GU he i naase wiri ngua kepai na ni du be Jordan yo re nangera wa gu he anyakanga pa ha ya. Ono tie, si nga gu he nyakipaha fuko kisusi agu ahe dunduko du beko. Jordan aya: “Bakurea tita re nga Russell naafuhe fere ho mi adu ni kindi ni gude.” Tifuo kpio Russell, Jordan aye ka ino gupai nga, Russell aima undo titako gbiati avunguko ni bawenehe. Jordan aya: “Awere, mi ima ye ka rugatire na pa Russell wenengai, gi wiri tooni gamahe du bere re, paha ima nyaka fere susi wai si adu mbata.”

A wa gu kpiapai nga ga Jordan ayugoho, pa gu he i na gamu he fu boro arengbanga kadu bangiri kura aboro na nyanyakipaha te. Ono fu gu boro gamu yo ho funi, si na nyanyakipaha kisusi. Ziazia Kekeapai nasakapai tipa gu gamahe nyakipaha kisusi rogo agi afugo aboro naaima inopai tipaha re ki ya: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.”—Yoane 3:16.

Gu gamahe rengbe kafu nyenye unga fu gu boro gbiaha! Ya mo gamahe ho rengbe paha ka nyaka susi he? Baraho kura aboro ainongo pa nyaka gu gamahe re ni ya, ndikidi aKristano nabihe wa “kikiipa he.” (Atambuahe 49:8; 1 Petero 1:18, 19) Tipagine du tie Mbori afu gu unga ti ni nga ga wiriko ni gamahe fu zegino?

Gu mokedi nangia Pauro agumba ndu gupai re rogo agi afugo re: “Gbegberẽpai akuru ku zegino mbiko boro sa, kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.” (ARomo 5:12) Gu bambata boro nangia Adamu, ata ino aino kini ingipai ni basa ko sangba Mbori, rogo gi gene re, ko agbia sangbanaha nga kpio. Mbiko Adamu, kpio aye kurii awiriko dunduko—nga agu aboro naraka zegino dunduko.

 “Mosoro ingapai nga kpio; ono ga Mbori gamunihe gbua nga nyenye unga rogo Kristo Yesu yo gaani Gbia.” (ARomo 6:23) Tipa ka batasa aboro be gu sapangbanga nga ga kpio, Mbori akedi wiriko nga Yesu Kristo ku zegino tipa ko fu gako rengberengbe unga tipa aboro dunduko. Rii mburu gu motumo i ayambaha nga, “motumo tumorii,” agu aboro dunduko du na idapase kuti Yesu nika gbia nyenye unga.—ARomo 3:24.

Nibipa agu amaku Mbori nafuhe fu airisiko vurube Yesu Kristo, Pauro aya: “Tambuahe dú fu Mbori tipa gako gasigasi gamahe.” (2 AKorindo 9:15) Nirengo, motumo tumorii nga iiriwo gamahe du paha ni gasigasihe. Ono dagba ga Mbori agamahe dunduko, tipagine du motumo tumorii ti ni na nyanyakipaha fu wiri aboro? Ngba gini gene du he kia ti kura agamahe nga ga Mbori? * Na wai gu rengbe ani ka mangapai sa ni? Ani nahõpai bero mo gedi agu akaragapai nga ga Ziazia Kekeapai du kuti agu asanahe re rogo agu kekeapai du ngbefuo gere.