Ngani Syambone Syaŵalembile Mateyu 26:1-75
-
Ŵakutaga mbopesi akulangana yakumwulaga Yesu (1-5)
-
Yesu akumtaga mawuta gakununjila mnope (6-13)
-
Pasika jwakumalisya soni kupelechedwa kwa Yesu (14-25)
-
Kutanda kwa mwambo wa Chakulya Chaligulo cha Ambuje (26-30)
-
Yesu akusala yakuti Petulo chachimkana (31-35)
-
Yesu akupopela mu Getisemane (36-46)
-
Yesu akumkamula (47-56)
-
Kwimbidwa magambo mu Luŵala Lwekulungwa lwa Ayuda (57-68)
-
Petulo akumkana Yesu (69-75)
26 Sambano Yesu paŵamalisisye kuŵecheta yindu yosopeyi, ŵasalile ŵakulijiganya ŵakwe kuti,
2 “Jemanja mkumanyilila kuti kusigele masiku gaŵili kuti chisangalalo cha Pasika chitendekwe, kaneko Mwanache jwa mundu chapelechedwe kuti amkomele pachitela.”
3 Sambano ŵakulolela ŵakutaga mbopesi soni achakulungwa ŵasongene mu luŵala lwa jwamkulungwa jwa ŵakutaga mbopesi, lina lyakwe Kayafa.
4 Jemanjaji ŵalangene yakuti amkamule* Yesu mwakalamuka kuti amwulaje.
5 Nambope, jemanjajo ŵaŵechetaga kuti, “Tukamkamula pa lisiku lya chisangalalo, kogopela kuti ŵandu mpaka atandisye yachiwawa.”
6 Yesu paŵaliji ku Betaniya ku nyumba ja Simoni jwamatana,
7 jwamkongwe jwine jwayiche kwa jwalakwe ni libotolo* lya mawuta gakununjila mnope soni gakudula. Ni jwatandite kumtaga Yesu mawutago mumtwe paŵaliji mkulya.
8 Nambo ŵakulijiganya ŵakwe paŵayiweni yeleyi, yasakalisye mnope ni ŵatandite kuŵecheta kuti, “Ligongo chichi akonanga mawutaga?
9 Pakuŵa tukasumisye pamtengo wakudula soni mbiyasyo ni kwapa ŵandu ŵakulaga.”
10 Yesu paŵayimanyi yeleyi, ŵasalile jemanjajo kuti, “Ligongo chichi mkusaka kumlagasya jwamkongweju? Jwalakweju andendele yindu yambone.
11 Pakuŵa ŵakulagawo chimtameje nawo ndaŵi syosope, nambo une ngasimba ni jemanja mpaka kalakala.
12 Jwalakweju andasile mawutaga pakosechelesya chilu changu kuchisika m’malembe.
13 Nditu ngumsalichisya jemanja kuti, kulikose kwele ngani syambone sichilalichidwa pachilambo chosope, ŵandu chachimkumbuchilaga jwamkongweju pakusala yajwatesile.”
14 Kaneko jumo mwa ŵakulijiganya ŵakwe 12 ŵala, jwakolanjidwa Yudasi Isikaliyoti, jwapite kwa ŵakulolela ŵakutaga mbopesi
15 ni kwawusya kuti, “Ana chachimba chichi naga ngumpeleka jwalakwejo kwa jemanja?” Jemanjajo ŵakamulene kuti chachimpa mbiya 30 sya silifa.
16 Kutandila pandaŵi jelejo, jwalakwe jwasosagasosaga ndaŵi jambone jakuti ampelechele Yesu.
17 Pa lisiku lyandanda lya Chisangalalo cha Mikate* Jangali Chakusasaŵisya, ŵakulijiganyawo ŵayiche kwa Yesu ni kumwusya kuti, “Ana akusaka kuti tukalinganyile kwapi malo gakulila Pasika?”
18 Jwalakwe jwajanjile kuti, “Mjawule kwa mundu jwine jwakwe mumsindamo ni mkamsalile kuti, ‘Mwalimu akuti, “Ndaŵi jangu jakuŵajilwa kuwa jiŵandichile. Chindendele Pasika ni ŵakulijiganya ŵangu m’nyumba mwenu.”’”
