1. ¿Ximodo zanda gánnanu xi chiguizaaca despué?

ZÁNDACA ora ruuyaluʼ noticia, huayúniluʼ pregunta riʼ: «¿Ñee ziuu dxi guiree ca cosa malu ca la?». Cumu cayaca stale desgracia ne nuu stale cosa malu la? nuu binni riníʼ ique mayaca guinitilú Guidxilayú riʼ. ¿Ñee dxandíʼ ni la? ¿Ñee zanda gánnanu xi chiguizaaca despué la? Zanda. Neca qué ganna binni xi chiguizaaca despué, peru Jehová nanna ni. Lu Biblia cayabi Jehová laanu xi chiguizaaca despué ne xi chiguizaaca Guidxilayú riʼ (Isaías 46:10; Santiago 4:14).

2, 3. a) ¿Xi nuu ca discípulo stiʼ Jesús gánnacaʼ? b) ¿Xi bicabi Jesús laacabe?

² Ora riete lu Biblia chiguinitilú guidxilayú riʼ, cadi caníʼ diʼ ni chiguinitilú Guidxilayú ra nabáninu riʼ, sínuque guiráʼ ca cosa malu nuu ndaaniʼ ni. Purtiʼ Jesús bisiidiʼ zuni mandar Reinu stiʼ Dios lu Guidxilayú riʼ (Lucas 4:43). Cumu racalaʼdxiʼ ca discípulo stibe gánnacaʼ padxí gueeda Reinu ca la? gunabadiidxacaʼ laabe: «¿Padxí gaca guiráʼ cosa ca, ne xi señal gusihuinni presencia stiluʼ ne dxi guiluxe guidxilayú riʼ?» (Mateo 24:3). Qué ñabi diʼ Jesús laacabe padxí peʼ gaca ni, peru gudxi laacabe xi chiguizaaca ante guinitilú guidxilayú malu riʼ. Ne tiempu riʼ cayaca cumplir guiráʼ ni guníʼ Jesús. (Biindaʼ nota 24, «Ca últimu dxi»).

³ Lu capítulo riʼ chiguidúʼyanu caadxi prueba ni rusihuinni  mayaca guinitilú guidxilayú riʼ. Peru pa racaláʼdxinu gánnanu xiñee nuu stale cosa malu ndaaniʼ Guidxilayú riʼ la? primeru caquiiñeʼ gánnanu de ti guerra ni guca guibáʼ.

4, 5. a) ¿Xi guca guibáʼ despué de bizulú biʼniʼ mandar Jesús? b) Casi ná Apocalipsis 12:12, ¿xi guca despué de bilaa Jesús Binidxabaʼ ndaaniʼ Guidxilayú riʼ?

⁴ Lu capítulo 8 bizíʼdinu bizulú biʼniʼ mandar Jesús guibáʼ lu iza 1914 (Daniel 7:13, 14). Lu libru Apocalipsis riete xi bizaaca despué, racá ná: «Bizulú ti guerra guibáʼ. Bicaalú Miguel ne ca ángel stiʼ dragón que. Ne dragón que ne ca ángel stiʼ laaca bicaalucaʼ». Miguel * nga Jesús, dragón ca nga Binidxabaʼ. Biniti Binidxabaʼ ne ca demonio stiʼ guerra riʼ ne bilaa Jesús laacabe ndaaniʼ Guidxilayú riʼ. ¡Guizáʼ biecheʼ ca ángel ni nuu guibáʼ! Peru ¿xi guizaaca né ca binni ni nabani ndaaniʼ Guidxilayú riʼ yaʼ? Biblia ná guizáʼ zuni sufrir binni guidxilayú. ¿Xiñee yaʼ? Purtiʼ nabé cadxiichi Binidxabaʼ ne «nanna maʼ huaxiéʼ tiempu napa» (Apocalipsis 12:7, 9, 12).

⁵ Cayuni Binidxabaʼ stale cosa malu ndaaniʼ Guidxilayú. Guizáʼ cadxiichibe purtiʼ maʼ cadi candaa maʼ qué zudii Jehová lugar gúnibe cosa malu lu Guidxilayú. Guidúʼyanu xi guníʼ Jesús zazaaca lu «ca últimu dxi» riʼ.

