QUÉ ganna José de Arimatea ximodo guca nadxibalú para guiniʼné Poncio Pilato, purtiʼ binibiáʼcabe gobernador romanu riʼ casi ti hombre nabé neciu. Peru caquiiñeʼ guinabaʼ tuuxa laabe cuerpu stiʼ Jesús ti gucaachicabe laa casi rigaachiʼ ti binni nachaʼhuiʼ. Qué niníʼ ique José pa nucaadiágabe laa ora biuu ra nuube. Gudxi si ti soldadu Pilato maʼ guti Jesús, bidii lugar chinebe cuerpu que. Ngue runi, neca nabé naná guca ni para José, nagueendaca biguétabe lugar ra biiticabe Jesús que (Mar. 15:42-45).

• ¿Tuu nga José de Arimatea?

• ¿Xiñee binibiaʼbe Jesús?

• ¿Xiñee risaca gánnanu de laabe?

Evangeliu stiʼ Marcos ruzeeteʼ guca José «tobi ni risaca lade ca justicia sti ca judíu». Lu contextu riʼ ora caníʼ ni de justicia stiʼ ca judíu la? caníʼ ni de Sanedrín que, tribunal supremo stiʼ ca judíu ne cani ruuyaʼ chinanda binni ley (Mar. 15:1, 42, 43). Guca hombre riʼ tobi de cani guzániru lu guidxi que, ne ndiʼ racané laanu guiénenu xi pur gunábabe chebe nezalú gobernador romanu. Ne laaca qué ridxagayaanu xi pur ricu laabe (Mat. 27:57).

Guiráʼ cani nuu lu Sanedrín que cucaalucaʼ Jesús; dede laapecaʼ biyúbicaʼ ximodo gátibe. Peru José guca ti hombre nabé nachaʼhuiʼ ne runi ni jneza (Luc. 23:50). Gadxe si gúcabe de xcaadxi que, purtiʼ gúcabe ti binni honradu ne guca xpiaʼbe galán, ne bíʼnibe stipa pur chinándabe ca mandatu stiʼ Dios. José laaca «cabeza idxiña dxi guni mandar Dios», ne pur nga zanda guiénenu xiñee beedagácabe ti discípulo stiʼ Jesús (Mar. 15:42, 43; Mat. 27:57). Zándaca gunnaxhiibe cani dxandíʼ rusiidiʼ Biblia ne guyuuláʼdxibe gaca ni jneza, ne pur ngue guyuuláʼdxibe mensaje stiʼ Jesús.

Juan 19:38 ná guca José ti «discípulu sti Jesús peru nagaʼchi purti ridxibi ca judíu». ¿Xiñee bidxíbibe laacaʼ yaʼ? Purtiʼ gucananaláʼdxicaʼ Jesús, ne nánnabe tutiica si guiníʼ napa fe Jesús zuni expulsárcabe laa de ndaaniʼ sinagoga que (Juan 7:45-49; 9:22). Ora guni expulsárcabe tuuxa de ndaaniʼ sinagoga que maʼ qué rieeguʼ ca judíu laa, rúnicabe menu laa ne dede rucaanácabe laa. Bidxibi José niníʼ napa fe Jesús, purtiʼ pa gúnibe ni zunítibe puestu stibe ne maʼ qué zusisaca binni laabe.

Cadi laasibe bizaacabe zacá. Juan 12:42 ná «stale de ca xaíque bini cre laabe [Jesús], peru nagaʼchiʼ purti ridxibi ca cuee ca fariseu laaca de ndaani yuʼduʼ». Tobi de laacabe nga Nicodemo, laa laaca guyuu lu Sanedrín que (Juan 3:1-10; 7:50-52).

Dxandíʼ guca José discípulo, peru bidxíbibe niniʼbe ni nezalú binni. Cadi guendariguite ngue ni bíʼnibe riʼ, jmaruʼ si ora guidúʼndanu ca diidxaʼ guníʼ Jesús riʼ: «Tutiica iníʼ xpinne laa nezalú binni la? laca zanié xpinne laa nezalú Bixhoze ni nuu ibáʼ. Peru ni qué ná iníʼ pa xpinne laa nezalú binni la? laca qué zanié pa xpinne laa nezalú Bixhoze ni nuu ibáʼ» (Mat. 10:32, 33). Cadi pur diʼ qué runi crebe Jesús, sínuque qué ñápabe valor para niniʼbe nácabe ti discípulo stiʼ Jesús. ¿Xi zanda guininu de laanu yaʼ?

Ti cosa galán ni ruzeeteʼ Biblia de José de Arimatea nga qué ñuni apoyarbe ni cá  ique Sanedrín que guni né Jesús (Luc. 23:51). Zándaca qué ñuube dxi biʼniʼ juzgárcabe Jesús. Intiica guca, zándaca bidxiichi José ora biʼyaʼ cadi jneza modo biʼniʼ juzgárcabe laabe, peru qué zanda gúnibe gastiʼ para gucueezabe ni.

