Cumu guizáʼ nadxii Jesús ca discípulo stiʼ la? ngue runi cusiidibe laacaʼ purtiʼ mayaca chebe. Yanna gundisalú Jesús guibáʼ ne biʼniʼ orar Bixhoze: «Bisisaca Xiiñiluʼ, ti gusisaca Xiiñiluʼ lii, purtiʼ maʼ bidiiluʼ laabe autoridad luguiáʼ guiráʼ binni, para gudiibe guendanabani ni qué zaluxe guiráʼ ca ni maʼ bidiiluʼ laabe» (Juan 17:1, 2).

Nanna Jesús ni jma risaca nga gusisaca Dios. Peru laaca bizeetebe zanda gapa binni ti guendanabani ni qué zaluxe. Maʼ gucuaa Jesús «autoridad luguiáʼ guiráʼ binni», nga runi zanda gudiibe binni guidxilayú ca ndaayaʼ guedané sacrificiu chigudiibe. Peru cadi guiráʼ diʼ binni zacaa ca ndaayaʼ riʼ. ¿Xiñee yaʼ? Purtiʼ ca binni si ni guni ca ni guníʼ Jesús riʼ zacaacaʼ ni: «Ne zacaacabe guendanabani ni qué zaluxe ra gunibiáʼcabe lii, tobi lucha Dios ni dxandíʼ, ne ra gunibiáʼcabe Jesucristu, ni biseendaluʼ» (Juan 17:3).

Nga runi, ca ni gacalaʼdxiʼ guicaa guendanabani ni qué zaluxe naquiiñeʼ gunibiáʼ chaahuicaʼ Jehová ne Xiiñiʼ ne gaca xhamígucaʼ laacabe. Naquiiñeʼ gúʼyacabe ca cosa ca casi ruuyaʼ Jehová ne Jesús ni. Laaca naquiiñeʼ gúnicabe stipa pur chinándacabe ca cualidad ni rusihuinni Jehová ne Jesús ora runi tratarcaʼ binni ne gánnacabe jma risaca nga gusisácabe Dios que guicaacabe guendanabani ni qué zaluxe. Biguetaʼ guníʼ Jesús de tema riʼ:

«Maʼ bisisacaʼ lii lu guidxilayú, ne maʼ binduuxeʼ dxiiñaʼ ni bidiiluʼ naa guneʼ. Nga runi, Bixhozeʼ, bisisaca naa cueʼluʼ, cásica bisacaʼ cueʼluʼ ante chaʼ binni guidxilayú» (Juan 17:4, 5). Canabaʼ Jesús guindisaʼ Bixhoze laa de lade gueʼtuʼ ti ganda guisaca sti biaje guibáʼ.

Peru caʼruʼ gusiaandaʼ Jesús guiráʼ ni maʼ guleendú biaʼ dxi huayuni xhiiñaʼ Dios. Yanna bizeetebe: «Maʼ bisiideʼ ca discípulo ni bidiiluʼ naa lu guidxilayú riʼ tu laluʼ. Stiluʼ laacabe, peru maʼ bidiiluʼ laacabe naa, ne maʼ cuzuubacabe stiidxaluʼ» (Juan 17:6). Cadi caníʼsibe de lá Jehová ora guni predicarbe. Laaca maʼ gucanebe ca apóstol stibe gunibiáʼ chaahuicaʼ lá Dios o ca cualidad galán nápabe ne modo runi tratarbe binni guidxilayú.

Maʼ nanna ca apóstol tuu nga Jehová, xi dxiiñaʼ risaca napa Jesús ne guiráʼ ca cosa maʼ bisiidibe laacaʼ. Yanna né stale humildad guníʼ Jesús: «Maʼ gudxeʼ laacabe ca diidxaʼ ni gúdxiluʼ naa, ne maʼ gucuaacabe stiidxaluʼ ne maʼ nanna dxíchicabe bendaʼ casi representante stiluʼ, ne maʼ biʼniʼ crécabe lii biseendaluʼ naa» (Juan 17:8).

