I abatika re rogo gu gbata nga Santo Domingo rogo gu ringara nga Dominican Republic, mi nga kiaro dagba agu agude du biama. Avungure angia wene abawirikipai, na i aida ka sonosa awiriyo kina dagba agu aboro du niˈiriˈiripa yó. Agarã biama mbata fu i batika re, avungure agbiatiyo na agu amokedi nangia ga aMormon yo. Fuo rago ngba ti avungure na wai agu aparanga re avoditiyo na ki mbakaditiyo, avungure adiberã nga i nga gu bambata aboro nika ga kurogo gu pambori nga ga aMormon rogo gu dagbarago ani adu rogoho re.

Wa mi aasona, rago angba tire na agu apai naadu kanisa yo, mi adu a na ngbarago tipa agu pai aMormon ayugoho naabipa aborokporo gbiati ruru mangapai. Mi anaasumbuo tire tipa du mi niboro gu pambori nga ga aMormon ní na si angia gimi sásá kada nigayo mokedi.

Ho garã re adani nga 18, avungure aguari ki ga ku Amerika yo na gu berã nga i naida mi kiisi gimi wirikapai. Fuo garã sa, tame nina na kumbaari nangia aDezire Yekova aye ka bi rani rogo gu gbata ani adu rogoho nga Florida. I ayambu rani tipa gayo bakere dunguratise naadu tipa auru biata. Kina ngbare naazura ka bi gupai nga aboro dunduko pati re naadu na Ziazia Kekeapai na awaraga beyo i akeka pai rogoho. Sidu, mi kini mo ka sanahe tipa waraga na wiringua kepai tipa ka kepai a.

Gu tame nina re na kumbaari ape gupai fere nga, wadu he nga mi naida kada nimokedi, i ima rengba ka undo re mi wiriki Ziazia Kekeapai. Mi abihe nga wene berãpai du naadu bambiko mi aima geda dungu agu abuku nga ga aMormon kisusi Ziazia Kekeapai.

Ti agu aregbo ani anaasakapai naayo riipa Ziazia Kekeapai rogo terefuni, i anaangarasa re dedede nga mi niwisigi gu ida du mi rogoho na gupai Ziazia Kekeapai ayugoho. I aida mi ini gupai nitire Ziazia Kekeapai ayugoho.

 Badungu apai kinaho mi aidi kutini rogo gu pambori nangia ga Mormon, ono mi ainongo gupai nzunzu Ziazia Kekeapai apehe tipaha te. Tame nina akedi gu magazini nga Awake! nangia ga Ngbangba 8, 1995, nga gu aDezire Yekova akusihe naadu na bete apai rogoho tipa gu pambori nga ga aMormon. Kina ngbare naazura ka bi gupai nga mi aaruganga tire nzunzu na gu yugopai nangia ga aMormon wenengai te. Gipai re afõngbadureyo mi ndu ka weteka gu ga aMormon Bangiriba nga ga Internet tipa ka ino singia gu Awake! re aape rengo. Kina rengo naadu, na mi aye ka ino kura dungu apai gbe ho mi andu ni kurogo gayo bambu banda kuru ahe du rogo gu gbata nga Utah.

Mi adu na gu ida nga Ziazia Kekeapai gbiati gu Buku nga ga aMormon, si atagbaganga tihe te. Ono ho mi atona ka geda Ziazia Kekeapai ni dudunguro, mi aye ka rugatire na gu tagbagapai du dagba gu yugopai nga ga Mormon na gu nga ga Ziazia Kekeapai. Nikpiapai, rogo Yezekere 18:4, Ziazia Kekeapai nape gupai nga mbisimo nakpi akpi. Ono tie, rogo gu gayo buku nga Book of Mormon rogo Alma 42:9, si nape gupai nga: “Ka mbisimo kpingo te.”

Kurigure, mi adu na gberarago be gu gbegberẽ bipai aMormon ayugoho nga kaa bipa gayo ringara na nyanyakipaha. Nikpiapai, aMormon nayugo gupai nga ati Edene adu rogo gu gbata nga Jackson County, Missouri Amerika yo. Na gayo anebi nape gupai nga, ho “ga Mbori Kindo ka tona zogarago ni, gu bendeere nga ga Amerika nika yanga ngba wege ka boro adunga ho nika mangaha na pai ya.”

Mi atona kaa bakabangire na gupai nika manga tipa gimi ringara watadu gu kura aringara nibi gipai aMormon ayugoho re. Mi akusi gipai re fu kura paranga sa nayambu re ani fura naako rogo terefuni nga gu ko naawirikapai tipa kada niga aMormon mokedi. Mi asanako singia ko rengbe ka sovura kuti agu akurako nga aMormon du rogo gu kura ringara ka si du nga gako ringara nasovura kutiyo. Kina ngbare naazura ka gia gupai nga ii! Mi atona ka wisigopai dudunguro tipa gu yugopai nga ga gimi ida na mi ki ndu a fuo agu abarumbatayo nangia ga Mormon yó. I ape gupai fere nga gu karagapai du tipa gimi sanahe si nga gupai boro arengbanga ka rugatini nani ya, ono ho imarago ka da ni, i ainoho aino.

Fuo rago gberẽ tire na gayo karagapai, mi atona ka wisigo ndu gupai mi aida ti ni kada nigayo mokedi. Mi aye ka inoho nga nyemu mangasunge ni mokedi azi re kina wai a ka nyemu mangasunge undo aboro arengbe ka zio re. Gu bakere irisa ka mi agbiaha ti sunge amokedi nangia gu kurapai naasa re mi idi ka mangaha. Ono wiripai ho mi ainihe tipa Mbori kandara tooni te. Wa vura duhe nga mi aima geda Ziazia Kekeapai bara dunguhe kusayo, mi abingo ho na nyanyakipaha te. Mi aruganga tire na ga Mbori ringbisapai tipa kpotosende na aboro te.

Rogo gimi wisigopai na aDezire Yekova, agu apai mi nawirikihe nga rimo Mbori, gupai du tipa kpikpi aboro, na gupai Yesu nika mangaha rogo ga Mbori ringbisapai yo. Niyangaraha, mi atona ka rugatire na agu apai du rogo gi bawene buku re, na mi adu na ngbarago tipa kaa fura na gu kura aboro tipa agu apai mi aawirikaha. Mi aima inoho nga Mbori kina ti ni, ono awere mi rengbe kaa fura naako rogo kparakpee yo wa wene bakureami. Mi azi bapatiza rogo Banduru 12, 2004, na ki da nidezire Yekova, na fuo adiwi sita, mi atona ka mangasunge tungusapai ti aregbo dunduko.

Tipa agarã bisue awere, mi namangasunge rogo gu riibasunge nga ga zegino nga ga aDezire Yekova du Brooklyn, New York yo. Mi na bakere ngbarago tipa ka undo sunge rogo gu basunge nagbingbida Ziazia Kekeapai na agu awaraga du mburuhe rii Ziazia Kekeapai nga guhe nafu undo fu amirioni aboro rogo zegino dunduko, na mi nagbia ngbarago a kindi ti undo kura aboro i wirikipai tipa Mbori.