Ŵapatile Chindu Chambone Mnope
Ŵapatile Chindu Chambone Mnope
AKLISTU ŵajinji akusasagula ngasangalalila Kilisimasi. Ana jemanjaji akusapikana uli mumtima? Ana akusayiwona kuti akwimidwa chine chakwe? Ana ŵanache ŵawo akusakumbila pakwawona achimjawo ali mkusangalala? Kwende tulole yaŵaŵechete ŵa Mboni sya Yehofa panganiji kusyungulila pa chilambo chosope.
● Kumbuchila Yesu Klistu: “Mkanimbe jwa Mboni sya Yehofa, nganingangalaga kwawula kuchalichi. Mwamti nagambaga kwawula pa Kilisimasi kapena pa Isitala. Atamose kuti najawulaga, nambo nganinganichisyaga ya Yesu Klistu. Apano jwangasangalalila Kilisimasi, nambo ngusajawula kumisongano ja mpingo mwakutamilichika, soni ngusinajiganya ŵandu yajikusasala Baibulo pakwamba ya Yesu”—EVE, JWA KU AUSTRALIA.
● Kwapa ŵane mbaso: “Ngusasangalala kwejinji mundu pambele mbaso pandaŵi jangangujijembecheya. Ngusanonyelasoni kwapa ŵandu makadi ni yiwulili ligongo yikusatendekasya kuti ŵanduwo soni unejo tuŵeje ŵakusangalala.”—REUBEN, JWA KUMPOTO KWA CHILAMBO CHA IRELAND.
● Kwakamuchisya ŵakulaga: “Tukusanonyela kwatelechela yakulya ŵandu ŵakulwala. Ndaŵi sine ngusinapa maluŵa, keke, kapena yindu yine. Jemanjaji papochele akusaŵa ŵakusangalala. Yeleyi yikusatusangalasya ligongo yikusaŵa kuti tukutenda yindu pandaŵi jilijose ngaŵa pa Kilisimasi.”—EMILY, JWA KU AUSTRALIA.
● Kwalola achalongo achimjetu: “Patupite kukwalola ŵachibale kumusi, yikusiyakamuchisya ŵanache ŵetu kwamanyilila a chamjomba ŵawo, achalumbu ŵawo baba ŵawo, achanganga ŵawo, soni achasuŵani ŵawo. Ligongo lyakuti tukusamanyilila kuti mpaka tukakunguluche ni ŵachibale ŵetu pandaŵi jilijose, ngatukusalagasika nganisyo soni ŵachibale ŵetu akusamanyilila kuti tukusajawula kukwalola ligongo lyakuti tukusitwanonyela.”—WENDY, JWA KU YILUMBA YA CAYMAN.
● Kutama mwamtendele: “Pandaŵi ja Kilisimasi ŵandu akusatenda yindu yejinji mwamti akusalepela kuganichisya yakuŵa pa mtendelele ni ŵane. Apano nalijiganyisye yajasasile Baibulo yakwamba yachachatendela Yehofa ŵandu kusogolo. Yeleyi yikusangamuchisya kuŵa jwakusangalala. Ngusamanyilila kuti ŵanache ŵangu chachiŵa ŵakusangalala kusogoloku.”—SANDRA, JWA KU SPAIN.