XIÑEE NUU TU QUÉ RUNI CRÉ: Stale binni runi cré ruuyaʼ Dios laanu casi binni ruchee si ne cadi naquiiñeʼ gulábibe laacaʼ. Ti gunaa gupa depresión láʼ Kendra, nabé biʼniʼ sentirbe nápabe donda purtiʼ qué ñanda ñúnibe cásipeʼ modo na ca ley stiʼ Dios, laabe guniʼbe: «Nga runi bisaanaʼ de guneʼ orar».

XI RUSIIDIʼ BIBLIA: Ruuyaʼ Jiobá modo nácanu ne riene chaahuibe laanu. Biblia na: «Nanna dxíchibe ximodo guyanu, ne rietenaláʼdxibe de yú laanu». Pur nga qué rudiibe lugar guizaacanu ni runi merecernu pur cani qué rúninu jneza, sínuque riabe laanu ne rutiidiláʼdxibe stóndanu pa gaca arrepentirnu (Salmo 103:10, 14).

Guiníʼ íquenu ni bizaaca rey David, ni bizéʼtenu lu primé tema stiʼ revista riʼ. Laabe gúdxibe Dios: «Guieluluʼ biiyaʼ naa dxi nácaruaʼ ti embrión, ne lu libru stiluʼ maca cá xi guiráʼ zeeda luni». Ne laaca guniʼbe: «Dios stinneʼ, biiyaʼ chaahuiʼ guidubi nacaʼ, ne biiyaʼ xi nuu ndaaniʼ ladxiduáʼ» (Salmo 139:16, 23). Neca biʼniʼ David caadxi cosa malu, peru biʼniʼ crebe zuuyaʼ Jiobá dxandíʼ guca arrepentirbe de guidubi ladxidoʼbe.

Zanda guni creluʼ jma riene Jiobá lii que tutiica binni. Biblia na: «Binni ruuyaʼ ni rihuinni si; peru Jiobá ruuyaʼ ni nuu ndaaniʼ ladxidóʼ binni» (1 Samuel 16:7). Laabe nánnabe xiñee nácanu modo nácanu. Nánnabe ximodo laanu, modo biniisinu, modo runi binni laanu ne modo naca xpiaʼnu. Laaca ruuyabe ne rusisácabe stipa rúniluʼ pur gúniluʼ ni jneza neca nácaluʼ binni ruchee.

Yanna, ximodo riquiiñeʼ Dios ni nanna de lii ca para quixhedxibe ladxidoʼloʼ yaʼ.