Tonatona Fugo
“Oni du ni awiriki agu yo du ni adikumbo akidohe mbiko idapase na hipai.”—AEBERE 6:12.
1, 2. Waigu babi adungurati sa aabi gu ruru aboro du payo rogo Ziazia Kekeapai, na tipagine rengbe agu aboro re kadu ti ni ni bawene abakurearani?
“KO NAAFURA tipa agu aboro du payo rogo Ziazia Kekeapai si kidu wa abakureako du nangia yó.” Gure nga gupai Kristano sa apehe fuo gia ri gumbapai sosono babi adungurati amangihe. Na rengo du ri apehe, bambiko gu wirina re aima dia badungu agarã kuti wisigo Fugo Mbori na kini yuguhe, si ki sa gupai nga agu akumba na adee naadu na bakere idapase peyo payo rogo Ziazia Kekeapai, i da fuko wa agu abakureako ko aini yó tona kinaho nako avunguko ni.
2 Ya mo mo aidanga kuti gupai nga agu aboro du payo rogo Ziazia Kekeapai re ima rengba kadu ni wene abakurearani te? Ya mo mo nabiyo ni abakureamo? Mo berẽnga pa wai rengbehe ka ngba ka si du nga mo nata, kini fura, na kini inidi akumba na adee wa Noa, Abarayama, Ruta, Eriya, na Esetere. Mo berẽnga pa wai rengbe yó ka sa gamo raka si du ni wenehe, gu wene arugute na afugo wasa nga gu rengbe yó ka fuhe!—Oni gedi Asanza 13:20.
3. (a) Wai rengbe ani ka gbia undo mbiko wirika ani pai tipa agu akumba na adee nga ga idapase yó nga aguyo du payo rogo Ziazia Kekeapai? (b) Gini asanahe ani ka gbia akaragapai sani?
3 Nirengo, tifuo ‘ruru aboro zingi be kpio,’ ani arengba arengba ka zio bakure na agu aboro re. (Amo. 24:15) Ono zavura awere, ani rengbe arengba ka gbia undo mbiko wirika ani pai tipa agu akumba na adee nga ga idapase yó nga aguyo peyo payo rogo Ziazia Kekeapai. Wai rengbe ani ka gbia undo? Fugo gu mokedi nangia Pauro nakaragapai niya: “Oni du ni awiriki agu yo du ni adikumbo akidohe mbiko idapase na hipai.” (Eb. 6:12) Mbata fu ani tona wisigopai tipa agi akumba na adee re, ani gbianga akaragapai sa bete agu asanahe fugo Pauro aye na ni ku berãrani yo: Gine nga idapase, na tipagine si aida ti ni ani du na ni? Wai rengbe ani ka wirika gu ruru aboro du payo rogo Ziazia Kekeapai?
Guhe Nga Idapase na Gupai Si Aida Ti Ni Ani Du na Ni
4. Wai dungu aboro abi idapase, na tipagine du gayo bipai ti ni ni irairaha?
4 Idapase nga gu bawene he nga gu agu akumba na adee ani ka wirika payo rogo gi kitabu re aabihe na nyanyaki paha gbe. Dungu agu aboro du areme naumbasipa idapase aumbasi, kini bihe nga si nga kungbo ida kuti pai zanga ndikidi gopai duadu ho tipa ida kuti ni. Ono anga wo duhe te. Ndikidi idapase kia ti gure. Si angbanga boro idi kuti pai zanga gopai uho tipaha te; na anga gupai gbua si aidaha nga boro idi kuti gupai nga Mbori kina ti ni te, bambiko zavura ‘adaimona, i ima ida kuti Mbori na kini kio.’—Yak. 2:19.
5, 6. (a) Gaani idapase naru rii gini ngbatunga apai ue nga gu ani arengbanga ka bihe ya? (b) Si naida ba nyaka mburu gaani idapase du wai? Oni funga kpiapai tipa gipai re.
5 Ndikidi idapase ima susa agu apai re dũ. ROni tingidinga wai Ziazia Kekeapai asakapa guhe nga idapase. (Oni gedi AEbere 11:1.) Pauro aya wẽ idapase naru kurii ngbatunga apai ue nga gu ani arengbanga ka bihe ya. Bambataha nga, agu ahe duho nga gu “i abi nga ni bangirise ya.” Ani arengbanga ka bi agu ahe du ngbangbaturũ yo te, wa agu nga Yekova Mbori, Wiriko, watadu gu Kindo nazogarago awere ngbangbaturũ yo. Uehe nga, agu apai aboro ‘amaabangiriyo tipaha,’ nga agu apai ata manganga ya. Ani arengbanga ka bi gu vovo zegino ga Mbori Kindo nika ye na ni barambeda te. Ono ya mo gure nga gaani idapase kuti agu ahe ani abingo ho re ya na agu ahe ani amaabangirani tipaha, mburuhe ti ni te?
