第22章
王國實現上帝對地球嘅旨意
1,2．（甲）點解將樂園嘅希望睇得真實有時好唔容易？（乙）乜嘢可以强化我哋對上帝應許嘅信心？
一個忠心嘅弟兄嚟到王國聚會所。過咗充滿壓力嘅一日之後，佢感到非常疲累。佢唔單止受到尖酸刻薄嘅老闆苛待，仲要承受照顧家人嘅壓力，而且佢因為太太遭受病痛折磨而内心感到憂慮。隨住聚會開始嘅音樂響起，佢鬆咗一口氣，因為好開心可以同弟兄姊妹一齊喺王國聚會所。王國詩歌同樂園嘅希望有關，歌詞使佢聯想到將來嘅希望，好似身臨其境一樣。佢一直都好鍾意呢首歌。當佢同家人一齊唱呢首歌嘅時候，原本感到疲累嘅心，因為呢個希望而得到安慰。
2 你曾經係咪都有過噉嘅感覺呢？我哋當中好多人都會有。的確，生活喺呢個舊制度，要將樂園嘅希望睇得真實真係一啲都唔容易。而家係“難以應付嘅非常時期”，呢個世界同樂園有天淵之别。（提摩太後書3:1）乜嘢可以幫助我哋將樂園嘅希望睇得真實呢？我哋點知上帝嘅王國好快就會統治全人類呢？上帝嘅子民喺古代已經目睹過一啲耶和華所作嘅預言點樣應驗。等我哋一齊嚟分析吓呢啲預言，回顧一下呢啲同其他幾個類似嘅預言點樣喺今日以令人振奮嘅方式應驗。最後，隨住我哋嘅信心得到强化，我哋會集中睇吓呢啲預言對我哋嘅未來有乜嘢意義。
耶和華喺古代點樣實現佢嘅應許
3．乜嘢應許能够安慰被擄去巴比倫嘅猶太人？
3 請想像吓，喺公元前6世紀，被擄去巴比倫嘅猶太人過住點樣嘅生活。佢哋好多人都同父母一樣喺異鄉成長，生活得好艱苦。佢哋因為對耶和華有信心而遭受巴比倫人嘅嘲笑。（詩篇137:1-3）耶和華承諾會聚集佢嘅子民，使佢哋返回故土。幾十年過去嘞，忠心嘅猶太人依然謹記呢個美好嘅希望。耶和華講過，佢哋故鄉嘅情況會變得非常好。佢甚至將復興之後嘅猶大地比作美麗嘅伊甸園！（請讀以賽亞書51:3）上帝作出呢啲應許，顯然係為咗使佢嘅子民感到安心，消除困擾佢哋内心嘅疑慮。點解呢啲應許咁强化人心呢？請睇吓以下嘅預言。
4．耶和華點樣保證猶太人喺故鄉會得享平安？
4 安全 被擄嘅猶太人返去嘅地方實際上唔係一個樂園，而係一片荒廢咗70年嘅土地。佢哋當中大部分人連見都未見過呢片遙遠嘅故土。當時，喺聖經提到嘅呢片土地，棲息住獅子、狼、豹同其他兇猛嘅野獸。身為家主可能會諗：“我點樣保護妻子兒女呢？點樣保護啲牛羊呢？”有呢啲憂慮係好自然嘅。不過，請諗吓耶和華喺以賽亞書11:6-9（請讀）嘅應許幾咁令人安慰。耶和華用優美嘅言詞，向被擄嘅猶太人保證，佢哋同牲畜都會得享平安。經文提到獅子會食草，呢個意味住獅子唔會攻擊猶太人嘅牲畜。忠心嘅猶太人完全唔需要驚呢啲兇猛嘅野獸。因為耶和華承諾，佢嘅子民喺猶大故土，甚至喺荒野同森林都會大享平安。（以西結書34:25）
5．乜嘢預言幫助返回故土嘅猶太人確信耶和華會充分滿足佢哋嘅需要？
