Ya mo wene bakureamo ho ti ni mo ainongo rimoni ya? Si nawira wa ni ti ni te. Gu kura dee du rimori nga Irina nga boro Bulgaria aya, “Ka mo ainongo rimo Mbori ya, si adunga foro taata mo mbedi na ko te.” Nirengo, a wa i nifura tipaha rogo gu kekeapai ye mbata fu gere, Mbori naida mo mbedi na ko. Sidu tie, ko ima yugo tiko foro rogo Ziazia Kekeapai niya: “Mi nga Yekova, gere nga rimore.”—Yesaya 42:8.

Ya mo si ni nyanyakipa pai fu Yekova tipa mo ini rimoko na kini mangisunge na ni? Mo bingo gipai re: Gu rimo Mbori i akehe rogo pa-Ebere yo nga bangiri kekeapai biama i ayambaha nga Tetragrammaton, si wa bara 7,000 rogo Kuru Ndika. Gi rimo re ima nge kisusi kura arimo dunduko rogo Ziazia Kekeapai yo. Nirengo, gere nga gu gopai nayugoho nga Yekova naida mo ini rimoko na kini mangisunge na ni. *

Ono tie, kura aboro rengbe ka berãha nga, wa du Mbori ni ziazia ko na kidu na tandu apai dũ, si nga pa zanga irisa ka yamba rimoko. Rengo ngaha nga, si rengbe kadu ni gbegberẽpai ka boro amangasunge na rimo Mbori ngba iraira gene, kina wai mo arengbanga ka sawia rimo wene bakureamo ya. Ono tie, Yekova naida na gupai nga agu aboro nakpinyemuko i irisi rimoko na kini yuguhe fu kura aboro. (Atambuahe 69:30, 31; 96:2, 8) Mo tingidi gupai nga Yesu aya fu apefuoko i kpari ki ya: “Barani du ngbangbaturũ yo, ani írisi rimoro airisa.” Ani rengbe arengba a ka ziasi rimo Mbori niyugo ani he fu kura aboro. Manga ani he wo nambedisa rani koyo du Mbori ni.—Matayo 6:9.

Ziazia Kekeapai nayugo gupai nga Mbori namaaberã ko fuo agu aboro ‘naberãpa rimoko’ watadu nabihe na kikiipaha. (Maraki 3:16) Ko nakido ngbatunga agi aboro re niya: “Si du mi abátasa ko ti ni; mi abánda ko, bambiko ko ini rimore. Ho ko nakpara ni fere, mi akáraga pai fu ko; mi adú na ko rago fudifudipai.” (Atambuahe 91:14, 15) Ino rimo Yekova na kini mangisunge na ni na nyanyakipa ha ka ani aida kadu na wene pagume na ko.