6, 7. ¿Xi zanda guininu de ca guerra ne hambre ni nuu tiempu riʼ?

⁶ Guerra. Jesús guníʼ: «Zadinde ti guidxi ne sti guidxi ne zucaalú ti reinu sti reinu» (Mateo 24:7). Qué huayuu  dxi gatiʼ stale binni lu guerra biaʼ cayati tiempu riʼ. Ti organización ni ruuyaʼ ni cazaaca lu Guidxilayú riʼ ná, dede lu iza 1914 maʼ guti jma de 100 millón binni lu guerra. Peru entre lu iza 1900 ne 2000, o lu ti gayuaa iza ca maʼ guti chonna biaje jma binni pur guerra que biaʼ binni guti lu 1,900 iza ni maʼ gudiʼdiʼ ca. Guníʼ ique guiráʼ yuubaʼ huadiʼdiʼ binni ne modo huayuni sufrir millón de laacaʼ.

⁷ Ziuu hambre. Sicaríʼ guníʼ Jesús: «Ziuu hambre» (Mateo 24:7). Neca tiempu riʼ nuu stale guendaró jma que dxiqué la? stale binni guiráʼ dxi qué gapa ni gó. ¿Xiñee yaʼ? Purtiʼ qué gápacabe bueltu para sícabe ni gócabe ne qué gápacabe layú para uguucabe biní. Tobi de cada chii binni guizáʼ pobre laa. Organización Mundial de la Salud ná millón de xcuidihuiiniʼ rati cada iza purtiʼ qué gápacaʼ ni gocaʼ.

8, 9. a) ¿Ximodo cayaca cumplir ni guníʼ Jesús de ca xu roʼ? b) ¿Xi zanda guininu de guendahuará?

⁸ Xu roʼ. Jesús guníʼ: «Zaca xu roʼ» (Lucas 21:11). Dede lu  iza 1900 huayati jma de chupa millón de binni pur ca xu roʼ. Ne nácabe cada iza zácaruʼ stale xu roʼ. Neca nuu stale tecnología ni racané binni ganna chigaca ti xu la? rátiruʼ binni pur laacani.

⁹ Guendahuará. Maca guníʼ Jesús ziuu «guiráʼ clase guendahuará» malu ni zareeche nagueenda ne zuuti stale binni (Lucas 21:11). Neca stale guendahuará rusianda ca doctor, peru nuu de laacani qué randa rusiándacaʼ. Ne ti informe ná rati millón de binni cada iza pur ca guendahuará casi tuberculosis, cólera, malaria (o paludismo), cáncer ne guendahuará de corazón. Ne lu ca últimu 40 iza riʼ maʼ bidxélacabe jma de 30 guendahuará, ne stale de laacani qué rianda.

10. Casi ná 2 Timoteo 3:1-5, ¿ximodo zaca binni lu ca últimu dxi riʼ?

¹⁰ Biblia ná lu 2 Timoteo 3:1-5: «Lu ca últimu dxi ca jma nagana zaca tiempu ne nadipaʼ zaca para binni guni huantar  ni». Ne sicaríʼ guníʼ apóstol Pablo zaca binni lu ca últimu dxi riʼ:

• Zuyúbicaʼ puru si para laacaʼ.

• Zannaxhiicaʼ bueltu.

• Qué zuzuubacaʼ stiidxaʼ jñaacaʼ ne bixhózecaʼ.

• Zucheenecaʼ binni.

• Qué zannaxhiicaʼ familia sticaʼ.

• Qué zucueezacaʼ laacaʼ.

• Zácacaʼ naduxhuʼ.

• Zacá íquecaʼ gúnicaʼ ni riuuláʼdxicaʼ que gannaxhiicaʼ Dios.

• Zaniʼcaʼ nadxiicaʼ Dios, peru qué zúnicaʼ ni nabe.

