Ruzeete’ Biblia zazaaca caadxi cosa ne ximodo zaca xpia’ binni ni zacane laanu gánnanu pabiá’ ma’ gaxha nuu «dxi guiluxe guidxilayú riʼ» (Mateo 24:3). Stiidxa’ Dios ribee lá ca dxi ri’ «tiempu sti’ fin» ne «ca últimu dxi» (Daniel 8:17, 19; 2 Timoteo 3:1).

 Maca bizeete’ Biblia juntu zazaaca caadxi cosa ne laacani nga «señal» sti’ ca últimu dxi (Lucas 21:7). Guzé’tenu caadxi ejemplu:

 Zaca guerra lu guidubi Guidxilayú. Guní’ Jesús «zadinde ti guidxi ne sti guidxi ne zucaalú ti reinu sti reinu» (Mateo 24:7). Ne lu Apocalipsis 6:4 ruchaaga Biblia ca guerra ca ne ti jinete ni zabee «paz ndaaniʼ guidxilayú».

 Hambre. Maca guní’ Jesús ziuu «hambre» (Mateo 24:7). Laaca cuzeete’ Apocalipsis de sti jinete, ni zedané hambre stale lugar ndaani’ Guidxilayú ri’ (Apocalipsis 6:5, 6).

 Xu ro’. Guní’ Jesús «zaca xu roʼ ti lugar ne sti lugar», ndi’ riní’ zácani lu guidubi Guidxilayú (Mateo 24:7; Lucas 21:11). Jma zuniná ca xu ri’ ni ne zuuti ca ni binni.

 Guendahuará. Maca guní’ Jesús ziuu epidemia de «guiráʼ clase guendahuará» (Lucas 21:11).

 Binni quéiquiiñe’. Neca maca huayuu tipu binni ri’, peru guní’ Jesús jmaru’ si zadale «guendaquéiquiiñeʼ» lu ca últimu dxi (Mateo 24:12).

 Cunitilúcabe planeta ri’. Lu Apocalipsis 11:18 ná cunitilú binni, guidxilayú ri’. Ne cadi pur ca guendaquéiquiiñe’ si stica’, sínuque laaca cayuni contaminar ca ni.

 Jma feu zaca xpia’ binni. Cuzeete’ Biblia ximodo zaca xpia’ stale binni: «Qué zácacaʼ binni agradecidu ne zucheenecaʼ binni […], qué zanacaʼ chuʼcaʼ de acuerdu, zaniʼcaʼ mal de sti binni para guninacaʼ ne qué zucueezacaʼ laacaʼ, zácacaʼ naduxhuʼ ne zaca nanaláʼdxicaʼ guiráʼ ni jneza. Zuni traicionarcaʼ binni ne zácacaʼ tercu, zácacaʼ orgulloso» (2 Timoteo 3:1-4). Pur modo xpiá’cabe ri’ Biblia ná «jma nagana zaca tiempu ne nadipaʼ zaca para binni guni huantar ni».

 Ma’ qué ziuu ca familia ca tobi si. Cayabi Biblia laanu lu 2 Timoteo 3:2, 3 ziuu stale binni ni ma’ qué zannaxhii xfamilia ne ma’ qué zaná ca ba’du’ ca guzuubacaʼ «stiidxaʼ jñaacaʼ ne stiidxaʼ bixhózecaʼ».

 Zusaana binni de gannaxhii Dios. Dxi guní’ Jesús «stale binni zusaana de gannaxhii», ni cani’be ra ri’ nga stale binni zusaana de gannaxhii Dios (Mateo 24:12). Ne lu 2 Timoteo 3:4 laaca cuzeete’, lu ca últimu dxi ca, jma zacá íque ca binni ri’ «gúnicaʼ ni riuuláʼdxicaʼ que gannaxhiicaʼ Dios».

 Ca ni ná zinanda Dios. Maca guní’ Biblia lu 2 Timoteo 3:5, stale binni zani’ runi adorar Dios, peru pur modo nabánica’ zusihuínnica’ cadi dxandí’ ni.

 Jma ziene chaahuicabe ca profecía sti’ Biblia. Maca guní’ libru sti’ Daniel «lu tiempu gueeda fin» stale tu ziene ca ni dxandí’ zeeda lu Biblia. Ne ti ejemplu de laani nga ma’ cayene chaahuicabe ca profecía ni caní’ de tiempu ri’ (Daniel 12:4).

 Zareeche stiidxa’ Dios lu guidubi guidxilayú. Maca guní’ Jesús: «zaca predicar ca noticia galán stiʼ Reinu lu guidubi guidxilayú» (Mateo 24:14).

 Qué zaná binni gucaadiaga ne zuni burla. Guní’ Jesús stale binni qué zulabi ca prueba ni rusihuinni ma gaxha nuu fin (Mateo 24:37-39). Ne cadi ngasi, lu 2 Pedro 3:3, 4 ná dede zuni burla ca binni ri’ ca prueba ca ne zaní’ ca cadi dxandí’ ca ni.

 Zaca cumplir guirá’ ca profecía ca. Guní’ Jesús juntu zaca cumplir guirá’ ca profecía ri’ lu ca últimu dxi, ne cadi caadxigá o tobi pur tobi (Mateo 24:33).

 Ma’. Guirá’ ni cazaaca lu Guidxilayú ne ca ni rusiidi’ Biblia rusihuinni ca ni bizulú ca últimu dxi ri’ lu iza 1914, ne lu iza ca nga guca Primera Guerra Mundial. Lu videu ni chitiidi’ ri’ zuuyu’ ximodo guirá’ ni cazaaca lu Guidxilayú rusihuinni ca ni ma’ nabáninu lu ca últimu dxi:

 Bizulú bi’ni’ mandar Reinu sti’ Dios guibá’, lu iza 1914. Ne primé ca ni bínibe nga guládxibe Binidxaba’ ne ca demonio sti’ de guibá’. Dede dxi que, má ndaani’ Guidxilayú si cudiibe lugar chu’ca’ (Apocalipsis 12:7-12). Rihuínnica caguite Binidxaba’ binni purti’ feu xpia’ca’ ne guirá’ ni rúnica’. Nga runi lu ca últimu dxi ri’ «jma nagana zaca tiempu ne nadipaʼ zaca para binni guni huantar ni» (2 Timoteo 3:1).

 Nabé stale binni cadxibi purti’ nagana ca dxi ri’. Nuuca’ xizaa purti’ canitilú binni Guidxilayú. Dede nuu tu ridxibi pa málasi tindesaa binni.

 Peru laaca nuu binni, neca nuuca’ xizaa pur ca dxi nabé nagana ri’, peru nápaca’ esperanza zabánica’ galán huidxegá si. ¿Xiñee ya’? Purti’ nannadxíchicabe ma’ cadi candaa zabee Reinu sti’ Dios guirá’ ca guendanagana ni nuu lu Guidxilayú ri’ (Daniel 2:44; Apocalipsis 21:3, 4). Laga cabézacabe ne paciencia guni cumplir Dios ca ni ma’ bizabiruaa, ratadxí ladxidó’cabe lu ca diidxa’ ni guní’ Jesús ri’: «tu guni huantar dede ora gueeda fin la? zalá» (Mateo 24:13; Miqueas 7:7).