Kwa yaka gejinji, pangali mundu atamose jumo jwapatile kwanga kwachiwusyochi. Ŵandu ŵajinji aŵele mkuwa ligongo lya yilwele yayikusawanda mwachitema. Kaneko ŵasayansi ŵamanyilile yisyesyene yakwe. Jemanjaji ŵapatile kuti yilwele yejinji yikusatanda ni majelemusi mpela mabakiteliya kapena mafayilasi. Kumanyilila yisyesyene, kukamuchisye ŵandu kuŵambala nambosoni kuposya yilwele. Yeleyi yitendekasisye kuti ŵandu mamiliyoni gejinji atameje ni umi welewu soni kola chilu chambone.

Uli pakwamba yiwusyo yine yakusosekwa? Ana akuganisya kuti kumanyilila yisyesyene yakwe yakwamba yiwusyo yakuyichisyayi mpaka kwakamuchisye chamtuli?

• Ana Mlungu ali ŵani?

• Ana Yesu Klistu ali ŵani?

• Ana Uchimwene wa Mlungu uli chichi?

• Ana kusogoloku chikutendekwe chichi?

Ŵandu mamiliyoni gejinji apatile kwanga kwa yiwusyoyi. Yeleyi yikamuchisye kuti ŵanduwo akole umi wambone. Kumanyilila kwanga kwa yiwusyoyi mpaka kwakamuchisyesoni wawojo.

Nambo mpaka aliwusyeje kuti, ‘Ana mpaka yikomboleche wuli kuti amanyilile yisyesyene yakwamba chindu chilichose?’ Kumanyilila yisyesyene yakwamba chindu chilichose mpaka kuwonecheje kuŵa kwakusawusya mnope. Ligongo chichi?

Ŵandu ŵajinji ngakusakulupilila ŵaboma, ŵamalonda kapena ŵagulusya ngani kuti mpaka ŵasalile yisyesyene. Yikusaŵa yakusawusya kuti ŵandu amanyilile naga yakwasalila yili yisyesyene, nganisyope, akwasisila yindu yine yakwe kapenasoni akwalambusya kwene. Ligongo lyakuti ŵandu ngakusakulupililana soni ngani syejinji sili syaunami, ŵandu alesile kukulupilila yindu yayili yisyesyene soni yampaka yakamuchisye.

Mwangasamala kandu ni yeleyi, yili yakomboleka kupata kwanga kwa yiwusyo yakusosekwa mnope yakwamba umi. Mwamtuli? Mwakukamulichisya masengo lunda lwetu lwa lisiku lililyose.

Lisiku lililyose tukusawungunyaga yisyesyene yayitendekwe. Kwende tulole yiyamtendechele Jessica. Jwalakwe jwatite, “Mwanangu jwamkongwe jwa yaka 12 akusaŵengana mnope ni chiponde. Mwamti atamose ali agambile kulya panandi chiponde umi wakwe mpaka uŵe pangosi. Chindu chandanda chanatendaga mkanisume chaliji kuŵalanga kaje chipepala chamatile chakusala ya yindu yaŵakamulichisye masengo pakupanganya yakulyayo. Kaneko napitilisyagasoni kuwungunya mwakwawusya ŵaŵapanganyisye yakulya pakusaka kusimichisya naga muyakulyayo ngamukusimanikwa yindu yampaka yiŵiche umi wa mwanangu pangosi. Nakamulichisyagasoni yindu yine yakudalilichika pakusaka kusimichisya kuti ŵa kampani ŵakuyisye litala lyambone pakupanganya yakulyayo.” Jessica jwasosekwaga kumanyilila kuti yakulya yaŵasumaga nganiyiŵa yiŵisile umi wa mwanache jwakwe pangosi.

Lisiku lililyosye patukusaka kumanyilila yisyesyene mwine ngatukusatenda mpela Jessica, nambo mwakamulana ni Jessica mpaka tukamulichisye masengo matala gakuyichisyaga pakusaka kupata kwanga kwa yiwusyo yatukusakola:

• Tupateje maumboni.

• Tupitilisyeje kuungunyako.

• Tuŵeje ŵakusimichisya kuti tukuwungunya kumalo gakudalilichika.

Matalaga mpaka gatukamuchisye kumanyilila yisyesyene yakwamba yiwusyo yakusosekwa mnope yatukusakolaga. Mwamtuli?

Pakuwungunya yisyesyene ya m’Baibulo, Jessica jwakamulichisye litala lyakulandana ni liŵalikamulichisye pakuwungunya yakulya yanganiyikola yindu yampaka yimlwalikasye mwanache jwakwe. Jwalakwe jwatite, “Kuŵalanga mwakusamala soni kuwungunya chenene kwangamuchisye kupata yisyesyene ya m’Baibulo.” Mwakulandana ni Jessica, ŵandu mamiliyoni gejinji alijiganyisye yajikusasala Baibulo pakwamba ya yiwusyo yakuyichisyayi:

• Ligongo chichi twapali?

• Ana chichi chachikusatendekwa mundu pawile?

• Ligongo chichi tukusasimana ni yakusawusya?

• Ana Mlungu akutenda yamtuli pakusaka kumasya yakusawusya?

• Ana mpaka tutende yamtuli kuti tukole liŵasa lyakusangalala?

Mpaka apate kwanga kwakudalilichika kwa yiwusyo yeleyi soni yine pakuŵalanga Baibulo soni kuwungunya mwakwanila pa webusayiti jetu ja www.ps8318.com.