11. Pur ni ná Salmo 92:7, ¿xi zazaaca ca binni malu?

¹¹ ¿Ñee zacá binni neza ra nabézaluʼ la? Nuu stale binni zacá lu guidubi naca Guidxilayú riʼ. Peru maʼ cadi candaa zuni Dios xiixa para guni chaahuiʼ guendanagana riʼ. Laabe maʼ guniʼbe: «Ora guidale binni malu casi rindani guixi malu ne guidale binni qué iquiiñeʼ, zanitilucaʼ para siempre». Ni ná ca diidxaʼ  riʼ nga zanitilú ca binni malu para siempre (Salmo 92:7).

12, 13. ¿Xi maʼ bisiidiʼ Jehová laanu lu ca últimu dxi riʼ?

¹² Biblia ná ziuu stale yuubaʼ ne zuni sufrir binni ndaaniʼ Guidxilayú riʼ lu ca últimu dxi. Peru laaca ruzeeteni zazaaca cosa galán.

¹³ Ziene chaahuiʼ binni ni rusiidiʼ Biblia. Ora bicaa profeta Daniel xi chiguizaaca lu ca últimu dxi riʼ, guníʼ: «Guizáʼ ziénecabe xii nga ni dxandíʼ» (Daniel 12:4). Ndiʼ riníʼ zacané Dios xquidxi guiene chaahuiʼ ni rusiidiʼ Biblia. Ne dede lu iza 1914 huayaca cumplir ni. Guzéʼtenu caadxi cosa ni maʼ huayuni Dios. Maʼ bisiidibe laanu pabiáʼ risaca labe ne xi naguixhe íquebe para Guidxilayú riʼ. Laaca maʼ bisiidibe laanu ni dxandíʼ de rescate, ni rizaacanu ora rátinu ne esperanza ni nuu de guibani ca ni maʼ guti. Maʼ bizíʼdinu Reinu stiʼ Dios si nga zanda guni chaahuiʼ guiráʼ ca guendanagana ni nápanu. Ne laaca maʼ bizíʼdinu ximodo chuʼnu nayecheʼ ne guibáninu modo riuulaʼdxiʼ Dios. Peru ¿xi runi ca xpinni Dios né guiráʼ ni riziidicaʼ yaʼ? Sti profecía zacané laanu gánnanu respuesta riʼ. (Biindaʼ nota 21, «Rescate», ne 25, «Resurrección»).

14. ¿Pa idubi cayaca predicar ca noticia galán stiʼ Reinu, ne tuu nga cayuni dxiiñaʼ riʼ?

¹⁴ Zaca predicar lu guidubi Guidxilayú. Ora bizeeteʼ Jesús de ca últimu dxi, guníʼ: «Zaca predicar ca noticia galán stiʼ Reinu lu guidubi guidxilayú» (Mateo 24:3, 14). Cayaca predicar ca noticia galán stiʼ Reinu ndaaniʼ biaʼ 240 país ne territorio ne biaʼ ti mil idioma.  Lu guidubi Guidxilayú, ca testigu stiʼ Jehová «de guiráʼ nación» cayacanecaʼ binni ganna xii nga Reinu ne xi chiguni ni pur binni (Apocalipsis 7:9). Runi ca Testigu dxiiñaʼ riʼ de guidubi ladxidoʼcaʼ ne qué riáxacaʼ. Casi maca guníʼ Jesús, stale binni nanalaʼdxiʼ ne rizananda laacabe. Peru gastiʼ qué zanda gucueeza laacabe de guni predicárcabe (Lucas 21:17).

15. a) ¿Ñee runi creluʼ nabáninu lu ca últimu dxi la? ¿Xiñee riníʼ íqueluʼ zacá? b) ¿Xi zazaaca né ca ni qué guzuubaʼ stiidxaʼ Dios, ne xi zazaaca né ca ni guzuubaʼ stiidxabe?

