Ginipai du tie naamangi? Tipagine Mbori aasonga vura ti ni tipa aYudo ya, wa ko anaamangaha bakuru kusayo? Watadu tipagine ko aaidanga ha ti ni fuyo i sovura tipa ka kura tii arungosiro ya? Ya mo ga Mbori bipai tipa vura aima ariatihe? Wagusa te. Ono bakere ariapai aima ye ka manga nibipa aYudo. I aka Wiri Mbori nangia Yesu ya Masiya nangia ko te. (Amokedi 2:36) Sidu tie, i aima zanga gayo kparakpara pagume na Mbori wa i angia rikaaboro.—Matayo 23:37, 38.

Mbori aabandanga aYudo na gayo Ringara Mokido berewe te, na Mbori aasongodanga aYudo na agu avura i arengbe ka soho te. A wa Yesu afura tipaha ku mbatayo, agu amaku aYisaraere anaagbia ha mbiko Mbori aidi nayo, ko aima diaha beyo na ki fuhe fu kura vovo rikaaboro, nga aguyo i aayamba yo kusa rogo Ziazia Kekeapai nga “ga Mbori Yisaraere.” (AGaratio 6:16; Matayo 21:43) Gu dungurati nangia ga mbedimbedi aKristano ada ni ga Mbori aYisaraere nga ga toro yo. I aya fuyo rogo bambata sa kama agarã wẽ: ‘Awere oni nga gu rika aboro nga ga Mbori yo.’—1 Petero 2:9, 10.

Wa duhe nga agu aKristano naadu rogo bambata sa kama agarã ada ni “ga Mbori yo,” ya mo Mbori asovura kubayo tipa ka batasa yo be gu rungosiro nangia ga aRomo? Watadu ya mo ko aidihe fuyo i sovura kuti agu aboro naarungosiyo? Wagusa te, ko aamanganga ha wo te. Tipagine? Ho daha ni ti gu vura Mbori naidipaha, kinako nasia gu regbo si aida i so gu vura re ti ni, a wa gu kekeapai susi kusayo re ayugoho. Mbori aasonga vura tipa agu aKristano naadu rogo bambata sa kama agarã te, na ko aaidanga ha fuyo i sovura a te. Si tie ziazia nga, bambata sa kama agarã angianga ga Mbori regbo tipa ko sovura kuti gbegberẽ apai na rungosiro te.

Sidu tie, wakina gu ga Mbori amoyambu naadu bakuru kusayo, si aidi agu aKristano naadu rogo bambata sa kama agarã re pidi ga Mbori regbo tipa ko ye ka nyasariipa gbegberẽ apai na rungosiro. Ti gu regbo i aapido re, Mbori aaidanga ha fuyo i sovura nitiyo kuti avurayo te. Yesu Kristo aima yugo gipai re ziazia. Ni kpiapai, ko aaruganga apefuoko i sovura te, ono kuba gure ko aya fuyo: “Oni kpí nyemu avuraroni, ki kpari tipa aguyo narungosi roni.” (Matayo 5:44) Ho Yesu afura ni kumbatayo tipa gu regbo si adunga ga aRomo abanzengere nika sovura kuti Yerusarema, ko arugu gako abawiriki nga, ka i nyenga ka sovura ya ono i oro na i aima mangaha wo.—Ruka 21:20, 21.

Kuri gure, ga Mbori toro adu kugii gu mokedi nangia Pauro ko ke gupai nga: “Ka oni mangi nga boro ti pai fu roni ya, . . . bambiko si ni keke he ya, “Pa ira bape nga gimi, mi akaraga pai, Gbia nipoi wo.” (ARomo 12:19) Pauro adi gupai i aima kehe kama agarã  kusayo rogo Pa Amotumo 19:18 na Pa Fu Rugute ni Ue he 32:35. A wa bi ani he rogo gu kekeapai susi kusayo re, gene sa Mbori anaairobape tipa gako aboro ngbaha angia ko anaaundo yo tipa i sovura kuti avurayo. Rogo gi gene re, afugo Pauro nayugoho nga ga Mbori bipai tipa vura aˈarianga tihe te. Rogo bambata sa kama agarã, Mbori aabi vura kindi ni wene gene tipa ka irobape gako aboro ngbaha na ka nyasariipa angbatunga arungosiro na gbegberẽ apai dũ. Ono tie, a wa si adu bakuru kusayo, kina Mbori naana diaberã tipa gu regbo i anaaso ngbatunga agu avura re ti ni na gu boro si anaaida ni soho.

Si tie ziazia nga, Mbori aaidanga ha fu agu aKristano naadu rogo bambata sa kama agarã i sovura te. Ono na ginipai tigaha du tipa areme? Ya mo badona ho nga ga aboro areme Mbori naidihe fuyo i nisovura? Watadu ya mo gi regbo re du nga ga Mbori regbo tipa ko sovura kuba gako amoyambu? Wai du Mbori abi vura areme? Gu yangara kekeapai naye fuo gere nika karagapai kuti agi asanahe re.