Amirioni aboro rogo zegino dunduko areme namaa gayo maabangirise riimburu ga Mbori Kindo. I napekafuo gu kpiapai Yesu amoihe ho ko ayugupai ni fu apefuoko i nikpari niya: “Ga ngbi yé, ani mángi rogo kpotosende wa mo akpi nyemu he.”—Matayo 6:10.

Si nairiwo tie nga, wa vura du dungu aboro na nyemu ga Mbori Kindo, si nawira wa dungu apambori agbenga berã aboro kutini te. Nibi gipai re, bake kuru apangbanga nga H. G. Wells akpariapa wai Yesu ‘amangi ome tipa ka fu tiko ka yugo gupai ko aayambaha nga gu Kindo nga ga Ngbangbaturũ,’ na wa vura duhe wo, Wells aya, ‘dungu agu akanisa naya si nga ga aKristano, si abingo gi yugopai re na nyanyakipa ha te.’

ADezire Yekova wa agu akanisa re te, i nanyakasapa ga Mbori Kindo ni bakerehe kisusi kura apai. Mo bingo gi gaani magazini mo agedaha awere re, i nasaha ku rogo afugo nga 220. Bange gu i akusaha rogo diwi sa nambeda kuti amirioni 46. Magazini ho rogo zegino i akparakaha wa gi magazini re te. Na gini nyanyakipai si afura tipaha? Mo kparia gu banguapai du bariihe. Si nga: Ngbaõbambu Sinziri Natakapande ga Yekova Kindo.  *

Tipagine aDezire Yekova amanga bakere ome ti ni wa gure tipa ka takapande ga Mbori Kindo? Ndupai ho sa nga, ani idi kuti gupai nga, pa ga Mbori Kindo nga gu nyanyaki pangbanga du rogo Ziazia Kekeapai adunga gu waha berewe ya. Kurigure, ani idi kuti gupai a nga kina ga Mbori Kindo sa rengbe ka ye na ziga kuti agu akpakarapai dunduko namanga aboro areme.

Ho aDezire Yekova agbeberã aboro ni kuti ga Mbori Kindo, i naasada ka manga ome ka raka ringbisihe na ga Yesu kpiapai. Ho ko adu ni auru kpotosende, pa ga Mbori Kindo nangia gu nyanyakipa pai fuko rogo gako raka na gako tungusapai yo. (Ruka 4:43) Tipagine pa gu Kindo re anyaki ti ni fu Yesu wa gure? Na gini undo rengbe mo ka gbiaha ti ni? Ani nazungodi ro nga mo gedinga gu kekeapai ageda ngbefuo gere tipa ka gbia akaragapai kuti agi asanahe re.