YAGAKUSAŴECETA MADOKOTAL

A Cikalata cine casasile kuti “kuyamicila kukusamtendekasya mundu kuŵa jwakusangalala mnope. Soni kukusamkamucisya mundu kuŵa jwaganisya cenene, kola cilu cambone, kumalana ni yakusawusya, soni kuŵa paunasi wambone ni ŵandu ŵane.”—Harvard Mental Health Letter.

YAJIKUSASALA BAIBULO

Baibulo jikusatulimbikasya kola mtima wakuyamicila. Ndumetume Paulo jwalembile kuti, “M’ŵeje ŵakuyamicila.” Jwalakwe jwatupele cisyasyo cambone panganiji. Mwambone, jwalakwe ‘jwam’yamicilaga Mlungu mwangalecesya’ ligongo lyakuti ŵandu ŵapocele utenga waŵalalicilaga. (Akolose 3:15; 1 Atesalonika 2:13) Kusangalala kusyesyene ngakukusayika ligongo lyagamba kusala kuti sikomo, nambo kukusayika ligongo lyakuyamicila ni mtima wosope. Kutenda yeleyi kukusatukamucisya kuti tuŵambale kulikwesya, wiwu, soni kutumbila, yampaka yitendekasye kuti ŵandu atujogopeje nambosoni mpaka tuŵe ŵangasangalala.

Mkupanganya jwetu ali cisyasyo cambone mnope cakuŵa jwakuyamicila, atamose kwa ŵandu ŵakusawoneka mpela ŵangasosekwa. Lilemba lya Ahebeli 6:10 likusati, ‘Mlungu ali jwakulungama. Ngasaliŵalila masengo getu gitwatesile ni cinonyelo citwalosisye pa lina lyakwe.’ Mkupanganya jwetu akusayiwona kuti uli ungali cilungamo naga mundu ngakulosya kuyamicila.

“Asangalaleje ndaŵi syosope. Ayamicileje pa cilicose.”—1 Atesalonika 5:16, 18.

YISYESYENE YAKWE

Naga tukusayamicila kutyocela pasi pa mtima jwine patupele mtuka, patusalile maloŵe gambone, kapena patukamucisye m’litala lililyose, yikusamtendekasya mundu jwatukum’yamicilajo kulipikana kuti ali jwakusosekwa mnope. Atamose mundu jwangatukummanyilila akusasangalala mnope patum’yamicile ligongo lya yindu yambone yatutendele.

YAJIKUSASALA BAIBULO

Yesu Klistu jwatite, “M’ŵeje ŵakupeleka, nombe ŵandu cacimpa. Cacimkusulila m’misaku mwenu ni mpimo wambone, wegumbale, wecinyindile, soni wakwasicila.” (Luka 6:38) Kwende tulole cisyasyo ca msikana jwine jwangapikana soni jwangaŵeceta lina lyakwe Rose. Msikanaju akusatama pacilumba ca Vanuatu ku nyasa ja South Pacific.

Lisiku line, Rose jwapite ku misongano ja Mboni sya Yehofa, nambo mumpingomo mwaliji mwangali jwalijose juŵamanyililaga ciŵeceto camakono. Pali papite ndaŵi, liŵasa line lyalyamanyililaga cenene ciŵeceto camakonoci lyayice mumpingomo. Liŵasalyo lyayiweni kuti mukusosekwa cikamucisyo, m’yoyo lyatandite kwiganya ciŵeceto camakono. Rose jwayamicile mnope. Jwalakwe jwatite, “Ngusangalala ligongo lyakuti ngwete acimjangu ŵajinji ŵakusanonyela.” Liŵasalyo palyayiweni kuti Rose akuyamicila, soni kum’wona ali mkujigala nawo mbali pa misongano, lyasangalele mnope ligongo lyakuyiwona kuti ŵamkamucisye. Nombe najo Rose jwayamicile mnope pakwawona ŵandu ŵane ali mkulijiganya ciŵeceto camakono kuti apakomboleje kuŵecetana najo.—Masengo 20:35.

“Mundu jwakusayamicila akusaŵa mpela akupeleka mbopesi jakumcimbicisya [Mlungu].”—Salimo 50:23.

YAJIKUSASALA BAIBULO

Mwatukusapikanila mumtima yikusakamulana ni yatukusaganisya. Jwakulemba Baibulo jwine lina lyakwe Daudi jwapopesile kwa Mlungu kuti, “Nayiganicisye yakutenda yawo yosope, soni mbele ndili mkuganicisya masengo ga makono gawo ni mtima wosope.” (Salimo 143:5) Daudi jwasasile yeleyi pambesi pakumbucila masengo ga Mlungu. Ni ligongo lyakwe jwalakwe jwakwete mtima wakuyamicila.—Salimo 71:5, 17.

Baibulo jikusatusalila kuti, ‘Yindu yiliyose yakuwona, yakunonyelesya, yakuŵecetedwa cenene, yambone, soni yaucimbicimbi, ajendelecele kuyiganicisya yeleyi.’ (Afilipi 4:8) Maloŵe gakuti “ajendelecele kuyiganicisya yeleyi” gakulosya kuti tukusosekwa kuyiganicisyaga ndaŵi syosope. Kutenda yeleyi kucitukamucisya kola mtima wakuyamicila.

“Yaganicisya ya mumtima mwangu yiciŵa yalunda.”—Salimo 49:3.