De raqué guníʼ Jesús maʼ gadxé ca xpinni de xcaadxi binni: «Canabaʼ lii pur laacabe, cadi canabaʼ pur binni guidxilayú, sínuque pur ca ni bidiiluʼ naa, purtiʼ stiluʼ laacabe [...]. Padre santo, gupa laacabe pur nombre stiluʼ —ni bidiiluʼ naa— ti gácacabe tobi si, cásica nácanu tobi si. [...] Gupaʼ laacabe, ne nin tobi de laacabe qué ninitilú, sínuque binni si ni chiguinitilú», raríʼ caniʼbe de Judas Iscariote ni maʼ zeʼ para guni traicionar laabe (Juan 17:9-12).

Ne guniʼruʼ Jesús: «Nanalaʼdxiʼ guidxilayú laacabe». Ne laaca guniʼbe: «Cadi canabaʼ lii cueeluʼ laacabe de ndaaniʼ guidxilayú, sínuque gápaluʼ laacabe de Binidxabaʼ. Cadi nácacabe parte de guidxilayú, cásica naa cadi nacaʼ parte de guidxilayú» (Juan 17:14-16). Neca nuu ca apóstol ne ca discípulo que ndaaniʼ guidxilayú —lade ca binni ni cayuni mandar Binidxabaʼ—, naquiiñeʼ guixélecabe de ca binni riʼ ne cadi gúnicabe ca cosa malu rúnicaʼ. ¿Ximodo zanda gúnicabe ni yaʼ?

Ra chúʼcabe nayá nezalú Dios ti ganda gúnicabe xhiiñaʼ Dios. Zanda gúnicabe ni ra chinándacabe  ni cá lu Stiidxaʼ Dios ni gucuá lu diidxaʼ hebreu ne chinándacabe ni bisiidiʼ Jesús laacabe. De raqué gunabaʼ Jesús Bixhoze: «Biʼniʼ santificar laacabe pur mediu de ni dxandíʼ; stiidxaluʼ nga ni dxandíʼ» (Juan 17:17). Ra tidiʼ tiempu zacané Dios caadxi apóstol para gucaacaʼ libru ni zeeda gaca parte de Stiidxaʼ Dios o ni «dxandíʼ» ni zacané binni chuʼ nayá nezalú Dios.

Peru laaca ziuu xcaadxi binni ni guni ni ná Stiidxaʼ Dios o ni «dxandíʼ». Ngue runi guníʼ Jesús: «Cadi pur laasicabe nga canabaʼ [ca 11 apóstol que], sínuque laaca canabaʼ pur ca ni gapa fe naa ra gunadiaga ni gusiidicabe». ¿Xi gunabaʼ Jesús yaʼ? «Gaca guirácabe tobi si. Cásica lii, Bixhozeʼ, nuuneluʼ naa tobi si ne naa nuaaniaʼ lii tobi si, laacabe laaca chuʼnécabe laanu tobi si» (Juan 17:20, 21). Cadi ngueca si nga Jesús ne Bixhoze. Nácacabe tobi si purtiʼ tobi si modo riníʼ íquecabe. Ne cayuni orar Jesús para chuʼ ca xpinni tobi si.

Cadi tan xadxí gudxi Jesús Pedro ne xcaadxi apóstol que cheʼ chiguni preparar ti lugar para laacabe guibáʼ (Juan 14:2, 3). Ne biguetaʼ guníʼ Jesús de laani ora gunabaʼ Bixhoze: «Racalaʼdxeʼ chuʼ ca ni bidiiluʼ naa ra chuaaʼ para gúʼyacabe gloria ni maʼ bidiiluʼ naa, purtiʼ gunnaxhiiluʼ naa ante gale binni lu guidxilayú» (Juan 17:24). Ca diidxaʼ riʼ rusihuinni cani, dede ante gapa Adán ne Eva xiiñicaʼ, maca nadxii Dios tobi lucha Xiiñiʼ, ni beeda gaca Jesucristu.

Ne ora mayaca guiluxe guiníʼ Jesús, biguetaʼ guniʼbe de lá Bixhózebe ne pabiáʼ nadxii Bixhózebe ca apóstol stibe ne ca ni guni ni ná stiidxabe o ni «dxandíʼ» despué, guniʼbe: «Maʼ bisiideʼ laacabe tu laluʼ, ne zusiideruaʼ ni, para gusihuínnicabe nadxiicabe xcaadxi binni cásica rusihuínniluʼ nadxiiluʼ naa, ti zacá chuaaniaʼ laacabe tobi si» (Juan 17:26).