▪ Caadxi binni guníʼ ique ninitilú Guidxilayú riʼ 21 stiʼ octubre 2011. Peru qué ñaca diʼ ni. Nga rusihuinni qué ñaca diʼ ni guníʼ Harold Camping, ti hombre de Estados Unidos ni riníʼ lu radiu. Laabe guniʼbe zanitilú Guidxilayú 21 stiʼ mayo 2011. Ne guniʼbe dxi ca zaca ti xu roʼ ni zuniibi dxacha Guidxilayú ne zanitilú ni 21 stiʼ octubre, gaayuʼ beeu despué.

Peru ni dxandíʼ nga qué ziuu dxi guinitilú Guidxilayú, purtiʼ ni bizáʼ ni qué zudii lugar gaca nga. Ne sicaríʼ na Biblia bíʼnibe: «Bicaa dxiichiluʼ guidxilayú ca ti lugar, ti cadi guinitilú ni» (Salmo 119:90).

Neca zacá na Biblia, caadxi binni ni ruundaʼ ni, riníʼ íquecaʼ zacá guí Guidxilayú riʼ. Ne zacá riníʼcabe pur ca diidxaʼ ni ca lu 2 Pedro 3:7, 10, ra na: «Peru ibáʼ ne guidxilayú ni nuu yanna ri la? [...] ma gudixhe Dios unitilú ni ne gui. Ne laca gui que unitilú irá cani qué rulabi laabe, dxi cuidxi be cuenta laacaʼ. [...] Peru qué zabi be iruti padxí gueeda be, sínuque zaca ni casi reeda gubaana huaxhinni, qué zaguixhená be irutíʼ. Zaxidxi laa ra initilú ibáʼ ne zacá gui irá luceru dede initilú, ne zaqueca zacá gui guidxilayú ne irá ni nuu ndaani ni». Ñee Guidxilayú ra nabézanu riʼ nga na apóstol Pedru chiguinitilú la?

Coʼ, purtiʼ ni cusiene textu riʼ naquiiñeʼ gácani tobi si né ni na xcaadxi carta bicaa apóstol Pedru ne xcaadxi libru ni zeeda lu Biblia. Pa ñaca ñénenu ni na versículo riʼ cásipeʼ modo cá ni ca la? niniʼni zanitilú guiráʼ beleguí ni nuu guibáʼ ne guiráʼ ni nuu luni pur caadxi si binni qué iquiiñeʼ. Guidúʼyanu ejemplu riʼ: Pa ñuu cucaracha ndaaniʼ lídxiluʼ, ñee nuzaaquiluʼ ni para si ñuutiluʼ laacame la? Coʼ njaʼ. Jiobá laaca qué zunitilú guibáʼ ne Guidxilayú pur ni bizaaca ndaaniʼ jardín ni guyuu Edén, ti lugar ni zeeda gaca casi ti puntu huiiniʼ lu Guidxilayú riʼ.

Ne pa guininu zanitilú Guidxilayú la? maʼ qué zadxaagani né ca diidxaʼ ni guníʼ Jesús riʼ: «Dichoso ni nadóʼ purti zudii Dios laaca guidxilayú» (Mateo 5:5; Salmo 37:29). Ñee nucuí ti hombre ni nadxii binnilidxi ti yoo ra nibánicabe galán ne despué nucaaguí ni la? (Salmo 115:16.) ¡Guirutiʼ zaníʼ ique guni nga! Cadi bizáʼ si Jiobá Guidxilayú, sínuque laaca nácabe ti Dios ni nadxii binni (Salmo 103:13; 1 Juan 4:8).

Lu 2 Pedro 3:7, 10, apóstol riʼ biquiiñeʼ diidxaʼ guidxilayú para guiníʼ de binni malu. Raríʼ cuchaagabe dxi guinitilú binni malu né dxi binitilú Nisaguié Naroʼbaʼ que binni dxi bibani Noé (2 Pedro 3:5, 6). Dxiqué guti puru binni malu siʼ. Qué ninitilú diʼ Guidxilayú riʼ ne bilá Noé ne binnilidxi. Zacaca nga biquiiñeʼ Pedru diidxaʼ guibáʼ lu ca versículo ca para guiniʼbe de ca gobiernu ni nuu lu Guidxilayú riʼ. Nga runi, zanitilú binni malu, ca binni ni qué nacaʼ guchaacaʼ modo nácacaʼ ne laaca zanitilú ca gobiernu ni qué runi ni jneza, ne Reinu, o gobiernu, stiʼ Dios nga chichuu lugar stícabe (Daniel 2:44).

Yanna yaʼ, ñee zanitilú Guidxilayú riʼ la? Coʼ. Ca binni malu ni nabeza ndaaniʼ ni nga chiguinitilú. Guidxilayú riʼ qué ziuu dxi guinitilú nin ca binni ni ruzuubaʼ stiidxaʼ Dios (Proverbios 2:21, 22).