MALEMBA Geswela gakusasala ndamo syambone syejinji sya Mlungu, yayikusatukamuchisya kuti tummanyilile chenene. Mwambone, Malemba gakusasala ndamo syekulungwa mcheche sya Mlungu. Ndamosi sili machili, chilungamo, lunda soni chinonyelo. Kwende tulole ndamosi jilijose pajika.

Yehofa ŵamsalile Abulahamu kuti: “Une ndili Mlungu Jwamachili Gosope.” (Genesesi 17:1) Machili gakwe pangali jwakulandana najo. Pangali champaka alepele kutenda, soni gali gangamala. Ligongo lya machiliga, Mlungu ŵapanganyisye yindu yosope.

Mlungu ngakusakamulichisya masengo machili gakwe mwakulemwecheka. Akusagalamulilaga soni akusagakamulichisya masengo mwakamuchisya. Akusagakamulichisya masengo machiligo mwakuŵajilwa mwakamulana ni chilungamo, lunda, soni chinonyelo chakwe.

Yehofa mwakoloŵa makono akusakamulichisya masengo machili gakwe pakwakamuchisya ŵakumtumichila. “Meso gakwe gakulola aku ni akuku pachilambo chosope chapasi kuti ŵalosye machili gakwe ŵandu ŵele mtima wawo wosope uli pa jwalakwe.” (2 Mbili 16:9) Yili yakutesya lung’wanu kuti Mlungu ali jwamachili mnope, nambo akusasamala ya ŵane?

“Yehofa chikusamnonyela chilungamo.” (Masalimo 37:28) Akusatenda yindu yakuŵajilwa mwakamulana ni ndamo syakwe syapenani.

Mlungu akusaŵengana ni yangalumbana. “Jwangali lusagu, soni jwangapochela chindu kwa mundu jwine kuti magambo gamnonyele.” (Detulonomo 10:17) Akusiŵaŵenga ŵakusiŵalagasya achimjawo, soni akusiŵakamuchisya ŵandu ŵanganakola ŵakwakamuchisya, mpela “jwamkongwe jwamasije kapena mwanache jwamasije jwalijose.” (Ekisodo 22:22) Mlungu akusawonaga ŵandu wosope mwakulandana. “Mlungu jwangali lusagu kwa mundu jwalijose, nambo mundu mwalukosyo lulilose, jwelejo jwakumjogopa ni kutenda yambone, Mlungu akumpochela, yangali kandu kuti ali jwa lukosyo lwati uli.”—Masengo 10:34, 35.

Mlungu akusatenda chilungamo chakwe mwakuŵajilwa mnope. Jwangalechelela mnope yindu, soni jwangayikalalisya mnope. Akusajamuka ŵakusakala ŵangakupitikuka mtima, nambo akusalosya chanasa chekulungwa kwa ŵapitikwiche mtima. “Jwangatumbila chitema, soni jwagumbala chinonyelo changamala. Jwalakwe ngasatamila kutujimba magambo ndaŵi syosope ligongo lya yakulemwa yetu, kapena kututumbilila mpaka kalakala. Nganatutendela yindu mwakamulana ni yakulemwa yetu, kapena kutupa chilango mwakamulana ni yakulemwa yetu.” (Masalimo 103:8-10)  Mlungu akusiŵakumbuchila ni kwapa mbote ŵakutumichila ŵakwe ŵakulupichika. Ana ngatukusosekwa kumkulupilila Mlungu jwachilungamo mpela jweleju?

Yehofa ali jwamlunda mnope. “Eya, kusokoka kwakwe kwa kusichila ni kwa lunda ni kwa kumanyilila kwakwe kwa Mlungu!” (Aloma 11:33) Lunda lwakwe luli lwapenani kupunda lwa jwalijose.

Lunda lwa Mlungu lukusawonechela mnope pa yindu yaŵapanganyisye. Jwamasalimo jwaŵechete kuti: “Masengo gawo gali gamajinji, wawo Yehofa! Gosopego ŵagapanganyisye mwalunda.”—Masalimo 104:24.

