Rofen ni dalip fen e maruwel ni kakadbul ko September 5, ko duw ni 2012, ma ka nog nga Bethel u Meriken nge Canada ni bay be’ nib beech ni ke mang reb i girdien fare Ulung ni Ma Pow’iyey ko Pi Mich Rok Jehovah. Me yan i September 1, 2012 me tabab Mark Sanderson ni nge un ko re maruwel ney.

Gallabthir rok Brother Sanderson ni yow e Kristiano e ra chugliyew u San Diego, California u Meriken, min taufenag ko rofen ni February 9, 1975. I tabab ni nge un ko machib u polo’ e tayim rok ko fare binaw ni Saskatchewan ni bay u Canada ko rofen ni September 1, 1983. Nap’an e pul ni December 1990 me mu’nag fa bin medlip e class ko Ministerial Training School (ngiyal’ ney e ka nog e Skul ni Fan ko Pi Walag ni Pumoon ni Yad Ba Muchugbil) u Meriken. Ma nap’an e pul ni April ko duw ni 1991, me mang reb e special pioneer ko fare donguch u Newfoundland, Canada. Nap’an ni be maruwel ni ir reb e substitute circuit overseer, min pining ni nge mang reb i girdien e maruwel u Bethel u Canada ko February, ko duw ni 1997. Me November 2000, min pi’ nge yan i maruwel ko branch u Meriken. I maruwel ko Hospital Information Services, me tomur riy me maruwel ko Service Department.

Nap’an e September 2008, me un Brother Sanderson ko fare Skul ni Fan ko Branch Committee me tomur riy min pi’ nga Philippines ni nge mang bang ko Branch Committee u rom. Ma nap’an e September ko duw ni 2010, ma kun pining ni nge sul nga Meriken nge pi’ e ayuw ko fare Service Committee ko fare Ulung ni Ma Pow’iyey.