19 Myoyo ŵakulijiganyawo ŵatesile mpela muŵalamulile Yesu mwamti ŵalinganyisye yakusosechela yosope ya Pasika.
20 Chakwigulo, Yesu ni ŵakulijiganya ŵakwe 12 ŵatemi mwakusyungulila tebulo.
21 Paŵaliji mkulya, jwalakwe jwasalile jemanjajo kuti, “Nditu ngumsalichisya kuti, jumo mwa jemanja chambeleche une.”
22 Ŵakulijiganyawo paŵapikene yeleyi, chakamwile chanasa mnope mwamti jwalijose jwatandite kumwusya jwalakwe kuti, “Ambuje, ana kapena ndili une?”
23 Jwalakwe ŵajanjile kuti, “Mundu jwangupamba najo yimpepe mu mbalemu, jweleju ni juchambeleche une.
24 Yisyene, Mwanache jwa mundu akwawula mpela mugaŵechetele Malemba, nambo akwete likungu* mundu jwakumpeleka Mwanache jwa mundu. Yikaliji chenene kwa mundu jweleju yikaŵe kuti nganapagwa.”
25 Yudasi, juŵaliji ali asigele panandi kumpeleka jwalakwejo, ŵamwusisye kuti, “Labi, ana kapena ndili une?” Yesu ŵamjanjile kuti, “Mŵechete mwasyene.”
26 Paŵapitilisyaga kulya, Yesu ŵajigele mkate, ni panyuma pakupopela,* ŵawugaŵenyegaŵenye ni kwapa ŵakulijiganya ŵakwe, kaneko ŵasalile kuti, “Mjigale mkatewu mlye. Mkate welewu ukwimila chilu changu.”
27 Kaneko paŵajigele chikapu cha finyo ni kuyamika, ŵapele ŵakulijiganyawo, ni kwasalila kuti, “Amwe jemanja wosope,
28 pakuŵa finyo jweleju jukwimila ‘myasi jangu ja chilangano’ jajichisulula mmalo mwa ŵandu ŵajinji kuti ulemwa wawo ukululuchidwe.
29 Nambo ngumsalila jemanja kuti, une ngasimwasoni chakumwa chilichose chakuchipanganya kutyochela ku yisogosi ya mpeleya, mpaka pa lisiku lyele chinjimwa chakumwa chasambano pampepe ni jemanja mu Uchimwene wa Atati ŵangu.”
30 Pambesi pakwe ŵajimbile nyimbo syakumchimbichisya Mlungu, kaneko ŵapite ku Litumbi lya Maolifi.
31 Kaneko Yesu ŵasalile jemanjajo kuti, “Wosopemwe chimundile* ligongo lya yindu yachiyindendechele chilo chinochino, pakuŵa Malemba gakusati, ‘Chinjimwulaga jwakuchinga mwamti ngondolo sichibalalikangana.’
32 Nambo pachinjijimuka, chinjilongolela kwawula ku Galileya.”
33 Nambo Petulo ŵamjanjile jwalakwejo kuti, “Atamose wosopeŵa ali ŵatisile ligongo lya yindu yachiyatendechele wawojo, nambo une nganimba natisile!”
34 Yesu ŵamsalile jwalakwejo kuti, “Nditu ngumsalichisya kuti, chilo chinochino, tambala mkanalile, chimungane katatu kose kuti ngamkumanyilila une.”
35 Petulo ŵamjanjile jwalakwejo kuti, “Atamose ali atite kuti chambulaje pampepe ni wawojo nambo une nganimba nakanile ata panandi.” Ŵakulijiganya ŵane wosopewo ŵasasilesoni myoyo.
36 Kaneko Yesu ni ŵakulijiganya ŵakwe ŵayiche mumgunda wakolanjidwa Getisemane, ni ŵasalile jemanjajo kuti, “Mtame kaje apano, une ngwawula ako kuti ngapopele.”
37 Kweleko ŵapite ni Petulo soni ŵanache ŵaŵili ŵachalume ŵa Sebedayo, kaneko ŵatandite kulagasika mnope nganisyo, soni kumpweteka mnope mumtima.
38 Pelepo ŵasalile jemanjajo kuti, “Mumtimamu ngulagasika mnope mwakupundanganya malile. Sambano jemanja mtame apano soni mpitilisye kuŵa mesope pampepe ni une.”
39 Paŵapite pasogolo panandi, jwalakwe jwatindiŵele mpaka ngope jakwe pasi ni kutanda kupopela kuti, “Atati, naga yili yakomboleka, akunde kuti chikapuchi* chimbelenganye. Nambope ngaŵa mwakusaka kwangu, nambo mwakusaka kwawo.”
40 Jwalakwe paŵawujile kwa ŵakulijiganya ŵakwe ŵatatu ŵala, ŵasimene ali mkugona, ni ŵamwusisye Petulo kuti, “Ana jemanja nganimŵa mtemi mesope pampepe ni une kwa ndaŵi jamnono?
