NGANI JA PANDANDA | ANA ŴANI ŴAKUSATENDEKASYA YAMISIMU?
Ŵandu Ŵajinji Akunonyela Mnope Yamisimu
“Yamisimu mpela kusyuka cinecakwe mundu ali cijumi kapena pawile, kamulwa ni yiŵanda soni mapopelo gakutyosya yiŵanda yijigele malo.”—Nyusipepala ja The Wall Street Journal.
MASIKU agano, gane mwa mabuku, mafidiyo, soni magemu ga pa kompyuta gagumbele ni yamasenga, yausaŵi, soni yakusyuka. Ana yindu yeleyi yitupile mwamtuli? *
Ticala jwine jwakusajiganya ya ndamo sya ŵandu ku koleji jine, lina lyakwe Claude Fischer jwalembile kuti, “Ŵandu ŵajinji ŵa ku America atandite kulupilila mnope yamisimu kulekangana ni kala. Ŵacinyamata ni ŵali pasogolo kwawula ku yisango, kulupilila kuti kwana yitopotopo, soni kuti yikwete malo gayikusatama.”
Ni ligongo lyakwe masiku agano ngani syakogoya syakuti misimu jakusakala jijinjile mwa mundu sitandilesoni kupikanika mnope. Michael Calia jwalembile mu nyusipepala ja The Wall Street Journal kuti, “Yamisimu, mpela kusyuka cinecakwe mundu ali cijumi kapena pawile, yitandilesoni kuwanda m’mikuli jakulekanganalekangana.”
Lipoti line lyasasile kuti “ciŵandika hafu ja ŵandu wosope pacilambopa akusakulupilila yamisimu, soni m’mabuku gejinji mukusimanikwaga yamisimu.” Aciticala ŵaŵili ŵakusajiganya ya ndamilo sya ŵandu ku koleji jine ku United States, Christopher Bader ni Carson Mencken “ŵapatile kuti ŵandu ŵajinji ku America akusakulupilila yamisimu.”
Ana kusangalala ni yamisimu soni yamasenga kapena kutenda nawo yeleyi kuli kwambone?
^ ndime 4 Dikishonale jine jikusagopolela yamisimu kuti yili “yakutendekwa yele ŵasayansi ngaŵa mkuyikombola kuyilondesya soni kuti nganiyiŵa yacipago.”—Merriam-Webster’s Learner’s Dictionary.