5 豐衣足食 佢哋亦都可能會有其他嘅憂慮，心諗：“喺重建嘅家園我有冇能力養起頭家呢？我哋有冇地方住呢？會唔會有適合嘅工作？會唔會好過喺巴比倫人嘅統治下做苦工呢？”耶和華好清楚佢哋嘅憂慮，所以通過預言嚟解答佢哋嘅疑問。耶和華承諾會祝福服從佢嘅子民，使大地風調雨順，結果土地會出産“豐富肥美”嘅食物。（以賽亞書30:23）關於住所同有意義嘅工作，耶和華向佢嘅子民承諾話：“佢哋會建造房屋，自己居住；栽種葡萄園，食自己所種嘅。佢哋建造嘅，唔會俾人佔據；佢哋栽種嘅，唔會俾人佔有。”（以賽亞書65:21,22）的確，佢哋嘅生活會比喺巴比倫作為俘虜美好得多。不過，最初導致佢哋被擄嘅嗰啲更重要嘅問題可唔可以得到解決呢？
6．長期以來，上帝嘅子民喺屬靈方面患有乜嘢疾病？耶和華作出乜嘢應許使返回故土嘅猶太人感到安慰？
6 屬靈健康 上帝嘅子民被擄之前有好長時間已經喺屬靈方面患病。耶和華通過以賽亞先知同佢嘅子民講：“你哋嘅頭已經病重，心亦都全然衰弱。”（以賽亞書1:5）耶和華俾佢哋勸告嗰時，佢哋就塞住耳仔唔聽，俾佢哋啟迪嗰陣，佢哋又眯埋雙眼唔理，所以佢哋喺屬靈方面的確又聾又盲。（以賽亞書6:10；耶利米書5:21；以西結書12:2）如果返回故土嘅猶太人依然有同樣嘅問題，佢哋又點會得享平安呢？佢哋唔係會再次失去耶和華嘅悦納咩？耶和華嘅應許真係令人感到非常安慰，佢話：“到嗰日，聾人會聽見書上嘅話，盲人眼中所見嘅唔再係幽暗漆黑。”（以賽亞書29:18）冇錯，耶和華會幫助嗰啲接受糾正同埋衷心悔改嘅人恢復屬靈嘅健康。只要佢哋繼續服從上帝，接受佢嘅教導，就能够從耶和華得到帶嚟生命嘅指引同啟迪。
7．上帝點樣實現佢對返回故土嘅猶太人嘅應許？點解呢個應許嘅實現可以强化我哋信心？
7 耶和華有冇信守承諾呢？通過歷史記載就可以知道答案。上帝賜福俾返回故土嘅猶太人，使佢哋得享安全，豐衣足食，仲享有屬靈嘅健康。例如，雖然周圍嘅民族都比猶太人强大，而且人數比佢哋多，但耶和華保護咗佢嘅子民。另外，猶太人嘅牲畜亦都冇俾猛獸食咗。雖然，以賽亞、耶利米同以西結等等嘅先知所預言嘅樂園景象只係得到部分嘅應驗，但上帝嘅子民大受鼓舞，因為呢個就係佢哋當時需要嘅。沉思耶和華為返回故土嘅猶太人所做嘅一切，可以强化我哋嘅信心。呢個預言只係初步應驗都已經咁令人興奮，將來完全應驗嘅時候又會點樣呢？請睇吓耶和華今日為我哋成就咗啲乜嘢。
耶和華喺今日點樣實現佢嘅旨意
8．今日，上帝嘅子民享有一片點樣嘅“土地”？
8 耶和華嘅子民並冇組成一個實際嘅國家，亦都唔係住喺同一個地方。反而，受膏基督徒組成咗一個屬靈嘅國族，即係“上帝嘅以色列”。（加拉太書6:16）佢哋同“另外嘅綿羊”一齊喺呢片屬靈嘅“土地”上，團結一致崇拜耶和華上帝。呢種崇拜就係佢哋嘅生活方式。（約翰福音10:16；以賽亞書66:8）耶和華賜俾我哋嘅係一片點樣嘅“土地”呢？係屬靈嘅樂園。耶和華應許我哋會喺伊甸園一樣嘅環境下生活，今日呢個預言已經喺屬靈方面應驗咗。請睇吓一啲例子。
9,10．（甲）以賽亞書11:6-9嘅預言喺今日點樣應驗？（乙）乜嘢證據表明上帝嘅子民追求和睦？
9 安全 以賽亞書11:6-9嘅預言描述咗一種和平安寧嘅美好環境。喺呢個環境裏面，人類、家畜同野生動物之間都可以和睦共處。今日，呢個預言有冇喺屬靈方面應驗呢？有！點解野生動物唔會造成任何傷害或者破壞呢？經文嘅第9節將原因話俾我哋知：“因為認識耶和華嘅知識必定遍滿大地，就好似水彌漫海洋一樣。”動物會唔會因為認識“耶和華嘅知識”而改變佢哋嘅行為呢？唔會。其實人類先至能够通過認識至高嘅上帝改變自己，而且效法佢用和平嘅方式嚟解決問題。所以，我哋可以喺今日嘅屬靈樂園睇到呢個令人鼓舞嘅預言實現。喺王國嘅統治之下，基督嘅門徒學習點樣除去野獸一樣嘅兇殘品性，同屬靈嘅弟兄姊妹正享有融洽嘅關係同和平嘅生活。