41 Mŵe mesope soni mpitilisye kupopela, kuti mkagwila mu kulinjidwa. Yisyene, mtima uli wakusachilila, nambo chilu chili changali machili.”
42 Kaneko jwalakwe jwapitesoni kane kukupopela kuti, “Atati, naga nganiyiŵa yikomboleche kuti chikapuchi chimbelenganye mpaka ndili mwele, yakusaka yawo yitendekwe.”
43 Jwalakwe paŵawujilesoni ŵasimene jemanjajo ali mkugona, ligongo meso gawo gasitopelwe ni lugono.
44 Myoyo jwalakwe ŵalesile, ni kwawulasoni kukupopela katatu. Kweleko ŵaŵechetesoni maloŵe galagala.
45 Kaneko jwalakwe ŵawujilesoni kwa ŵakulijiganya ŵakwewo, ni ŵawusisye kuti, “Ana yisyene jemanja mkugona soni kupumula pandaŵi mpela ajino? Mlole! Ndaŵi jikwanile jakuti Mwanache jwa mundu apelechedwe mmyala mwa ŵandu ŵakulemwa.
46 Mjimuche, kwende tujawuleje. Jwakumbeleka jula juŵandichile.”
47 Ali mkuŵecheta yeleyi, Yudasi, jumo mwa ŵakulijiganya ŵakwe 12 ŵala, jwayiche pampepe ni gulu ja ŵandu jili jijigele maupanga* soni yimbonga. Jemanjaji ŵatumidwe ni ŵakulolela ŵakutaga mbopesi soni achakulungwa ŵa ŵandu.
48 Sambano mundu jwakumpelekajo ŵaliji ali ŵapele ŵanduwo chimanyisyo. Jwalakwe jwasalile kuti, “Mundu jwele jutingamkomasye mwachinonyelo,* ni jwelejo, akamkamule.”
49 Kaneko Yudasi jwapite paŵaliji Yesu ni kuŵecheta kuti, “Moni Labi!” ni ŵamkomasisye mwachinonyelo.
50 Nambo Yesu ŵamwusisye jwalakwejo kuti, “Bwanawe, ana myiche kukutenda chichi akuno?” Kaneko gulu ja ŵandujo jamkamwile Yesu ni kumtaŵa.
51 Nambo jumo mwa ŵandu ŵaŵaliji ni Yesu, jwaswekwile upanga wakwe ni kukata liwiwi lya kapolo jwa jwamkulungwa jwa ŵakutaga mbopesi.
52 Pelepo Yesu ŵamsalile jwalakwejo kuti, “Mwuchisye upangawo m’malo mwakwe, ligongo wosope ŵakusakamula upanga chachawulaga ni upanga.
53 Ana mkuganisya kuti nganimba naŵendile Atati ŵangu kuti andumichisye panopano magulu 12 ga malayika?
54 Nambo naga ngwaŵenda, ana Malemba gakusala kuti yeleyi yikusosekwa kutendekwa mpaka gakwanilichikwe chamtuli?”
55 Kaneko Yesu ŵajiwusisye gulu ja ŵandujo kuti, “Ligongo chichi jemanja myiche kukungamula une mli mjigele maupanga soni yimbonga mpela ndili jwachiswamba? Lisiku lililyose najiganyaga ku nyumba ja Mlungu, nambo jemanja nganimungamula.
56 Nambo yosopeyi yitendekwe pakwanilisya yakulemba ya ŵakulochesya.” Pelepo ŵakulijiganya ŵakwe wosope ŵamlesile ni kutila.
57 Ŵanduwo paŵamkamwile Yesu ŵapite najo kwa Kayafa, jwamkulungwa jwa ŵakutaga mbopesi, kwele alembi ni achakulungwa ŵasongangene pampepe.
58 Nambo Petulo ŵaliji mkukuya chapakutalichila mpaka jwayiche m’luŵala lwamkati lwa nyumba ja jwamkulungwa jwa ŵakutaga mbopesi. Paŵajinjile mkati, jwalakwe ŵatemi ni ŵakutumichila ŵa panyumbapo ni kwembecheyaga kuti alole yachiyitendekwe.
59 Sambano ŵakulolela ŵakutaga mbopesi soni wosope ŵa mu Luŵala Lwekulungwa lwa Ayuda, ŵasosagasosaga umboni waunami wakumlambuchisya Yesu ni chakulinga chakuti amwulaje.
