María Isabel nga ti dxaapahuiiniʼ nabé riuulaʼdxiʼ gucheeche diidxaʼ ne nabézabe San Bernardo, tobi de ca guidxi stiʼ Chile. Laabe ne binnilídxibe zácabe de raza mapuche ne gucanécabe para bizulú ti neza binni ridagulisaa lu diidxaʼ mapudungún, laaca runibiáʼcabe ni casi mapuche, ne laani nga diidxaʼ gulenécabe.

Ti dxi bieeteʼ ra ridagulisaa María Isabel chiguietenaláʼdxicabe guendaguti stiʼ Cristu lu diidxaʼ mapudungún. Laaca bieeteʼ guca imprimir 2,000 invitación lu diidxaʼ ca. Dxaapahuiiniʼ riʼ guníʼ ique xi zanda guni para gacané guiaaziʼ cani. María Isabel bietenalaʼdxiʼ xi huabeendú xcaadxi hombrehuiiniʼ ne dxaapahuiiniʼ ni naca Testigu ora riníʼnecaʼ ca baʼduʼ rinecaʼ scuela ne ca maestru sticaʼ de stiidxaʼ Dios. Gúdxibe jñaabe ne bixhózebe xi racaláʼdxibe gúnibe ne laacaʼ gucanecaʼ laabe quixheʼ chaahuibe ximodo quíʼzibe ca invitación que ra scuela stibe. Xi gudixhe íquebe gúnibe yaʼ.

Primeca ni biʼniʼ María Isabel nga gunabaʼ cani naca xaíque ra scuela que gudiicaʼ lugar laa gucaa ti invitación ra puertaʼ scuela que. Ca binni que gúdxicaʼ laabe zanda gúnibe ni, ne cadi ngue si, dede gúdxicaʼ laabe galán ni cayúnibe. Ne ti siadóʼ, ora cutiidiʼ director que lista bidii diidxaʼ lu bocina stiʼ scuela que de invitación ni caguiizibe que.

Despué gunabaʼ María Isabel permisu ca maestru que para tiidiʼ ndaaniʼ cada tobi de ca salón que para quiʼzi invitación que. Ora gudxi ca maestru que laabe zanda gúnibe ni, gunabadiidxabe ca baʼduscuela pa nuu tuuxa riníʼ mapuche ládecaʼ. Laabe cusiénebe xi guca: «Guníʼ iqueʼ zándaca nidxelaʼ biaʼ chii o quince baʼduscuela ni za de familia mapuche ndaaniʼ scuela que, peru bidxelaʼ jma que biaʼ ni guníʼ iqueʼ. ¡Gunda gudiizeʼ 150 invitación!».

Ora biʼyaʼ ti gunaa invitación cá ra puertaʼ scuela que gunabadiidxaʼ tu zanda gusiene laa jma de laani. Guníʼ ique si pabiáʼ bidxagayaa gunaa riʼ ora yenécabe laa ra nuu ti dxaapahuiiniʼ de chii iza. Dede cuxidxi huiiniʼ María Isabel ora guníʼ: «Gulézabe ñuuyabe ti binni huaniisi». Ni bíʼnibe primé nga bidiibe ti invitación gunaa que ne bisiénebe laa de laani, óraque gunabadiidxabe gunaa que paraa nabeza ti chinebe bixhózebe ne jñaabe chigánnacabe laa ne güinécabe laa jma de Reinu stiʼ Dios. Guyé gunaa que né sti 26 binni ni za de raza mapuche ra bietenaláʼdxicabe guendaguti stiʼ Cristu. Bixuiʼlú pabiáʼ nayecheʼ biʼniʼ sentir guiráʼ 20 binni ni rucheeche stiidxaʼ Dios lu diidxaʼ mapudungún, ora bíʼyacaʼ biuu guiráʼ ca binni que. ¡Yanna jma maʼ zidálecabe ndaaniʼ neza binni ridagulisaa que!

Biaʼ tiica iza nápanu, ñee zanda gúninu cásica biʼniʼ María Isabel para guni invitarnu cani rinenu scuela o cani runinenu dxiiñaʼ checaʼ dxi rietenaláʼdxinu guendaguti stiʼ Cristu, chigucaadiágacaʼ ti libana ra Yoo stiʼ Reinu o checaʼ ti guendaridagulisaa de chonna gubidxa la? Lu ca libru ne revista stinu, zanda guidúʼyanu xi huabeendú xcaadxi xpinni Cristu ni huayuni ni, ne zacanécani laanu cueendunu ni galán lu cani quixhe íquenu gúninu. Laaca galán guinábanu Jiobá gudii laanu espíritu santu stiʼ ti gácanu nadxibalú para gusíʼdinu binni de laa (Luc. 11:13). Pa guiníʼ ique chaahuinu xi gúninu la? zándaca dede zadxagayaanu ora gúʼyanu cani cueendunu ne zaguu cani gana laanu.