Rihuinni dxíchica, maʼ qué ridxibi José despué de guti Jesús ne maʼ gudixhe ique chuʼ pur ca discípulo stibe. Nánnanu ndiʼ pur ca diidxaʼ ni zeeda lu Marcos 15:42, 43: «Oraqueca uyé José, yenaba cuerpu sti Jesús, ne qué nutuí lú yenaba ni».

Ruluíʼ si biiyaʼ José ora biiticabe Jesús, purtiʼ ante ganna Pilato maʼ guti Jesús laabe maʼ nánnabe ni. Nga cusiene xiñee gunabadiidxaʼ gobernador que pa maʼ guti Jesús ora gunábabe cuerpu que (Mar. 15:44). Pa biiyaʼ José modo cayacaná Jesús lu yaga que, ¿ñee ngue bicaa laabe guiníʼ íquebe ne gápabe valor para guiniʼbe nácabe ti discípulo stiʼ Jesús la? Zándaca. Ni nánnanu nga bicaa ni laabe gúnibe xiixa. Maʼ qué zácabe ti discípulo nagaʼchiʼ.

Ley stiʼ ca judíu que ná naquiiñeʼ igaachiʼ ca binni ni nexheʼ gatiʼ ante guiaaziʼ gubidxa (Deut. 21:22, 23). Peru ca romanu que rusaanacaʼ cuerpu stiʼ ca binni malu ni guuticaʼ lu yaga dede ora guiuʼdxuʼ cani o rusáʼbicabe laacaʼ ndaaniʼ ca baʼ ra rucaachicabe stale gueʼtuʼ. Peru qué niná José ñúnicabe Jesús zaqué. Gaxha de ra biiticabe Jesús que, gupa José  ti baʼ ni gundaacabe cueʼ ti dani. Guirutiʼ qué huagaachiʼ ndaaniʼ cueva que, ne pur nga zanda guiníʼ íquenu cadi tan xadxí biree José de guidxi Arimatea * para chindeza Jerusalén ne cá ique raqué nga igaachiʼ familia stiʼ (Luc. 23:53; Juan 19:41). Ra gucuaa José cuerpu stiʼ Jesús ne guluu ni ndaaniʼ baʼ ra cá ique igaachiʼ, bisihuinni pabiáʼ nachaʼhuiʼ ne laaca biʼniʼ cumplirbe profecía ni ná zagaachiʼ Mesías lade binni ricu (Is. 53:5, 8, 9).

Guidapaʼ Evangeliu ruzeeteʼ ora gundétecabe xcuerpu Jesús de lu yaga que, bichenda José de Arimatea laabe ti lari de lino de ni jma galán ne guluu laabe ndaaniʼ baʼ stiʼ (Mat. 27:59-61; Mar. 15:46, 47; Luc. 23:53, 55; Juan 19:38-40). Binni si ni rieeteʼ gucané José nga Nicodemo, laa bedané caadxi guixi rindáʼ naxhi o especia para cúʼcabe xcuerpu Jesús. Cumu risaca ca hombre riʼ la? nánnanu qué ñanda diʼ nuniibicabe xcuerpu Jesús stubisícabe. Zándaca biquiiñecabe caadxi de ca mozo stícabe para guniibicabe laabe ne gucaachicabe laabe. Modo tiica si, bíʼnicabe ti dxiiñaʼ nabé risaca. Binni ni canaʼ ti gueʼtuʼ qué zanda diʼ chuʼ lade xcaadxi para guni adorar Dios gadxe gubidxa ne guiráʼ cosa ni canaʼ laaca raca biidiʼ (Núm. 19:11; Ageo 2:13). Pa gueeda guizaaca tuuxa ndiʼ la? naquiiñeʼ chuʼbe zitu semana racaʼ pascua ne zunítibe saa riʼ (Núm. 9:6). Né ni cayuni José ra cucaahiʼ Jesús riʼ, ruxooñeʼ riesgu guni xcaadxi binni menu laabe. Peru cumu maʼ cayúnibe ni la? nga rusihuinni guyuube dispuestu gudxiilube intiica si pur cucaachibe Jesús casi naquiiñeʼ igaachiʼ ti binni nachaʼhuiʼ ne gusihuínnibe nácabe discípulo stiʼ nezalú stale binni.

Maʼ qué ruzeeteʼ diʼ Biblia José de Arimatea despué de bigaachiʼ Jesús, nga runi zándaca guinabadiidxanu: «¿Xi guca de laabe pue?». Ni dxandíʼ nga qué gánnadinu. Pur cani maʼ bidúʼyanu lu tema riʼ, zándaca guniʼbe nácabe ti xpinni Cristu. Purtiʼ bisihuínnibe jma ziyápabe fe ne valor lu ca prueba ni gúpabe ne ra jma nagana guca para laabe. Nga bisihuinni maʼ naguidxi nuube.

Historia stibe racané laanu guiníʼ íquenu pa nuu xiixa casi ti lugar risaca ni nápanu, dxiiñaʼ, cosa risaca, familia o hasta libertad stinu, ni rusisácanu jma que relación ni nápanu né Jiobá.