Mwakulandana ni chimbungo chelechi, wosopewe tukwembecheya chakutendekwa chele Yesu ŵachikolasile kuti, “Yisawusyo yakogoya kapena kuti yekulungwa.” (Mateyu 24:21) Nganituŵa tutisile yisawusyoyi. Nambo mpaka tutende yakomboleka kuti tukulupuche pa yisawusyoyi. Ana tukusosekwa kutenda chichi?

Pa ulaliki wakwe wa petumbi, Yesu Klistu jwasasile yampaka tutende. Jwalakwe jwatite, “Apitilisye kusosasosa Uchimwene chandanda ni chilungamo chakwe.” (Mateyu 6:33, NWT) Ana mpaka tutende chamtuli yeleyi?

Kusosa Uchimwene wa Mlungu chandanda. Yeleyi yikulosya kuti tukusosekwa kuwuwona Uchimwene wa Mlungu kuŵa wakusosekwa mnope kupunda chine chilichose. (Mateyu 6:25, 32, 33) Ligongo chichi tukusosekwa kuwuwona Uchimwenewu kuŵa wakusosekwa mnope? Ligongo lyakuti ŵakulamulila alepele kumasya yakusawusya ya ŵandu. Uchimwene wa Mlungupe ni wampaka ukombole kutenda yeleyi.

Kusosa chilungamo chakwe. Tukusosekwa kulingalinga kuti tutameje mwakamulana ni ndamo nambosoni malamusi ga Mlungu. Ligongo chichi tukusosekwa kutenda yeleyi? Ligongo naga tukusagula kutenda yindu mwatukuganichisya, yakuyichisya yakwe yikusaŵa yakusakala. (Misyungu 16:25) Nambosoni, naga tukutenda yindu mwakamulana ni ndamo sya Mlungu, ngatukusagamba kumsangalasya jwalakwepe nambo yikusatukamuchisyagasoni m’wejo.—Yesaya 48:17, 18.

Apitilisye kusosa Uchimwene wa Mlungu ni chilungamo chakwe chandanda. Yesu jwakalamwisye ŵandu kuti akaganisyaga kuti mpaka akole umi wambone  naga ali akwete mbiya syejinji. Ŵandu ŵane akusamalila ndaŵi soni machili gawo ali mkutenda yakomboleka kuti amalane ni yakusawusya ya lisiku lililyose. Yeleyi yikusiyatendekasya kuti alepeleje kusosa Uchimwene wa Mlungu chandanda.—Mateyu 6:19-21, 25-32.

Nambope, Yesu ŵasalile wosope ŵakusaŵika ya Uchimwene pamalo gandanda kuti chachikola yindu yakusayisaka apano soni chachiŵa ŵakusangalala msogolo.—Mateyu 6:33.

Atamose kuti ŵakumkuya ŵa Yesu ŵa m’yaka 100 yandanda ŵasosaga Uchimwene wa Mlungu chandanda nambosoni chilungamo chakwe, jemanjaji nganakuwona kumala kwa yakusawusya yosope mundaŵi jawo. Nambope Mlungu ŵasamalilaga. Ana ŵasamalilaga chamtuli?

Jemanjaji ŵatendaga yindu mwakuya ndamo syakulungama sya Mlungu. Yeleyi yakamuchisye kuti akasimana ni yakusawusya yakusasimana nayo ŵandu ŵangakuya malamusi ga Mlungu. Chikulupi chawo chamachili chakuti Uchimwene wa Mlungu uchiyika, chakamuchisye kuti apilile yakusawusya yaŵasimanaga nayo. Soni Mlungu ŵapele “machili” kuti akombole kupilila.—2 Akolinto 4:7-9.

Aklistu ŵa m’yaka 100 yandanda, ŵapikanile lilamusi lya Yesu lyakuti asoseje Uchimwene chandanda. Jemanjaji, ŵalalichilaga ngani syambone syakwamba Uchimwene m’madela gaŵatamaga. (Akolose 1:23) Ana masiku agano pana ŵandu ŵakusalalichilaga?

Elo apali. Ŵa Mboni sya Yehofa akusamanyililaga kuti kusigele ndaŵi jamnono kuti Uchimwene wa Mlungu uyiche kukumasya chilambo chakusakalachi. Myoyo jemanjaji akusatenda yakomboleka mwakupikanila maloŵe ga Yesu gakuti, “Ngani syambonesi syakwamba ya Uchimwene wa Mlungu tisichilalichidwa pachilambo chosope chapasi, kuti ŵandu ŵamitundu josope asipikane, kaneko mbesi ni tijichiyika.”—Mateyu 24:14.

Ana ali ŵakoseka kupikanila ngani syambonesi? Tukwalimbikasya kuti atendeje yindu mpela muŵatendele ŵandu ŵa m’yaka 100 yandanda ŵaŵatamaga ku Beleya. Jemanjaji ŵapikene ngani syambone kutyochela kwa ndumetume Paulo, nambosoni “ŵapikanichisyaga maloŵe ga Mlungu ni lung’wanu.” Mwamti, ‘Ŵaliji mkuŵalanga Malemba’ kuti asimichisye naga yindu yaŵayipikeneyo yaliji yakuwona, nambosoni ŵatendaga yindu mwakamulana ni yaŵalijiganyisyeyo.—Masengo 17:11, 12.

Wawojo mpaka atendesoni yakulandanayo. Naga akusosa Uchimwene wa Mlungu chandanda ni chilungamo chakwe, chachikola umi wambone apano nambosoni chachisangalala ni mtendele wangamala msogolo.