Aboro du bange yo wa abirioni bisue si angera wa i nika bi gu kandi aringara nika dunguratihe rogo zegino dunduko ka ngi ru tona rogo Ngbangba 20 kuti Banduru 18, 2022. Dungu aboro nabihe nga ngbatunga agi ambaro re ima rengba ka mangapai ni bakerehe kisusi gu gbua nga ka koda agu aboro nabihe.

•   “Ambaro na ome ti ni ka aria zegino. Si rengbe na ngarasa aboro. Si na ome ka koda aboro ngba kparakpara gene.”—Nelson Mandela, kuru bazogo nga ga South Africa.

•   “Gu kandi nga ga ndue ru. . . nakoda aboro mbiko u nasayo i du na maabangirise, ngbarago, nyemuse, kini bi tiyo nga i ima kpinyemu kura aboro, na pai kinaho nakoda yo dunduko kina sa.”—Gianni Infantino, bangerekurii gu riigbu nga FIFA. a

 Ya mo gu kandi aringara adunguratihe rogo zegino dũ ka ngi ru watadu gu kura ngbatunga ambaro rengbe ka da ti gu nyanyakipa asásá re? Ya mo maabangirise ho tipa zereda na kodatise?

 Gu kandi aringara nadunguratihe rogo gi garã re ka ngi ru ima sa aboro i berẽpa kura apai kisusi gu gbua nga pa kandi. Gi mbaro re ima sa aboro i sakipai tipa agu apai nabipa ga aboro raka gbiati birĩ-zogarago nga gu nakoda pa gu rengo nga ga aboro, kparakaro, na gu kpakarapai nabipa mosoro.

 Wa vura duhe wo, dungu aboro nagbia ngbarago ti bi agu ambaro nga ga dungu aringara wa gu aringara nadungatihe ka ngihe re. Ono tie, wa vura du aboro na gi nyemupai re, agi ambaro re arengbanga ka ye na nyenye kodatise te. Kuba gure, si nayugo pa gu sino na mangaapai nga ga kparakaro nga gu Baibiri afura tipaha nga si nika yugo pa gu regbo i ayambaha nga “yangara arame.”—2 Timoteo 3:1-5.

 Baibiri na ndikidi maabangirise rogo tipa kodatise nga ga zegino. Si na fu gu kido nga aboro nika duadu ni kodikodi yo auru kpotosende tiibe gu zogarago nga ga ngbangbaturũ i ayambaha nga “ga Mbori ngbi.”—Ruka 4:43; Matayo 6:10.

 Bakindo gu Kindo re, nga Yesu Kristo, nika ye na zereda kurugo zegino dunduko. Baibiri naya:

•   “Rurupai zuga ti ragoko, zereda ki du kpaima.”—Atambuahe 72:7.

•   “Ko nabatasa irazingo ahe ho ni nakpara ni ku ari . . . Ko natumo ungayo be bau pai na zuu.”—Atambuahe 72:12, 14.

 Zavura areme, ga Yesu yugopai ima koda amirioni aboro rogo aringara nga 239. I ima wirika wai ka mbu soga gu kura aboro. Tipa ka ino gu kura apai, mo gedi gu kekepai du riihe nga “Wai Ka Diabe Sogote.”