BIAMA PAPARAHA
Gu Sangbakpotoseyo Nakitangbangase—Mo “Girisi Re be Gi Ingapai!”
Wirina du rimo ri nga Martha aya: “Gu vovo sunge mi agbiaha aima sa gaani raka ni wenehe, ono si asa re mi tona ka rimiso tire ku rogo kura mangaapai. Mi atona uda auru-ongoda, kini rimisi tire ku rogo agu apai nga ga birĩ-zogarago, na kini ndu ku rogo kura akanisa. Mi azere rogo toroyo tipa agarã 40. Wa mi aima, mi aabi tire nga Yekova arengbanga ka mbupai fere te. Mi abi tire nga mi arengbanga ka mbupai fu tire a te. Gu kurapai berewe nga, mi aima ino rengo mbata fu mi tona ka ndu ngba gbegberẽ gene.”
GU INGAPAI boro amangihe kusayo ima rengba kadu ni kere tindiro fu ní. Bakindo Davide akepai ki ya: “Gimi irairapai fu ri re; wa rõrõi tindiro si rõi susi omere.” (Atambuahe 38:4) Bakere gberãrago ima diabe kura aKristano mbiko i nabihe nga Yekova arengbanga ka mbupai fuyo berewe te. (2 AKorindo 2:7) Ya mo gu bipai re ruaru? Ka si vura du nga mo ima manga kere ingapai, ya mo mo ima turõ ti Yekova si ki da nga ka ko mbunga pai foro berewe te? Anga wo duhe te!
“Ani Móngo Saki Pai na Oni”
Yekova ambunga agu aboro ingipai ki saberãyo te. Nirengo, ko nagbatayo. Rogo gu ga Yesu sanza du tipa ingiingi paranga, ko aringbisi Yekova kuti gu baagude du na nyemuse, nga gu ko wiriko ambu kporo ki merefuo gbegberẽ raka. Fuo bete regbo, gu gude re adiberã ka karagatiko ku kporo yo. “Ono wa ko adu tuturũ, bako ki bi ko, nungako ki nimangi ko, ko ki oro, ki ti ku goko yo, ki dungo ko gbe.” (Ruka 15:11-20) Ya mo mo naida ka mbeda na Yekova ono kini bi tiro nga mo “tuturũ” tiko? Wakina gu baagude du rogo ga Yesu sanza re, Yekova na bakere nunga tipa ro. Ko na nyemu ka dia ro kugume.
Ono ya mo mo nabihe nga ome gamo ingapai ima kio, ka Yekova mbunga pai foro te? Mo bingo gu yambahe nga ga Yekova du ni kekehe rogo Yesaya 1:18. Si naya wẽ: “Oni yé awere, ani móngo saki pai na oni, wo poi Yekova: ka gaoni ingapai vura du ni zamba ha vurũ, si adú adu kpau wa morogumba.” Nirengo, ka ingapai vura du wakina gu zamba he diko tihe kuti pusi roko kaa guaringa ya, Yekova nambupai ambu.
Yekova aidanga gupai nga sangbakpotoroyo ni fudi ro mbiko gu ingapai mo amangihe kusayo te. Wai tie rengbe mo ka gbia zereda na kidu na gigiri sangbakpotoyo mbiko ga Mbori mbupai? Mo bingo agu apai ue Bakindo Davide amangihe. Bambatapai nga, ko aya: “Mi akusa pa gi samungu fu Yekova.” (Atambuahe 32:5) Si naida mo tingidi gupai nga, Yekova ima yamba ro mo mbedi na ko rogo kparakpee yo na oni “saki pai” na ko. Si naida mo idi na gu gako yambahe re. Mo kusi gamo ingapai fu Yekova, na ki peke agu apai fuko nafuda ro. Nibi gupai namangi Davide, ko akpari na kido ki ya: “Mo girisi re be gi ingapai! . . . gu kpoto yo naima be rungo ingapai, Ako Mbori, mo apáyasi nga ha te.”—Atambuahe 51:2, 17.
Ue pai nga, Davide agbia undo vurube ga Mbori nebi nangia Natana. (2 Samuere 12:13) Areme, Yekova ima fu abaakumba rogo dungurati i naraba yo i undo agu aboro saberã ti gayo ingapai i mbakadi gayo pagume na Yekova. Ho mo nika ndu ni fuo abaakumba, i nika mangasunge na Ziazia Kekeapai na ki mangi kparakpee nga gu nika mbakada kpotoroyo, ki undo ro mo du na wene bipai tipa tiro, na ki undo ro mo hu rogo toroyo.—Yakoba 5:14-16.
Yekova naida mo du na ngbarago mbiko du mo na gigiri sangbakpotoseyo
“Boro Maku Nga Gu Ni Vu Yo Ni ti Gani Samungu”
Nirengo, mo ima rengba ka bihe nga si ima kpakara ka kusa pa gamo ingapai fu Yekova Mbori na ka ndu fuo abaakumba. Si nawira wa Davide adu na kina ngbatunga gu bipai re a. Ko “afura nga” tipa gako ingapai te tipa bete regbo. (Atambuahe 32:3) Ono tie, fuo bete regbo, ko adu na bakere ngbarago mbikopa kusako gako ingapai na ki mangi ariapai rogo gako raka.
Gu bakere undo Davide agbiaha nga ko adu na ngbarago berewe. Ko akepai ki ya: “Boro maku nga gu ni vu yo ni ti gani samungu, nga gu ni dadi yo gani ingapai.” (Atambuahe 32:1) Ko akpari a ki ya: “Ako Gbia, mo nizá ngbare, ngbare atáka pande pa tambuaro.” (Atambuahe 51:15) Davide adu na bakere tambuahe tipa du ko na gigiri sangbakpoto ko yo na tipa ga Mbori mbupai, si ki fõ ko ko pepa Yekova fu kura aboro.
Yekova naida mo du na ngbarago mbiko du mo na gigiri sangbakpotoseyo. Na ko naida mo pepa ko gbiati gako ringbisapai fu kura aboro na wene sangbakpoto ro yo na ngbarago, angianga na fudifudi sangbakpotoseyo ya. (Atambuahe 65:1-4) Mo tingidi gupai nga Mbori nika ‘gbandaka gamo ingaapai, zereda ki ye yo du Gbia ni.’—Amokedi 3:19.
Gure nga gupai namangi tipa Martha. Ri aya: “Wire anaakekeda Ngbaõbambu Sinziri na gu magazini nga Awake! fere. Mi atona ka inido tire na Yekova berewe tooni tooni. Si aima kpakara fere mi sana Yekova tipa ko mbupai fere ti agu aingapai dunduko mi amangihe. Ono ni yangaraha, mi akpari fu Mbori na ki sanako ko mbupai fere. Kina ngbare nazera ka bi gupai nga mi adi agarã 40 mi kini ka karagatire fuo Yekova. Mi ima ino gupai awere nga Mbori nafu momu afu fu boro ni karagatini fuoko zavura fuo badungu agarã.”
