Rogo Bamburu 2022, i atingidipa kere faarago rogo zegino dunduko:

•   “Abamangisunge Chaina yo ima fu zahe fu aboro bara ue rogo gi diwi re nga, kindigi agbata mbembedi kuti 70 nika du na kere faarago susi gu nidu mbata.”—Bamburu 25, 2022, CNN Wire Service.

•   “Bambiko gu kere faarago nga gu susi gu nidu mbata namanga Putu yo, kere gbitiko abureangua namanga rogo dungu aringara Putu yo.”—Bamburu 17, 2022, The Guardian.

•    “Rago Poso, badungu agbata vuru Amerika aima du na kere faarago susi gu nidu mbata wa kere faarago agbataka ku Uroyo na ku rogo gu papara rago du ku Sudiyo na ku Dioyo.”—Bamburu 24, 2022, The New York Times.

 Ginipai gipai re ayugoho? Ya mo kpotosende nika da ni yangaraha ni gu ba aboro nikaa rengbanga ka raka rogoho berewe ya? Ginipai Baibiri ayugoho?

 Ii. Gu kere faarago susi gu nidu mbata namanga rogo zegino dũ nadigiso agu apai adigiso Baibiri aima gumbaha mbu regbo kumbatayo tipa gu regbo ani araka ti ni. Ni kpiapai, Yesu agumba sangbanebi nga ani ka bi “baiiriwo apai ni kere he.” (Ruka 21:11) Bambiko wai rago afaa nikerehe kina kumbatayo susi gu nidu mbata, badungu aboro nagunde nga gu mangaapai nga ga aboro nika sa kpotosende si da ni gu ba aboro arengbanga ka raka rogoho berewe ya.

 Oó. Mbori akusi kpotosende ni gu ba si aida aboro raki rogoho nyeanye kindi. (Atambuahe 115:16; Batungusipai 1:4) Kuba gupai nga ko mbu gene fu awiri aboro i gbarasihe, ko nika ‘gbarasa agu aboro nagbarasa kpotosende,’ kina wai ko nakidohe.—Yugoti 11:18.

 Mo wisigingo sangbaanebi ue gbua nga gu nayugo gupai Mbori nakido pa mangaha tipa kpotosende:

•   “Ngbakungba na gu rago ugu auga adú na ngbarago, ngbi ngume angi ki mbumba na mbumbuda ahe; si ambúmba kpaima.” (Yesaya 35:1) Mbori ambunga kpotosende si da ni ugu ngbi ngume nga gu aboro arengbanga ka raka rogoho ya te, ono ko nika mbakada agu aba dunduko kubaha paha na gberẽ.

•   “Mo nangera ku kpotosende no ki nikedi mai ku auru he, mo ninakumukosi he gbe.” (Atambuahe 65:9) Mbori nika sa kpotosende ni paradizo.

 Tipa ka wirika kura dungu apai tipa wai rago asakatihe adigiso gu sangbanebi nga ga Baibiri, mo gedi gu kekeapai nga “Climate Change and Our Future—What the Bible Says.”

 Tipa ka wirika kura apai tipa ga Baibiri akidohe tipa karaga kpotosende berewe kubaha, mo bi gu kekeapai nga “Who Will Save the Earth?”