60 Nambope jemanjaji nganawupataga umboni uliwose atamose kuti payiche mboni syejinji syaunami. Pambesi pakwe, payiche mboni siŵili
61 ni kuŵecheta kuti, “Mundu jweleju jwaŵechete kuti, ‘Une mpaka ngombole kujigwisya nyumba ja Mlungu ni kujitaŵasoni m’masiku gatatu.’”
62 Pelepo jwamkulungwa jwa ŵakutaga mbopesi jwajimi ni kumwusya Yesu kuti, “Wuli ngamkwanga chilichose? Ana mkuti wuli pa yakuŵecheta ŵanduŵa pakwamba ya mmwejo?”
63 Nambo Yesu nganajanga chilichose. Pelepo jwamkulungwa jwa ŵakutaga mbopesi ŵamsalile jwalakwejo kuti, “Ngumlamula kuti mlumbile pameso pa Mlungu ni mtusalile naga mmwejo mli Klistu, Mwanache jwa Mlungu!”
64 Yesu ŵamjanjile jwalakwejo kuti, “Aŵechete jikape. Nambo ngumsalila jemanja kuti, kutandila apano kwawulaga msogolo chimchimwona Mwanache jwa mundu ali atemi kumkono wamlyo wamachili soni ali mkwika m’mawunde gakwinani.”
65 Kaneko jwamkulungwa jwa ŵakutaga mbopesi jula jwapapwile chakuwala chakwe chakusa, ni jwaŵechete kuti, “Mundu jweleju anyosisye Mlungu! Ana tukusosekwasoni umboni wine pelepa? Jemanja mlipikanile mwachimsyene jweleju ali mkunyosya Mlungu.
66 Jamani, akuti wuli pelepa?” Jemanjajo ŵajanjile kuti, “Jweleju akusosekwa kuwa.”
67 Kaneko ŵatandite kumsunila mata pangope soni kumputa yibagela. Ŵane ŵamputile makofi pangope,
68 ni kumsalilaga kuti, “Mmwe Klistu, naga mli jwakulochesya, mtusalile, ŵani ŵamputile?”
69 Sambano Petulo paŵatemi mu luŵala, payiche msikana jwamasengo ni kumsalila jwalakwejo kuti, “Wawojosoni ŵaliji ni Yesu jwa ku Galileyaju!”
70 Nambo jwalakwe jwakanile pameso pa ŵandu ŵaŵaliji pelepowo kuti, “Ngangumanyilila yamkuŵechetayo.”
71 Petulo paŵapite pamlango wa luŵalalo, msikana jwine jwammanyilile jwalakwe, ni jwasalile ŵandu ŵaŵaliji pelepo kuti, “Ŵalakweŵa ŵalijisoni ni Yesu jwa ku Nasaletiju.”
72 Jwalakwe jwakanilesoni mwakutenda kulumbila kuti, “Nditu, ngangummanyilila mundu jweleju!”
73 Pali papite kandaŵi kamnono, ŵandu ŵaŵajimi pelepowo, ŵayiche kwa Petulo ni kumsalila kuti, “Nditu, mmwejosoni mli jumo mwa jemanjaji, ligongo kaŵechete kenu kamkamulisye.”
74 Pelepo jwalakwe jwatandite kulitembelela soni kulumbila kuti, “Nditu, ngangummanyilila mundu jweleju!” Ndaŵi jijojo tambala jwalisile.
75 Pelepo Petulo jwakumbuchile yaŵaŵechete Yesu kuti, “Tambala mkanalile, chimungane katatu kose kuti ngamkumanyilila une.” Kaneko jwalakwe jwakopweche pasa nikutanda kulila mnope mwakulitendela chanasa.
Maloŵe Gamwiŵanda
^ Kapena kuti, “amtaŵe.”
^ Maloŵe gakwe gandanda, “libotolo lya alabasitala.” Libotololi ŵalipanganyisye ni maganga gele gasimanikwaga chiŵandika ni ku Alabastron, ku Iguputo.
^ Mikate jakala ŵajipanganyaga ni utandi wa tiligu kapena balele.
^ Ŵane akusati “utapani.”
^ Kapena kuti, “kuŵenda majali.”
^ Maloŵe gakwe gandanda, “chimkuŵale.”
^ Maloŵe gakuti “Chikapu” gakwimila yakusaka ya Mlungu pakukunda kuti Yesu awe pamagambo gakumlambuchisya kuti ali jwakunyosya Mlungu.
^ Upanga ukusawoneka mpela chipula chekulungwa chakutema kosekose.
^ Maloŵe gakwe gandanda, “mwakumpa kisi.”
