Nabé runibiáʼ binni laadu, ca testigu stiʼ Jiobá, purtiʼ rucheechedu diidxaʼ. Peru laaca racanedu binni guiene Biblia, ñee nannuʼ nga la?

Lu iza 2014 que, jma de 8,000,000 testigu stiʼ Jiobá, bidiicaʼ biaʼ 9,500,000 cursu de Biblia cada beeu ndaaniʼ 240 guidxi roʼ ne xcaadxi lugar. * Nuu biaʼ 140 guidxi roʼ ni qué gapa diʼ biaʼ guiráʼ binni ni cayuni estudiarné laadu.

Para ganda gusíʼdidu binni la? cada iza rúnidu biaʼ 1,500 millón de publicación —casi Biblia, libru, revista ne folletu— lu 700 idioma. Guiráʼ dxiiñaʼ rúnidu riʼ racaneni para ganda guiziidiʼ binni de Biblia lu diidxaʼ chuulaʼdxiʼ.

Ximodo raca cursu riʼ

Riuundaʼ gadxé gadxé tema zeeda lu Biblia lu cursu riʼ. Ndiʼ nga caadxi de ca tema rusiene Biblia: tuu nga Dios, ximodo laabe, tu labe, paraa nuube ne pa zanda gaca xhamígunu laabe. Ca binni guicaa cursu riʼ, racanécabe laacaʼ gánnacaʼ xi textu riquiiñeʼ Biblia para guicabi cani gunabadiidxanu riʼ ne xcaadxi cosa ni racaláʼdxicaʼ gánnacaʼ.

Para gaca cursu riʼ riquiiñeʼ caadxi publicación casi libru Xipeʼ ndiʼ cusiidiʼ Biblia. * Guca libru riʼ para gacaneni binni guiziidiʼ ca cosa ni jma naquiiñeʼ ganna de Biblia. Nápani capítulo ni cusiidiʼ de Dios, de Jesucristu, ni cusiene xiñee racananu, xiñee rati binni, ximodo guni orarnu ne xcaadxi tema.

 Paraa ne padxí rudiicabe clase

Lii guiniʼluʼ paraa ne padxí gusiidicabe lii.

Pabiáʼ rindaa cada clase

Lii quíxheluʼ pabiáʼ. Zúnidu ni guinabuʼ laadu. Stale binni riguixhe guʼndanécabe laa biaʼ ti hora cada semana. Peru xcaadxi runi estudiar biaʼ chii o quince minutu si.

Pagala riguixe binni

Nin ti de gaayuʼ. Ca clase rudiʼdu ne ca libru o folletu ni riquiiñedu, qué riguixe binni pur laacani. Jesús peʼ gudxi ca discípulo stiʼ: «Qué niguixe tu saca gudixhe irá ndi lu ná tu guni tu. Yanna laguni cani sin guiaxa tu» (Mateo 10:8).

Pabiáʼ rindaa cursu riʼ

Biaʼ tiempu gacalaʼdxuʼ. Napa libru Xipeʼ ndiʼ cusiidiʼ Biblia 19 capítulo. Zanda guʼndanécabe lii guiráʼ tema chuulaʼdxuʼ ne biaʼ naluʼ.

Ñee naquiiñeʼ gaca binni testigu stiʼ Jiobá la?

Coʼ. Runi respetardu binni ora guiníʼ napa derechu para guni cré ni gacalaʼdxiʼ. Peru, ora gunibiáʼ chaahuiʼ binni xi rusiidiʼ Biblia la? racaneni laa ganna xi guni cré.

 Ximodo gannaʼ jma de laatu

Lu sitiu jw.org/zai ni nápadu lu Internet, zadxeʼluʼ xipeʼ nga runi credu ne ximodo rúnidu dxiiñaʼ.

Paraa ricá lá binni

• Zanda guinabuʼ chigánnacabe lii pa guchaluʼ formulariu ni guʼyuʼ lu sitiu jw.org/zai.

•  

• Laaca zanda guyubuʼ lá ca testigu stiʼ Jiobá ni nabeza gaxha de ra liʼdxuʼ lu directorio stiʼ teléfono ne guiníʼneluʼ laacaʼ.