FAN NI MA MARUWAR LANIYAN’ BOCH E GIRDI’: Kafin ni pirieg ni bay sogonap’an 100 e bilyon e planet ara boch ban’en u lan e lang ko galaxy rodad. Bochan nib ga’ e palpalth’ib, ma aram fan ni boor e girdi’ ni yad ma fith ni ma lungurad, ‘Mang fan ni ma yaliy e En Tasunmiy ni gubin ma rayog rok e tin ni ma rin’ e girdi’ u fayleng?’

N’EN NI BE FIL E THIN ROK GOT: Gathi kemus ni ke pi’ Got e thin rok ni aram e Bible ngodad, me pagdad ndab ki lemnagdad. Machane, ke micheg Jehovah ni gaar: “Bay gog ngom e tin ni ngam rin’ ma bay gu fonownigem.”​—Psalm 32:8.

Mu lemnag e n’en ni buch rok Hagar, ni be’ nu Egypt ko bin 20 e chibog B.C.E. Hagar e tapigpig rok Sarai machane yan i taw nga ba ngiyal’ ma daki tayfan Sarai, me chel Sarai nga i gafgownag, ma aram me mil Hagar nge yan nga daken e ted. Gur, bochan ni ke oloboch Hagar ma aram e be yip’ fan ni dakir lemnag Got? I gaar e Bible: “Me m’ug fare engel rok Somol ngak.” Re engel nem e pi’ e pagan’ ngak Hagar ni gaar: “Gur cha’ney ni kug guy e ereray faanem ni ma guyeg?”​—Genesis 16:4-13.

Fare Got ni ma ‘guyey’ e ku ma guyem. Ngad susunnaged e re n’ey: Bay reb e matin nri ma fal’eg i yaliy fak ya nge dabi buch ban’en rok, ma bochan nri kab achig fare tir mab t’uf ni nge tiyan’ e gallabthir rok ngak. Re n’ey e ku taareb rogon ngodad ni ma yaliydad Got u nap’an ni ke mulan’dad, mab mom ni ngan waliydad ko kireb. I yog Jehovah ni gaar: “Gu ma par u bang nib tolang ma ba thothup, ma kug ma par ko girdi’ nib sobut’an’ ma kar pied keru’rad ko kireb rorad, ya nge yog ni gu fulweg e pagan’ nge l’agan’ ngorad.”​—Isaiah 57:15, BT.

Dabisiy ni ga ma lemnag ko: ‘Uw rogon ni ma yaliyeg Got? Gur, ma yaliy yaag, ara ma yaliy e pi n’en ni bay u gum’irchaeg ya nge nang fan rarogog?’