10 例如，我哋已經喺呢本書討論過同基督徒中立有關嘅事，包括保持中立嘅聖經根據，同埋上帝嘅子民因為保持中立而遭受嘅迫害。喺呢個充滿暴力嘅世界，有一大群人就算面對死亡嘅威脅都依然拒絶使用任何形式嘅暴力，呢個唔係好令人難以置信咩？呢一切有力噉表明，彌賽亞君王嘅子民的確享有以賽亞書所講嘅和平！耶穌話佢嘅門徒會因為彼此相愛而為人所知。（約翰福音13:34,35）喺會衆當中，基督正通過佢“忠信睿智嘅奴隸”耐心噉教導所有真基督徒追求和睦，以仁愛，温和嘅態度待人。（馬太福音24:45-47）
11,12．今日嘅世界喺邊方面遭受饑荒？而耶和華點樣向佢嘅子民提供充足嘅供應？
11 豐衣足食 呢個世界正遭受屬靈嘅饑荒。至高嘅主宰耶和華喺聖經發出一個警告，話：“睇吓！日子快到嘞，我要將饑荒降喺地上。人遭遇饑荒唔係因為缺糧，乾渴亦都唔係因為缺水，而係因為缺乏耶和華嘅話。”（阿摩司書8:11）上帝王國嘅子民係咪都同樣要挨餓呢？耶和華預告佢嘅子民同佢嘅仇敵之間會有以下嘅鮮明對比：“我嘅僕人必得吃，而你哋就飢餓。我嘅僕人必得喝，而你哋就乾渴。我嘅僕人必歡喜，而你哋就蒙羞。”（以賽亞書65:13）你有冇睇見呢啲話語應驗呢？
12 我哋得到嘅屬靈供應越來越豐富，好似滔滔嘅河水不斷向我哋湧嚟。喺呢個屬靈饑荒嘅世界裏面，我哋基於聖經嘅出版物，例如錄音、影像、聚會同大會，仲有網站嘅資料，呢啲靈糧好似潮水一樣不斷上漲。（以西結書47:1-12；約珥書3:18）你喺自己嘅日常生活中，睇見耶和華兑現承諾，提供豐富嘅靈糧，一定感到非常振奮！你有冇經常吸收耶和華所賜嘅靈糧呢？
會衆幫助我哋喺屬靈方面豐衣足食，得到安全同健康
13．關於恢復屬靈視力同聽覺，你見到耶和華點樣實現呢個應許？
13 屬靈健康 屬靈上嘅眼盲耳聾係今日呢個世界嘅通病。（哥林多後書4:4）不過，基督喺全球各地醫治緊屬靈方面患病嘅人。你有冇見過盲人恢復視力，聾人恢復聽覺呢？如果你見到有人認識聖經嘅確切知識之後，擺脱曾經遮住佢哋眼睛同塞住佢哋耳朵嘅錯誤宗教道理，噉你就已經見到以下嘅應許喺佢哋身上應驗：“到嗰日，聾人會聽見書上嘅話，盲人眼中所見嘅唔再係幽暗漆黑。”（以賽亞書29:18）喺全世界，每年都有成千上萬嘅人得到呢啲屬靈醫治。每一個離開大巴比倫，同我哋一齊喺屬靈樂園裏面支持正確崇拜嘅人，都係活生生嘅證據，證明耶和華嘅應許已經實現！
14．沉思乜嘢證據可以强化我哋嘅信心？
14 呢本書嘅每一章都提出有力嘅證據，證明基督喺呢段最後嘅日子已經帶佢嘅門徒進入咗一個真真正正嘅屬靈樂園。我哋要不斷沉思喺今日呢個樂園當中自己得到嘅各種福分，噉樣，我哋嘅信心就會繼續得到强化，確信耶和華對未來嘅應許必然實現。
“願你嘅王國來臨”
15．點解我哋可以肯定地球會成為樂園？