Lunda lwa Mlungu lukusawonechelasoni m’Malemba Geswela. Mwenye Daudi ŵalembile kuti: “Chikumbusyo cha Yehofa chili chakulupichika, chakwapa ŵangamanyilila yejinji lunda.” (Masalimo 19:7) Agambe ganichisya, lunda lwangamala lwa Yehofa mpaka lwakamuchisye mnope! Ana chakamulichisye masengo upile welewu?

Ndamo jekulungwa mnope ja Yehofa jili chinonyelo. Malemba gakusala kuti: ‘Mlungu ali chinonyelo.’ (1 Yohane 4:8) Chinonyelo chikusamlimbikasya ni kumlongolela pakutenda yindu.

 Mlungu akusalosya chinonyelo chakwe kwa m’weji mmatala gangaŵalanjika. Akusatupa yindu yambone. “Yambone yele yakutenda kutyochela kwinani akumpa ula ni ndaŵi sya yisogosi akusampaga yakulya yejinji, ni soni kumgumbasya m’mitima jenu ni lukondwa.” (Masengo 14:17) Yili yisyene kuti, “Chakupegwa chilichose ni mtuka uliwose womalilwe ukuwumila kwinani, ukwisa pasi kutyochela kwa Atati ŵa malanguka.” (Yakobo 1:17) Kupitila mu mtuka wapenani wa Malemba, Mlungu asasile yisyesyene yakwamba jwalakwe, soni akusatujiganya malamusi gakwe gachinonyelo. Yesu mu lipopelo lyakwe ŵasasile kuti, “maloŵe gawo gali usyesyene.”—Yohane 17:17.

Mlungu akusatukamuchisyasoni patukusimana ni yakusawusya. “Amtwiche Yehofa yakusawusya yawo, ni jwalakwe chachakamuchisya. ngasakunda kuti jwakulungama atenganyikwe.” (Masalimo 55:22) Akusatukululuchilasoni yakulemwa yetu. “Wawo Yehofa ali ŵambone, soni ŵakoseka kululuchila; soni umbone mtima wawo kwa ŵakuŵilanjila pa lina lyawo uli wapawinji.” (Masalimo 86:5) Atupelesoni chembecheyo cha umi wangamala. “Jwalakwe tachasyula misosi jawo m’meso mwawo. Chiwa ngasichipagwasoni, atamuno kulila malilo, kapena kulila kapena kuyiwona yipwetesi, yindu yandanda yili yipite.” (Ciwunukuko 21:4) Ana wawojo chatende chichi pamanyilile kuti Mlungu akusiŵanonyela? Ana nombenawo chamnonyele?

Mlungu akusaka kuti wawojo ammanyilile chenene. Maloŵe gakwe gakusatulimbikasya kuti: “Mwaŵandichile Mlungu, nipo Jwalakwe tam’ŵandichile ŵanganyamwe.” (Yakobo 4:8) Mlungu ŵamkolasile jwakulochesya Abulahamu kuti “Mjangu.” (Yesaya 41:8) Yehofa akusaka kuti wawojosoni aŵe mjawo.

Pakulijiganya yejinji ya Mlungu, chachiyiwona kuti akum’ŵandichila, soni chachiŵa ŵakusangalala. “Jwana upile mundu” jwele “m’chilamusi cha Yehofa mwana chisangalalo chakwe, nipo m’chilamusi chakwe akusaganichisyaga musi ni chilo.” (Masalimo 1:1, 2) M’yoyo, ajendelechele kulijiganya Malemba Geswela. Aganichisyeje ya ndamo sya Mlungu, soni masengo gakwe. Alosyeje chinonyelo chawo kwa Mlungu mwakuyikamulichisya masengo yalijiganyisye. “Pakuti kwanonyela Mlungu kukuli kugagosa malamulo gakwe, nipo malamulo gakwe nganigaŵa kose gakusitopa.” (1 Yohane 5:3) Apopeleje mpela muŵatendele Daudi kuti: “Amanyisye matala gawo Yehofa, anjiganye matala gawo. Anjendesye mu usyesyene wawo.” (Masalimo 25:4, 5) Chachiyiwona kuti Mlungu “nganaŵa kose pakutalika ni jwalijose jwetuwe.”—Masengo 17:27.