6 Wo te! Pauro ape gupai nga ndikidi idapase naru rii ndikidi gopai. Ho ko ayani wẽ idapase nga guhe “du aboro na maabangirise mbiko ho,” ko amangisunge na gu fugo rengbe yó arengba ka saha a nga “gu waraga nayugo padu boro ni irahe.” Mo berẽnga gupai nga boro idi ka fu kporo foro. Ní rengbe ka fu waraga gu kporo re foro ki ya, “Gamo vovo kporo gere.” Anga gupai ní agumbaha nga gu waraga re nga kporo te; ono rogo fugoni yo nga gu waraga re nga gu ndikidi he nayugo gupai nga gamo kporo du, si kidu wa gu waraga re nitihe nga gu kporo re. Wakina gure a, gu gopai duho tipa gaani idapase, si ima nyaka gbe, si kidu wa si nitihe nga idapase.
7. Ndikidi idapase nakoda gini apai?
7 Sidu, ndikidi idapase nakoda gu kido du na wene mburuhe ti ni na si nabipa Yekova Mbori. Idapase nasa rani ani naabiko ni gu Barani du na nyemuse na ani kido kuti gupai nga gako akidohe dunduko nika da ada ti rengo. Ono ndikidi idapase nakoda kura apai akoda berewe. Kina wai duhe tipa rakirakihe, si naida i rigi ndikidi idapase ariga tipa si nye ni ungaha. Si naida i yuguhe rogo mangaapai yo, ka si adunga wo ya, si kpiakpi.—Yak. 2:26.
8. Tipagine nyakipa idapase ti ni gbe?
8 Tipagine nyakipa idapase ti ni gbe? Pauro aima fu ndikidi karagapai furani. (Oni gedi AEbere 11:6.) Ani arengbanga ka mbeda na Yekova watadu ka sa ngbarago tiko ka ani zanga idapase te. Idapase nga gu nyanyakipa he si aidaha ka ani aida ka manga gu bawenepai kisusi rengbe boro ka mangaha rogo gani raka: nga ka mbeda na gu Barani du ngbangbaturũ yo na ka fu taarimo fuko.
9. Wai Yekova nayugu gupai nga ko ima inopa wai si aida ani du na idapase?
9 Yekova ima ino wai nyakipa idapase tipa rani, si du ko asa gupai ti ni nga i keke dungu akpiapai rogo Ziazia Kekeapai tipa ka undo rani ani sonosi idapase na kini yuguhe. Ko ima fu abaakumba furani i ningbembatayo rogo dungurati. Fugo Mbori naya: ‘Oni wiriki gayo idapase.’ (Eb. 13:7) Na ko ima fu kura aboro furani berewe. Pauro akepai tipa “adezire . . . ni ngenge yo,” nga agu akumba na adee naraki mbata kusayo ki mbu bawene akpiapai furani nga ga idapase. (Eb. 12:1) Gu kura badungu ruru aboro kinaho Pauro aapenga payo ku dagba aguyo ko ake payo rogo AEbere kapita 11 ya. Ziazia Kekeapai na gu ndikidi apangbanga rogoho namangi amanga nga gu nafura tipa akumba na adee, paranga aboro na sosono aboro, rogo angbatunga araka dunduko, nga aguyo naraki gu raka nga ga idapase na ki mbu dungu apai furani ani wirikihe rogo gi zegino adunga dungu aboro na idapase rogoho re ya.
Wai Rengbe Ani ka Wirika gu Idapase Nga ga Kura Aboro?
10. Wai rengbe gaani wisigopai nisase ka undo rani ani wiriki gu ruru akumba na adee du payo rogo Ziazia Kekeapai?
10 Mo arengbanga ka wirika kura boro zanga mo kparia ní mbata wenengai te. Wa mo nikaa geda gi buku re, mo nika bi gupai nga bakere sunge i amangihe tipa ka undoro mo kparia agi akumba na adee nga ga idapase yó re. Si angba angba ka mo asadi ka weteka kura apai a nisaro tipa agi akumba na adee re. Ti regbo gamo wisigopai nisaro, mo wisigi Ziazia Kekeapai wenengai ni manga mo sunge na agu aũwisigo Ziazia Kekeapai du bero. Wa mo nikaa berãkurii agu apai mo awirikaha, mo moingo kpia agu apai du paha rogo Ziazia Kekeapai ku berãro yo. Mo asadi ka bingo agu apai peke yó paha, ki gi woroahe, na ki gi fuõ ahe. Gu nyaki gbe berewe nga mo mangi ome ka ino wai agu aboro re adu. Ka mo mangihe wo, mo nika ino gu ruru akumba na adee re wenengai gbe, na aguyo ki da foro wakina kuru abakureamo.