15 耶和華嘅旨意一直以來都係要使整個地球成為樂園。佢俾亞當同夏娃住喺一個美麗嘅園子裏面，吩咐佢哋要繁衍後代，使子孫遍滿地面，亦都要照顧各種各樣嘅動物。（創世記1:28）不過，亞當同夏娃跟從撒但反叛上帝，導致佢哋所有嘅後代都變得唔完美，不得不面對罪同死亡。即使係噉，上帝嘅旨意從來都冇改變。佢嘅説話一旦講出就必定會完全實現。（請讀以賽亞書55:10,11）我哋可以確信，整個地球會成為樂園，亞當同夏娃嘅後代將會遍滿地面，開拓大地，悉心照顧耶和華創造嘅動物。到時，耶和華向猶太人講嘅關於樂園生活嘅預言就會完全實現！請睇吓以下嘅例子。
16．聖經點樣描述我哋喺樂園享有安全嘅生活？
16 安全 以賽亞書11:6-9所描述嘅呢個温馨場景，最終會喺現實當中完全實現。無論男人定女人，大人定細路，去到世界嘅任何地方都會受到保護，感到安全。無論人類定係動物，所有嘅生物都和睦共處，唔會互相傷害。請想像吓，到時你會將整個地球都當成自己屋企，你可以喺大海、湖泊、河流暢泳，可以自由自在噉穿越山脈，或者喺草原上漫步，無論喺邊度你都完全唔需要擔心自己嘅安全。就算黑夜降臨，你都唔會感到不安。以西結書34:25嘅預言將會實現，使上帝嘅子民甚至可以“喺曠野安居，喺森林入面瞓覺”。
17．點解我哋可以肯定，王國統治遍及全球嗰時耶和華會滿足我哋嘅一切需要？
17 豐衣足食 請想像一下，唔再有貧窮、營養不良或者饑荒，連福利制度都唔需要嘅時候會係一番點樣嘅景象。上帝嘅子民今日所享有嘅屬靈富足，證明彌賽亞君王一定會滿足佢子民嘅一切需要。當耶穌喺地上嘅時候，佢只係用咗幾個餅同幾條魚，就餵飽咗幾千個飢餓嘅人，證實佢有能力使全人類豐衣足食。（馬太福音14:17,18；15:34-36；馬可福音8:19,20）當上帝嘅王國喺全球施行統治嘅時候，以下嘅預言就會完全實現：“你撒種喺地上，主必降雨，使土地出産豐富肥美嘅食物。到嗰日，你嘅牲畜都會喺廣闊嘅牧場上食草。”（以賽亞書30:23）
18,19．（甲）以賽亞書65:20-22嘅預言對你有乜嘢意義？（乙）我哋嘅壽命會“好似樹木嘅壽命”係乜嘢意思呢？
18 今日，好多人都難以想像自己會擁有一個舒適嘅家或者有一份心滿意足嘅工作。喺呢個腐敗嘅制度下，好多人長時間辛苦工作，但只能够為自己同家人賺到好少嘅報酬，相反，大部分嘅利益都俾嗰啲富有而且貪婪嘅人吞占晒。請想像吓，以下預言喺全世界應驗嗰時嘅景象：“佢哋會建造房屋，自己居住；栽種葡萄園，食自己所種嘅。佢哋建造嘅，唔會俾人佔據；佢哋栽種嘅，唔會俾人佔有。我子民嘅壽命，會好似樹木嘅壽命。我所揀選嘅人一定可以充分享受自己勞碌嘅成果。”（以賽亞書65:20-22）
19 我哋嘅壽命會“好似樹木嘅壽命”，呢句話係乜嘢意思呢？當你企喺一棵巨大嘅樹下面嗰時，你會諗呢棵樹到底已經存在咗幾耐，可能喺你爺爺嫲嫲嘅父母出世之前，呢棵樹已經存在咗好耐嘞。你會唔會好自然就産生一種肅然起敬嘅感覺呢？或者你可能會諗到，就算有一日你唔喺世上，已經成為人哋嘅回憶之後，呢棵大樹仲係會喺度伸展枝葉繼續生長。但係，耶和華仁愛噉保證，我哋喺將來嘅樂園會得到永生，大享平安！（詩篇37:11,29）喺將來嘅日子，即使係呢啲長壽嘅大樹，對我哋嚟講都只不過好似小草噉樣轉瞬即逝，而我哋就會享有永遠嘅生命！
