Chiŵandika ŵandu 5 biliyoni akwembecheya kuti chalolele masewela ga mpila wa FIFA World Cup gagachitanda pa 20 Nofemba mpaka pa 18 Disemba, 2022. Ŵajinji akuyiwona kuti yakutendekwa ya pa mpilayi mpaka yikole yakuyichisya yejinji konjechesya pakwakamulanya ŵandu pakulolela masewelaga.

•   Pulesidenti jwakala jwa ku South Africa, Nelson Mandela, jwatite: “Masewela ga mpila gakwete machili gakuchichenga chilambo. Gakwete machili gakwalimbikasya ŵandu. Nambosoni gakwete machili gakwalimbikasya ŵandu m’litala lyakusosekwa mnope.”

•   Che Gianni Infantino ŵali pulesidenti jwa FIFA, a ŵatite: “Mpila . . . ukusiwakamulanya ŵandu ligongo lyakuti ukusiwatendekasya kulipikana kuti akwete chimbecheyo, ukusiwakamuchisya kuŵa ŵakusangalala, ukusiwatendekasya kulipikana kuti akusiŵanonyela ŵandu ŵane nambosoni kuti akwete chinechakwe chakulandana.”

 Ana mpila wa World Cup kapena masewela ga mpila uliwose mpaka gakwanilisye yakulinga yeleyi? Ana pana chembecheyo chilichose cha mtendele soni mkamulano?

 Mpila wa World Cup wa chaka achino utendekasisye kuti ŵandu aganisyeje yejinji ngaŵaga ya mpilape. Mpilawu utendekasisye ŵandu kuti asisyaneje pangani jakwayana ni umi wa ŵandu nambosoni ndale yayikukwaya ufulu wa ŵandu, kusagulana mitundu, soni kusagulana pangani ja chipanje.

 Atamose kuti yili myoyo, ŵandu ŵajinji akusasangalala kulolela yakutendekwa ya mpila wa yilambo mpela mwayiŵelele ni mpila wa World Cup. Atamose kuti yeleyi mpaka yitendekweje, nambope nganiyiŵa yitendekasisye kuti ŵandu akamulaneje mpaka kalakala. Mmalomwakwe, ndaŵi syejinji yikusatendekasya kuti ŵandu agaŵikanganeje. Mwamti yeleyi ni yajasasile kala Baibulo kuti yichiŵa chimanyilo chakuti tukutama mundaŵi jajikusakolanjikwa kuti “masiku gakumalisya.”—2 Timoteyo 3:1-5.

 Baibulo jikusatupa chembecheyo chisyesyene cha pachilambo chosope. Jikusasala kuti ŵandu wosope ŵapachilambo chachiŵa ŵakamulana mu boma jakwinani jajikusamanyika kuti “Uchimwene wa Mlungu.”—Luka 4:43; Mateyu 6:10.

 Yesu Klistu jwali Mwenye jwa Uchimwenewu, chachilolechesya kuti pachilambo chosope pana mtendele. Baibulo jikusati:

•   “Mtendele uŵe wejinji pa ndaŵi ja umi wakwe ni yindu yambone yakupochela ŵandu.”—Salimo 72:7.

•   “Pakuŵa tachimkulupusya jwakusoŵa jutachigumilajo, . . . Tachikulupusya umi wawo ku ŵandu ŵawukali ni ŵakwasawusya.”—Salimo 72:12, 14.

 Atamosesoni masiku agano, yaŵajiganyisye Yesu yitendekasisye kuti ŵandu mamiliyoni ŵa m’yilambo 239 aŵe ŵakamulana. Jemanjaji akombwele kuleka kuŵengana ni ŵane. Kuti amanyilile yejinji, aŵalanje ngani jajikwete mitwe jakulekanganalekangana ja mtwe wakuti “Yampaka Tutende Kuti Tuleche Kwaŵenga Ŵane.”