Dungu arugute duho tipa gipai re. Ono tie, anga si dunduko du ni wenehe te. Ni kpiapai, mo rengbe ka bi gupai nga kura aboro naya foro ka mo kparingo ya watadu ka yugo gu gberãrago du mo na ni ya. Aguyo rengbe ka sosoda ro mo yugu gamo gberãrago naabaha. Ziazia Kekeapai nafura tipa gu bipai du ni ruruhe, nga gu gu vovo wisigoapai du awere naima dakuti ni.

Rogo gu kura aringara, aboro nabihe nga si aidanga akumba kpari te. Ono ya mo ndupai ho tipa boro du na zee tipa ka kpara ni aume zavura dagba aboro? Wene abawirikipai tipa kpotose ima ida kuti gupai nga si agberẽnga boro rungo kini kpari ni aume te. Na kpara ni aume ti gu kura aregbo ima rengba ka undo ro wa vura duhe nga mo na bakere rungo vurũ. Ono tie, bakere kpee ima rengba ka imisa ro. Ziazia Kekeapai aidanga kuti gupai nga si ni gbegberẽpai tipa ka kpara watadu si arẽnga fu akumba i kpari te te. Ni kpiapai, mo berẽnga tipa Yesu. Ti gu regbo bakureako akpi nangia Razaro, ko aima kpara, wa si  avura du vurũ nga ko adu na ome beko tipa ka zingisa aboro be kpio.​—Yoane 11:33-35.

Sino aboro du ngaha nga kadu na gberãrago ho gayo boro nakpi ni, gbe ho duhe ni nga gu kpio re ye ni tunguotunguo ho. Dungu nduapai kinaho rengbe ka sa gu boro nakpara nidu na zinga, wa gu nga ho aboro afura ni gbegberẽ tipa gu boro kpi re. Gu kura kumba du South Africa yo nga Mike aya: “Garã re adu gbua 14 ho buba akpi ni. Ti regbo kpee, pasita nga ga Anglican ko ape gupai nga Mbori naida na wene aboro na kini di yo. * Gipai re asa re mi zingi ni kerehe bambiko ani aima kpinyemu barani gbe. Awere fuo agarã 63 kusa, gupai re naimisa re kindi.”

Na ginipai rengbe ka manga ka si du nga ani nabihe nga gaani ingahe du? Gbe ka si du nga gu boro re kpi tunguotunguo kpio, gu boro narungo tipa kpio gani boro rengbe ka berãha nga, ‘Ka mi amangi gipai re watadu gure, ka gupai re amangingo te.’ Watadu gu yangara regbo oni agbiatironi na gu boro re angia gu regbo oni apoi ti ni. Gipai re ima rengba ka saro mo nibi tiro nga gamo ingahe du.

Ka si du nga mo nabi tiro nga gamo ingahe du na kidu na zinga, si ni nyanyakipa pai ka mo zingo gu bipai re ku kpotoro yo ya. Kuba gure, mo pehe fu bakureamo nga guni nika degatuni foro na ki kido ro nga gu ngbatunga bipai re namanga dungu agu aboro narungo tipa pakpio gayo aboro. Ziazia Kekeapai na tingida rani nga: “Badia ngbanya nakpi nyemu badiani na arago dunduko, ono i avungu wirina tipa unda ni rago gberãngbi.”​—Asanza 17:17.

Gu wene bakure rengbe gu boro narungo tipa kpio boro kadu na ni nga Bakusirani, Yekova Mbori. Mo peke agu apai du ngbaduroyo fuko rogo kparakpee yo bambiko ‘ko naberãpa ro’ aberã. (1 Petero 5:7) Kurigure, ko nakidohe nga agu aboro namangaha wo gayo aberãpai nika du na “gu zereda nga ga Mbori nagasi rugatinapai dunduko.” (AFiripoio 4:6, 7) Na berewe a, mo mbu Mbori ko husi ro vurube Fugoko nga Ziazia Kekeapai. Mo keke agu averesi nafu wasa. (Oni bi gu  sanduki du pati gi kekeapai re.) Mo ima rengba ka zio agu akuraha kuriyo. Du na ngbatunga apai wa gure kaa berãkuriihe ima rengba ka undo ro, gbe ho du mo ni yuru ka gene adunga tipa mo ra ya.​—Yesaya 57:15.

Barambeda kusayo, kumba du garãko nga 40 diako akpi be kansa ani ayamba rimoko nga Jack. Ko aya, gu kura aregbo kinaho ko nabi tiko nga ko nisako. Ono ko nagbia undo be kparakpee. Ko ape gupai nga, “Ho mi akpara nifu Yekova, mi abingo tire nga mi nisare te. Ho mi azinga ni yuru gene naadunga wa ka mi ra berewe te. Tingbafuo geda mi afugo wasa rogo Ziazia Kekeapai na ki berẽkuriihe na ki peke agu apai du kpotore yo fu Mbori rogo kparakpee yo, mi nabi gupai nga mi gbia wiri ongoda na zereda, na tingbafuo gure berãre ki zeredi na rame ki zi re berewe.”

Paranga dee du rimo ri nga Vanessa navunguri akpi be kaza. Ri ima ino gu ome du kparakpee na ni a. Ri ape gupai nga: “Ti agu aregbo mi nidu na kpakaraapai, mi nayamba rimo Mbori na ki tona ka kpara ni aume. Yekova naadegatuko adega kuti gimi kparakpee na ki fu gu ome fere mi aidaha.”

Agu aboro nafu arugute fu agu aboro narungo tipa kpio gayo aboro naya gu he rengbe ka undo yo nga ka undo kura aboro watadu ka manga agu asunge du tipa undo aboro rogo gayo dagbarago. Mangaha wo ima rengbe ka ye na ngbarago na ki akpurasi gu rungo du yo na ni. (Amokedi 20:35) Dungu agu aKristano narungo tipa gayo aboro bi gupai nga mangasunge ka undo kura aboro aima ye na bakere wasa fuyo.​—2 AKorindo 1:3, 4