20．上帝王國嘅忠貞子民會點樣享有完美嘅健康？
20 完美嘅健康 今日，疾病同死亡嘅陰影籠罩住整個世界。喺某種意義上嚟講，我哋所有人都感染咗一種叫做罪嘅不治之症。唯一嘅解救方法就係基督嘅贖價。（羅馬書3:23；6:23）喺千年統治期間，耶穌以及同佢一齊作王嘅人會使贖價嘅益處喺忠心嘅人身上完全發揮出嚟，逐漸消除所有罪嘅影響。以賽亞嘅呢個預言將會徹底應驗：“唔會再有居民話：‘我有病。’住喺地上嘅人，罪都會被赦免。”（以賽亞書33:24）請想像吓，到時唔會再有盲眼、耳聾、跛腳嘅人。（請讀以賽亞書35:5,6）無論係身體上、精神上、抑或感情上，所有嘅疾病耶穌都有能力醫治。上帝王國嘅忠貞子民都會享有完美嘅健康！
21．死亡最終會點呢？點解你可以從呢個應許得到安慰？
21 因為罪，我哋都會患病，亦都無可避免要面對死亡，噉死亡最終又會點呢？死亡係我哋“最後嘅仇敵”，唔完美嘅人類最終都難免一死。（哥林多前書15:26）不過對耶和華嚟講，死亡係咪一個冇辦法對付嘅仇敵呢？請留意以賽亞所預告嘅：“佢一定會永遠吞滅死亡。至高主宰耶和華要擦去所有人面上嘅眼淚”。（以賽亞書25:8）你能唔能够想像呢個情景呢？到時，唔會再有葬禮、墳墓同悲傷嘅淚水，而會充滿喜樂嘅眼淚！因為耶和華實現佢激動人心嘅應許，使死去嘅人重獲生命！（請讀以賽亞書26:19）最後，死亡所帶嚟嘅無盡痛苦都會被通通消除。
22．彌賽亞王國實現上帝對地球嘅旨意嗰時，會發生乜嘢事？
22 到千年統治結束嘅時候，王國已經實現上帝對地球嘅旨意，基督就會將統治權交還俾佢父親。（哥林多前書15:25-28）到時，撒但會從無底深淵釋放出嚟，已經恢復完美嘅人類就要面對一場最終嘅考驗。之後，基督就會採取行動，最終將邪惡嘅撒但同佢所有嘅支持者徹底毁滅。（創世記3:15；啟示錄20:3,7-10）而所有忠貞愛戴耶和華嘅人都會有一個光明嘅前景。對於呢個前景，聖經作咗最好嘅描述，就係忠心嘅人會享有“上帝兒女榮耀嘅自由”。（羅馬書8:21）
上帝嘅王國會實現耶和華關於人類同地球嘅所有應許
23,24．（甲）點解上帝嘅應許一定會實現？（乙）你決心點樣做？
23 呢啲應許唔單單係希望、願望或者夢想。耶和華嘅應許一定會實現！點解呢？喺呢本書第一章我哋討論過耶穌所講嘅話。佢教導門徒向耶和華禱告，話：“願你嘅王國來臨。願你嘅旨意喺地上實現，好似喺天上一樣。”（馬太福音6:9,10）上帝嘅王國唔係人想像出嚟嘅，而係真實嘅！呢個王國而家正喺天上施行統治。一百年來，我哋可以喺基督徒會衆當中清楚睇見，上帝嘅王國喺好多方面已經實現咗耶和華嘅應許。所以我哋可以確信，當上帝嘅王國來臨，完全統治地球嗰時，耶和華嘅所有應許就會實現！
24 我哋知道上帝嘅王國一定會來臨，耶和華嘅每個應許一定會實現。點解呢？因為上帝嘅王國統治嘞！我哋可以問吓自己：“我嘅生活方式係咪表明自己接受王國嘅統治呢？”我哋而家就要喺生活上盡力表明自己係王國嘅忠貞子民，噉就可以從王國完美正義嘅統治永遠得益！