11, 12. (a) Wai rengbe mo ka mbeda na Abarayama na Sara gbe? (b) Wai rengbe mo ka gbia undo mbiko wisigo gu kpiapai nga ga Ana, Eriya, na Samuere?
11 Ho mo ka inoyo ni nzunzu gbe, mo nika bihe nga si naida mo wiriki gayo kpiapai awirika. Ni kpiapai, mo berẽnga gupai nga i fu vovo sunge foro rogo ga Yekova riigbu. I sanaro mo kiisi gamo sunge tungusapai ngba kura gene. Singia i sanaro mo ndu ku rogo gu rago du na bakere zingo abatungusipai rogoho, watadu i sanaro mo asadi gu ngbatunga gene tungusapai mo ainidongo ho ya. Wa mo aberãkuriipa gu sunge re na kini kparikpee tipaha, ya mo mo arengbanga ka gbia undo ka mo berẽkurii gu kpiapai nga ga Abarayama te? Ko na Sara aima ida ka mbu gu bawene raka naadu Ura yo ka ga ku rogo kura rago, na Yekova aima fu maku fuyo gbe mbiko mangayo ho wo. Wa mo nikaa pekafuo gayo kpiapai, mo nika ye ka bi gupai nga mo naino yó susi gu naadu mbata.
12 Na ka si du nga gu boro oni araka na ní kporo sa mangi ro gbegberẽ ki sa ro mo du na gberarago, mo ki bihe nga gu ngba nga mo sungu kina kporo yo zanga ndu ku ba adunguratise yo? Ka mo berẽkurii gu kpiapai nga ga Ana na gu gene ri amangipai ngbaha ho Penina aamanga ri ni gbegberẽ, si undoro aundo mo mangi wene diaberã, na si sa ro mo nibi Ana ni bawene nakureamo. Wakina gure a, ka si du nga rago gberẽ tiro mbiko gupai nga mo nabihe nga sunge tiro te, mo rengbe arengba ka mbeda na Eriya gbe ka mo berẽkurii gu rungo ko adu rogoho na wai Yekova afu wasa fuko. Gu paranga aboro nagbia sosodahe be akurayo sukuru yo rengbe arengba ka mbeda koyo du Samuere ni fuo wisigo yó wai ko aru nyanyaki si ki vura du vurũ nga awiri Eri aamanga wasiro banye yo.
13. Ya mo wirika gu idapase nga ga gu boro du pani rogo Ziazia Kekeapai nasa gamo idapase si du kusende ti gani? Mo sakingo rogoyo.
13 Ya mo wirika gu idapase nga ga agu aboro du payo rogo Ziazia Kekeapai nasa gamo idapase si du kusende ti gayo? Wagusa te! Mo tingidi gupai nga, Fugo Yekova nangarasa rani ani wiriki agu aboro naadu na idapase. (1 Kor. 4:16; 11:1; 2 Tesa. 3:7, 9) Kurigure, kura aboro ani ka wirikapai tipa yó rogo gi buku re nga aguyo nawiriki gu ruru aboro naraki mbata fuyo. Ni kpiapai, ani nabi gupai rogo Kapita 17 nga ga gi buku re nga, gopai nayugoho nga Maria adi fugo Ana ki gumbaha, sidu, ri aabi ri ni wene kpiapai furi. Ya mo gure asa Maria gari idapase du kusende? Wagusa te! Ono gu namangi nga, ga Ana kpiapai aundo Maria ri nyakasi gari idapase tipa wa ka ri mangi wene rimo na Yekova Mbori.
14, 15. Gini bete apai du rogo gi buku re, na wai rengbe ani ka mangasunge na ni wenengai?
14 I ake gi buku re si undoro mo nyakasi gamo idapase. I keke asanahe tipa si undo rani ani saki agu apai du rogo gi buku re na ki bi wai rengbehe ka undo rani. Oni Wiriki Gayo Idapase nga gu buku i akehe tipa wisigopai nisase, wisigopai na aborokporo, na wisigopai nga ga dungurati. Dungu aborokporo rengbe arengba ka gbia ngbarago a mbiko sungo yó kini gedi agu apangbanga re na fugose kuari.
15 Gi buku re undongo ro aundo mo wiriki gu idapase nga ga gu ga Yekova ruru amoyambu naadu mbata kusayo. Na si undongo ro aundo mo mbedi gbe na gu Bamo du ngbangbaturũ yo, nga Yekova!
