. Tio zaho nandohaliky, baka io nivavaka: “A Zan̈ahary e, mba ambarà zaho aia papako.” Nan̈ontaniako tamy vavaka koa antony namoron̈any Zan̈ahary olo.

Tamy zaho 13 taon̈o, zaho nanapakevitry hianatra volan̈a aliman. Maro baka boky amy volan̈a aliman, ke zaho nieritreritry fa ao mety hahitako valiny fan̈ontanian̈anaka. Taminy 1967, zaho nandeha nianatra ta Iéna. Izio tanàna an Allemagne Antin̈iana. Nazoto mare zaho namaky iro boky nisoratiny filozofy aby io, sirto iro mikoran̈a momba antony nisiany fiain̈ana. Nahita raha nahalian̈a ndraiky zaho tao, fa ndray zen̈y, tsisy araiky tamy boky aby io ten̈a nahafapô zaho. Ke zaho nivavaka fo baka hahazo valiny fan̈ontanian̈anaka.

Taminy 1970, zaho nimpody ta Hongrie. Teto zaho fanojy Rose. Izy baka tio nanjary vadiko. Tamy fotoan̈a zen̈y, Hongrie tany koministy. Ke tafara heliny mariazinay, zahay nandeha nilefa ta Autriche. Fa ny ten̈a programonay, handeha hifindra amindry zamanay a Sydney, a Australie an̈y.

Tsy ela heliny navianay ta Autriche, zaho efa nahita asa edy. Tandraraiky, nisy piaramiasa taminaka zay nivolan̈a fa an̈atiny Baiboly ao mety hahitako valin̈y fan̈ontanian̈anaka jiaby. Ke zaho namezany boky aroe mikoran̈a momba Baiboly. Betibetiky fo efa voavakiko edy iro in̈y. Tihahay raha maromaro momba izio zaho ke zaho nanoratra tamy Vavolombelon̈o Jehovah, zaho nangataka boky hafa tamindro. Haiko baka fa izio bokindro.

Taminy andrany aniverserany mariazinay voanalohany, nisy tsaiky lelahy autrichien, Vavolombelon̈o Jehovah zay navy taminay tao han̈atriky boky nangatahiko aby in̈y. Avio izy nan̈ontany tsao zaho man̈iry hianatra Baiboly. Ke zaho nan̈eky. Nazoto mare zaho, ke natao indroe isaka herin̈iandra fianaran̈a, sady taminio nahadin̈y lera efatra!

Ravoravo mare zaho koa fa nampianariny Vavolombelon̈o Jehovah Baiboly. Karaha nan̈inôfy in̈y zaho izikoa fa nan̈aboahandro baka tamy Baiboliko tamy volan̈a hongroà tao fa Jehovah an̈arany Zan̈ahary. Efa 27 taon̈o zaho zay nivavaka, fa zaho mbala tsiary naharen̈y an̈arany Zan̈ahary foeky nata indraiky. Rikian̈a zaho fa navoavaly mazava tsara baka tan̈atiny Baiboly tao fan̈ontanian̈anaka. Ohatra ziô, nanjary haiko fa olo maty kaiky efa tsisy raha hay eky, fa mira olo mandry mare in̈y. (Mpitoriteny 9:5, 10; Jaona 11:11-15) Nianarako koa fa Baiboly mampan̈anten̈a fa aminy hoavy ho hisy donia vaovao, ke amy zen̈y “fahafatesan̈a tsy ho hisy eky.” (Apokalypsy 21:3, 4) Zaho man̈anten̈a mbala hahita papako ndraiky, fotony amy zen̈y olo maty aby io mbala himpody hivilomin̈y.​—Asan’ny Apostoly 24:15.

Nazoto niaraka nianatra taminaka koa Rose. Nandeha mare fianaran̈anay, ke tan̈atiny fanjava aroe fo efa tapitry edy boky nianaranay. Zahay koa nan̈aton̈o fivorian̈a jiaby nataony Vavolombelon̈o Jehovah. Rikian̈a oe zahay nahita iro mifankatia, mifan̈ampy sady miray sain̈y.​—Jaona 13:34, 35.

Taminy 1976, zahay fivadiany nahazo lalan̈a nifindra ta Australie. Ke niaraka zahay navy tan̈y, efa nitady Vavolombelon̈o Jehovah edy. Zahay niraisindro tsara. Taminy 1978, zahay nanjary Vavolombelon̈o Jehovah.

Hitako eky ziô valiny fan̈ontanian̈a jiaby nampijaly jerinaka rango fa ela. Zaho nanjary nifandray marikitry tamy Zan̈ahary. Izy ziô efa karaha Babako in̈y. (Jakoba 4:8) Efa hitako ela aby hifanojy amy papako ndraiky amy donia vaovao an̈y, lera izy fa mimpody hivilomin̈y.​—Jaona 5:28, 29.

Taminy 1989, zahay fivadiany nanapakevitry himpody ta Hongrie. Zahay baka tihikoran̈a raha nianaranay io tamindry havanay ndreky ry namanay, baka io taminolo hafa koa. Efa mandeha anjatony ziô olo nampianarinay Baiboly. Mandilatrany 70 tamindro io efa loso panompony Jehovah, an̈isanizen̈y mamako.

Tan̈atiny 17 taon̈o zaho nivavaka baka hahita valiny fan̈ontanian̈anaka. Fa efa 39 taon̈o koa ziô loso, zaho mba efa afaka mivavaka karaha ty: “Mersy anao Babako tiako andan̈itry an̈y namaly vavaka nataoko tamy zaho mbala hely in̈y ay!”