Gere nga afugo agu aboro nambu be kaza berã. Ya mo pai amangingo ro wa gure watadu gu boro mo angerafuo ni?

Mo ini gupai nga mo nisaro te. Badungu aboro areme nagbiatiyo na gu kpakarapai nga ga kaza berãseyo, singia gayo ni tiyo watadu gu nga ga agu aboro i nakpinyemu yo gbe.

Zanga kapa, ani naraka ti “gbegberẽ rago” nga gu nasa badungu agu apai naye na fuda ku berãseyo. (2 Timoteo 3:1) Gu kura wetekapai sa ape gupai nga rogo zegino dunduko, aboro du bangeyo wa sa rii muambe nasovura na gu fudifudipai nga ga kaza berãse. Rogo 2020, gu ririkaza nga Korona asa gupai nga bakabangirise gbiati gu kere fudifudiapai nga ga berãseyo sono ki da ti 26 kuti 28 rii kama.

Si ni nyanyakipa pai ka ino bange agu aboro areme nambu be bakabangirise gbiati kaza nga ga berãseyo. Ono gu nyakipaha gbe nga ka ino wai rengbe gipai re ka manga ro watadu gu boro mo na kpinyemuni.

Ho du berãro yo ni wenengai, mo nadu wenengai na kini mangi apai a wenengai. Mo nadia be bakabangirise, kini mangi sunge nyanyaki, ki du na ngbarago rogo raka yo.

• NGA SANGBANA agu arungbura nga ga boro te.

• NGA gu kaza nagbarasapa gu gene boro aberã ngbaha, gani abipai na mangapai.

• Si ima rengba ka saha ni mbumbuhe tipa boro zi bakure na kura aboro na kaa mangapai agu apai nga ga raka na auru dũ.

• Si ima rengba manga ai boro, si abingo pa garã boro, sino mangapai, rangi kpoto boro, pambori, wirikapai, watadu gu bakio marã du be ni te.

Ti kura regbo apai ima rengba ka tona manga boro wa bakere rame watadu zanga rame, ri bakere riahe watadu rihe tooni ti wai si adu mbata, du na bakabangirise watadu gberãrago, ka agi apai re amanga si naida gu boro re gbia amunganga tipa i undo ni ni rugutini na agu apai naye na ni na gupai rengbe ni ka mangaha tipa ha. Ono wari rengbe mo ka ndu ku ho ni tipa undo?

Gu tatamanatatamana kumba naraki nangia Yesu aya: “Agu aboro nyaki anyaka i aida nga na munganga te, ono kina agu yo du na kaza.” (Matayo 9:12) Agu aboro nasota na agu akpakarapai nga ga kpotose nga aguyo gbia agene husa na ngua kaza ima rengba ka mangapai ni bakere he tipa ka zogosa bete gayo kaza na ki gbia undo tipa ka du wenengai. Si adu nipa tatamana fu agu aboro re ka i keesinga dia ngua kaza ya ka si du nga gu kaza re namaapai watadu si ima dia gbanga regbo. a

Wa vura duhe nga Baibiri na agu apai rogo ho nga ga husa te, agu apai du rogoho yo ima rengba ka undo rani na agu akpakarapai nga ga kaza berãse. Ani nangarasa ro mo gedi gi kekeapai re nga gu nasakapai tipa wai rengbe Baibiri ka undo rani ani mangipai kuti gu kpakaraapai nga ga kaza berãse.