KUWUNGUNYA kwakwatendekwe m’caka ca 2015 m’yilambo yakwana 8 kwa ŵandu ŵali pamasengo, ŵajinji ŵajanjile kuti yikusaŵa yakusawusya kuti mundu alondesye yindu yakumasengo soni ya kunyumba. Yeleyi yikusatendekwa ligongo lyakutupa kwa yakutenda kumasengo soni kunyumba, kukwela mtengo kwa yindu, soni ligongo lyakamula masengo maawala gejinji. Mwambone, ku United States ŵandu ŵali pamasengo gakulembedwa ŵasasile kuti akusakamula masengo maawala 47 cijuma cilicose. Ciŵandika mundu jumo mwa ŵandu 5 akusakamula masengo kwa maawala 60 kapena kupunda.

Kuwungunya kwinesoni kwakwatendekwe m’yilambo yakwana 36, kwalosisye kuti ŵandu 25 pa ŵandu 100 ŵaliwose akusalipikana kuti akwete yakutenda yejinji atamose pa ndaŵi jawo jakupumula. Nombenawosoni ŵanace mpaka yatupileje yakutenda naga tukwapa masengo gejinji.

Naga tukulikanganicisya kutenda yindu yejinji pandaŵi jamnono, mpaka tulagasice nganisyo. Nambo ana mpaka yikombolece kuyiwonaga yindu mwakuŵajilwa? Ana yatukusakulupilila, yakusagula yetu, soni yakulinga yetu mpaka yikole yakuyicisya yamtuli? Candanda, kwende tulole magongo mcece gagakusatendekasya ŵane kuti yatupileje yakutenda.

Jwamlume jwine jwali nangolo lina lyakwe Gary jwatite, “Ngusakamula masengo kwa cijuma cosope pakusaka kuti ŵanace ŵangu napeje yindu yapenani. Ngusasaka kuti ŵanacewo akalagaga mpela mwayaŵelele ni une.” Atamose kuti acinangolo mpaka akole nganisyo syambone pakamula masengo, nambope akusosekwa kusamala. Kuwungunya kwine kwalosisye kuti acakulungwa soni ŵanace ŵakusaŵika nganisyo syawo pa yipanje ngakusaŵa ŵakusangalala yisyesyene, ŵakwikutila, soni yilu yawo yangajenda cenene kulekangana ni ŵandu ŵanganakola yipanje.

Acinangolo ŵane pakusaka kuti ŵanace ŵawo cakole sogolo jambone akusakola yakutenda yejinji soni ŵanacewo akusiŵapa yakutenda yejinji. Buku jine jakolanjikwa kuti Putting Family First, pakusala yakuyicisya yampaka yipagwe jatite, “Acinangolo soni ŵanacewo yindu yangajendela cenene.”

Ŵakuŵilanjila malonda akusasaka kuti tuliwoneje mpela tuli ŵakusigalila naga ngatukusuma yindu yasambano. Magasini ja The Economist jila jatite, “Kukopoka kwa yindu yasambano kutendekasisye kuti ŵandu ŵajinji alipikaneje kuti nganakola ndaŵi jakwanila.” Magasiniji jajonjecesye kuti ŵakusuma “akusatenda linjenganjenga pa yindu yakusaka kusuma, kulolela kapena kulya” ligongo lyakola ndaŵi jamnono.

M’caka ca 1930, jwamlijiganye jwine pangani syamalonda jwasasile kuti kwawula pasogolo kwa yakupanganyapanganya kucikamucisya kuti ŵali pamasengo akoleje ndaŵi jejinji jakupumula. Jwalakwe jwalilambusyaga ngaŵa masanje. Jwakulemba magasini ja New Yorker lina lyakwe Elizabeth Kolbert jwatite, “Mmalo mwakuti ŵandu akamuleje masengo kwa ndaŵi jamnono, akusalikanganicisyape kamula masengo kwa maawala gejinji pakusaka kupata yindu yasambano.” Yeleyi yikusasosa mbiya soni ndaŵi.

Ŵandu ŵane akusakamula masengo kwa maawala gejinji pakusaka kwasangalasya abwana ŵawo. Ŵandu ŵane akusaŵeluka mwakucelewa kumasengo pakusaka kwasangalasya acimjawo. Ŵane akusakamula masengo ndaŵi syosope soni kwa maawala gejinji ligongo lyakogopa ya msogolo.

Acinangolo ŵane akusakamula masengo pakusaka kulandana ni liŵasa line mwalikupatila yindu. Naga yikwalema akusalijimba  magambo kuti ngakukwanilisya yakusosecela ya ŵanace ŵawo.

Tim, jwakusatama ku United States jwatite, “Nanonyelaga kamula masengo mwamtawu ndaŵi syosope. Nasakaga kuti ŵandu akambonaga kuti ndili jwakusigalila.”