¹⁵ ¿Ñee runi creluʼ nabáninu lu ca últimu dxi la? Cayaca cumplir stale profecía zeeda lu Biblia ni caníʼ de ca últimu dxi riʼ. Maʼ cadi candaa, zucueeza Jehová dxiiñaʼ de gaca predicar ca noticia galán, «ne oraqueruʼ nga gueeda fin» (Mateo 24:14). ¿Xii nga fin ca yaʼ? Laani nga ti guerra ni láʼ Armagedón ne luni zunitilú Dios guiráʼ ca cosa malu. Zaquiiñeʼ Jehová Jesús ne ca ángel stiʼ para gunitilú guiráʼ ca ni qué nuzuubaʼ stiidxabe ne stiidxaʼ Xiiñibe (2 Tesalonicenses 1:6-9). Despué de Armagedón maʼ qué zaguite Binidxabaʼ ne ca demonio binni. Guiráʼ ca ni guzuubaʼ stiidxaʼ Dios ne guzuubaʼ stiidxaʼ Reinu stibe zuuyacaʼ ximodo guni cumplir Dios guiráʼ ca promesa stiʼ (Apocalipsis 20:1-3; 21:3-5).

16. Cumu maʼ nánnaluʼ mayaca guiluxe guidxilayú riʼ, ¿xi naquiiñeʼ gúniluʼ?

¹⁶ Maʼ cadi candaa zanitilú guidxilayú ni cayuni mandar Binidxabaʼ riʼ. Nga runi nabé risaca guiníʼ íqueluʼ xi gúniluʼ. Racalaʼdxiʼ Jehová gúniluʼ stipa pur guiziidiluʼ biaʼ gándatiʼ de lu Biblia. Nga runi bisisaca guiráʼ ni caziidiluʼ ne biʼniʼ ca ni lu xquendanabániluʼ (Juan 17:3). Laaca ridagulisaa ca testigu stiʼ Jehová guiráʼ semana.  Lu ca reunión ca racanécabe binni guiene ni rusiidiʼ Biblia. Biʼniʼ stipa cadi guiaadxaluʼ ca reunión ca (biindaʼ Hebreos 10:24, 25). Pa gudiiluʼ cuenta caquiiñeʼ guchaaluʼ modo nabániluʼ la? biʼniʼ ni. Purtiʼ pa gúniluʼ ni, jma zaca xhamíguluʼ Dios (Santiago 4:8).

17. ¿Xiñee stale tu zadxagayaa ora guinitilú ca binni malu?

¹⁷ Apóstol Pablo guníʼ málasi zanitilú ca binni malu «casi reeda ti gubaanaʼ huaxhinni», ora guirutiʼ cabeza ni (1 Tesalonicenses 5:2). Jesús guníʼ qué zuni cré stale binni ca prueba ni rusihuinni maʼ nabáninu lu ca últimu dxi riʼ. Ora bizeeteʼ Jesús de ca últimu dxi riʼ, guníʼ: «Purtiʼ cásica bizaaca ca dxi bibani Noé, zacaca zaca ni lu presencia stiʼ Xiiñiʼ Hombre. Purtiʼ ca dxi ante gueeda Diluvio que cayó ca binni que ne cayeʼcaʼ, cachaganáʼ ca hombre ne ca gunaa... dede dxi biuu Noé ndaaniʼ arca; ne qué nulábicaʼ dede dxi beeda Diluvio que ne binduubaʼ guiracaʼ. Zacaca zazaaca ni lu presencia stiʼ Xiiñiʼ Hombre» (Mateo 24:37-39).

18. ¿Xi guníʼ Jesús naquiiñeʼ gúninu?

¹⁸ Jesús guníʼ, pa gó xhaatanu, gueʼ xhaatanu ne chuʼnu xizaa pur ca cosa ni caquiiñenu la? zanda guxhélecani laanu de Jehová. Bizeetebe málasi zeeda fin ca ne zadxagayaa binni purtiʼ zeeda gácani «casi ti trampa». De racá guniʼbe: «Lagataná ne laguni rogar guiráʼ ora para ganda guilatu de guiráʼ ca cosa ni maʼ nexheʼ gaca ne guzuhuaatu nezalú Xiiñiʼ Hombre» (Lucas 21:34-36). ¿Xiñee nabé risaca chinándanu ni guníʼ Jesús riʼ yaʼ? Purtiʼ mayaca guinitilú guidxilayú malu stiʼ Binidxabaʼ. Ca binni si ni guni ni ná Jehová ne Jesús nga zalá dxi guinitilú guidxilayú riʼ, ne zabánicaʼ para siempre ndaaniʼ ti guidxilayú cubi (Juan 3:16; 2 Pedro 3:13).