Tamy sabotsy 5 Oktobra 2013, olo 257294 tamy tany 21, nan̈araka fivorian̈a faha-129 nataony Watch Tower Bible and Tract Society of Pennsylvania. Sasany taminolo aby io nan̈aton̈o tamy tany nan̈anovan̈a izio tan̈y, fa sasany nan̈araka taminy Internet. Koa fa vita fivorian̈a io tamy dimansy, nipody nalefa ndraiky video nisy fivorian̈a io taminy Internet. Izikoa atambatra isanolo naharen̈y ndreky nahita fivorian̈a io, nisy 1413676, tamy tany 31. Olo nan̈araka fivorian̈a fatao isaka taon̈o io mbala maromarony olo nan̈aton̈o fivorian̈a nataony Vavolombelon̈o Jehovah ta Mexique ndreky Amérique Centrale taminy 28 Avrily 2013, fotony olo 1327704 fo nan̈araka izio.

Rango tamy 1920, Vavolombelon̈o Jehovah nampiasa fitaovan̈a fampifandraisan̈a, karaha ataony telefony ndreky radio. Aminandra izioty, efa maro olo mampiasa Internet, ke ndray olo farany lavitry ambony tany mahavita mitandren̈y ndreky mizaha raha misy amy fotoan̈a an̈anovan̈a izio, na efa afaranizen̈y. Misy Vavolombelon̈o Jehovah araiky mipetraka a Etazonia an̈y, William an̈arany, nan̈araka programony fivoriambe natao ta Richmond tamy telefony, tamy taon̈o 1942. Nan̈araka fivorian̈a fatao isaka taon̈o io izy tamy 2013, ke karaha ty nivolan̈iny: “Mazava tsara programo jiaby, fotony hitanao olo man̈azava raha io. Mbala tsiary nisy fivorian̈a karaha in̈y rango zay!”

Amy sampan̈a Vavolombelon̈o Jehovah maro izioty, efa misy olo mikarakara fandifasan̈a video io. Lera maro lanindro tamy zen̈y. Tamy fivorian̈a io, nisy teknisianin̈y amy foibe a Brooklyn, New York, nandamin̈iny fampifandraisan̈a programo io. Tsy mira leranolo amy tany 31 io, ke tsy maintsy niasa matsan̈a alin̈y iro teknisianin̈y aby io, tamy sabotsy io ndreky dimansy. Karaha ty nivolan̈iny Ryan, an̈isanolo nan̈aramaso fampifandraisan̈a programony fivorian̈a io: “Marin̈y ndraiky fa zahay tsy mandry alin̈y matsan̈a, fa zahay fo ravoravo mare, fotony olo maro manjary mahavita man̈araka programo jiaby amy tany misy iro an̈y.”