Ŵandu ŵajinji akusalipikana mpela Tim. Ana yakuyicisya yakwe yikusaŵa yamtuli? Elizabeth Kolbert jwatumkolasile jula jwatite, “Ŵandu ŵajinji yikusiyatupila yakutenda pakusaka kumanyika.” Jwalakwe jwajonjecesye kuti, “Payikumtupila mnope ni pamkusayiwona kuti mli jwakusosekwa mnope.”

Baibulo jikusatulimbikasya kuti tukamuleje masengo mwamtawu. (Miyambo 13:4) Nambo jikusatusalila kuti tutendeje yindu mwangapundanganya malile. Lilemba lya Mlaliki 4:6 likusati, “Kupumulila panandi kuli cenene kulekangana ni kamula masengo mwamtawu ni kuwutusya mbungo.”

Kutenda yindu mwangapundanganya malile kukusakamucisya kuti cilu cetu cijendeje cenene. Ana mpaka yikombolece kunandiya yakutenda? Elo. Kwende tulole yindu mcece ayi.

Nganikuŵa kulemwa kusaka mbiya. Nambo kusacilila mnope mbiya syejinji kapena yipanje nganikuŵa kututendekasisye kuŵa ŵakwikutila soni ŵakusangalala. Nambosoni kola ndaŵi jejinji jakupumula kapena jakusangalala mpaka kutumalile ndaŵi.

Tim, jwatumkolasile jula jwatite, “Une ni ŵamkwangu twatesile mtawu kuti tucenje yindu paumi wetu. Twalembile mwayiŵelele yindu soni yatukwembeceya kutenda. Twatagulilene yakuyicisya ya yisagula yatwatesile munyuma soni yatukusosekwa kutenda kuti tukwanilisye yakulinga yetu yasambano.”

Baibulo jikusatukalamusya kuti tuŵambaleje “yakumbila ya meso.” (1 Yohane 2:15-17) Ŵakuŵilanjila malonda mpaka amlimbikasye mundu kamula masengo kwa maawala gejinji kapena kutenda yindu mwakupundanganya, nambosoni kumalila ndaŵi jejinji pa yindu yakusangalasya. Kusala yisyene ŵakuŵilanjila malonda ali posepose, nambo mpaka tukombole kuŵambala kutenda yakusaka yawo. Mpaka tukombolesoni kusagula yindu yakuŵajilwa yatukusosecela.

Akaliŵalilasoni kuti acimjawo mpaka ŵalongolele kutanda kusacilila mnope yindu yine yakwe. Naga ayiweni kuti acimjawowo akusasacilila mnope yipanje, mpaka atende cenene kuleka kunguluka nawo ni kupata ŵane ŵanganisyo syambone. Baibulo jikusasala kuti, “Naga ukwenda ni ŵalunda uciŵa jwalunda.”—Miyambo 13: 20.

Aŵecetaneje ni abwana ŵawo pakwamba yamasengo soni yakulinga yawo. Akalijimbaga magambo naga nganajawula kumasengo. Buku jine jakolanjikwa kuti Work to Live jatite, “Ŵandu ŵakusaliŵicila malile pakamula masengo  gakulembedwa soni ga pamlango, kapena ŵakusakola ndaŵi jakupumula akusajiticisya maloŵe gakuti, pangali cindu campaka cisokonecele atamose ali atyosile.”

Gary, jwatumkolasile jula, yindu payatandite kumjendela cenene jwaganisisye yakunandiya maawala gakusakamula masengo. Jwalakwe jwatite, “Natagulilene ni liŵasa lyangu kuti tucenje yine ni yine paumi wetu pakusaka kutama umi wangasaka yejinji. Kaneko twatandite kamulicisya masengo yeleyo. Naŵendilesoni abwana ŵangu kuti ngamuleje masengo kwa masiku gamnono mwamti ŵanjiticisye.”

Liŵasa likusasosekwa kola ndaŵi jakwanila jakunguluka yimpepe. M’yoyo, akakunda kuti yakutenda yatupileje mpela mwayiŵelele ni maŵasa gane. Gary jula jwatite, “Aliŵicileje ndaŵi jakupumula soni jakusangalala, nambosoni akatendaga yiliyose yangasosecela mnope pandaŵi jeleji.”

Liŵasa lyawo palikukunguluka akakunda kuti TV, foni, kapena cindu cilicose casokonasye. Akakunda kuti lisiku limale ngalila yimpepe ni liŵasa lyawo. Naga acinangolo akukuya yeleyi ŵanace ŵawo akusakula cenene soni akusatenda cenene ku sukulu.

Pakumalisya aliwusye kuti, “Ana paumi wangu ngusasaka cici? Ana ngusalisosela yamtuli liŵasa lyangu? Naga akusaka kola umi wambone, yakulinga yawo yiŵeje yakamulana ni lunda lwakusimanikwa m’Baibulo.