Dungu agu aboro nasana gi sanahe re ima mbu be kere arungo nga gu sayo i zanga gayo ahe dunduko watadu gayo aboro, na i naida karagapai nga gu nika fu wasa fuyo. Aboro nabi gu kere Imotise namanga ni gu kere gbegberẽ mangapai nga ga wiri aboro, na si kini sayo i ni sota asota ka ida kuti Mbori.

 Iraira berãpai: Gbegberẽpai du ngaha ka sanahe tipa ndu gupai Mbori nambu kere Imotise ti ni si niimangi.

 Rengo: Agu aboro nadu na bakere idapase aima sanahe tipa ndu gupai Mbori nambu gbegberẽ apai ti ni si niimangi. Ni kpiapai gu nebi nangia Abakuka asana Mbori ki ya: “Tipagine mo nambu gene ti ni fu gbegberẽ apai, tiandiko, zuu, na kere gbegberẽ mangapai rogo arago dũ?” (Abakuka 1:3, Contemporary English Version) Kuba gupai nga Mbori zingi kuti Abakuka, ko asa gupai nga i ke gu sanahe ko asanaha re ku rogo Baibiri tipa aboro dunduko nigedihe.

 Iraira berãpai: Mbori aberãnga pa agu arungo namanga aboro te.

 Rengo: Mbori ima soga gbigbita mangapai na agu arungo si aye na ni. (Asanza 6:16-19) Ti agu aregbo nangia ga Noa, rago aima gberã ti Mbori mbiko gu “berã du kpotoyo yo, si adu ni kina gbigbita ha kindi” gipai re adu wo mbiko gu zuu namoipai auru kpotosende. (Bambata Pai 6:5, 6) Zanga kapa, Mbori na kina bakere imisiri a ho ko abi gu kere Imotise ni namanga.—Maraki 3:6.

 Iraira berãpai: Gu Imotise namangi ti regbo aYudo aye mbiko Mbori naafu mbusa fuyo.

 Rengo: Nirengo Mbori aima mbu gene fu aARomo i gbarasi Yerusarema ti bambata sa kama agarã. (Matayo 23:37–24:2) Natona ti gu regbo re tie, Mbori asianga kura bangisa ngbatunga aboro tipa ka ngbe na yo watadu ka fu mbusa fuyo te. Bangiri Mbori, “kparakparapai ho dagba aYudo na Agendiria te.”—ARomo 10:12, Good News Translation.

 Iraira berãpai: Ka si dunga gu Mbori nga boro nyemuse na du na ome kisusi kina ti ni, ka ko aima digiso gu kere Imotise namanga re.

 Rengo: Wa vura duhe nga Mbori naye na arungo te, ti gu kura aregbo, ko nambu gene ambu fu he tipa bete regbo si mangi.—Yakoba 1:13; 5:11.

 Mbori nambu gene fu gu kere Imotise namanga mbiko kina gu bangisa ndupai ko nambu gene ti ni fu agu arungo dunduko aboro agbiatiyo na ni: Ka mangapai kuti gu kitangbangase nga ga sino mangaapai i akitingbanga ko na ni bakuru kusayo. Baibiri ima pe gupai kpadio nga, ti gi regbo re Bakitingbanga du na zoga zegino angianga Mbori ya. (Ruka 4:1, 2, 6; Yoane 12:31) Taata bangua arengo ue rogo Baibiri ima rengba ka undo ka sakapai tipa ndu gupai Mbori nambu gene ti ni fu gu kere Imotise namanga.

1.   Mbori akusi aboro na ranirii beyo. Mbori agumba gupai fu gu bambata aboro nangia aAdamu na Eva ko aida i mangihe, ono ko aaziongo yo ngbaome i gisangbako te. I asia ka diaberã nitiyo tipa gupai du ni wenehe na gu du ni gbegberẽ he, gayo gbegberẽ siapai gbiati gu ngbatunga siapai i amangihe re nga gu aboro adigi nimangihe ima ye na kere gbegberẽ sangbanaha kurii aboro. (Bambata Pai 2:17; 3:6; ARomo 5:12) Si sa wakina gupai gu buku nga Statement of Principles of Conservative Judaism apehe nga: “Dungu agu arungosiro ani agbiatirani areme na ni rogo zegino naye ni sangbana wai ani amangasunge ngba iraira gene na gu ranirii i afuhe furani.” Kuba gupai nga Mbori di gu ranirii re berani, ko ima mbu regbo fu aboro i asadi ka manga gayo apai nitiyo zanga si du nga ko du nasayo i mangipai.

2.   Mbori ima rengba ka dia gu kere Imotise namanga na ko ni ka diaha adia. Mbori ima kidohe ka gasa agu amirioni aboro naima kpiko i raki berewe, kodihe na aguyo nakpi mbiko gu kere Imotise namanga. Ko nika dia gu kere imisiri adia a kusayo agu aboro nabata ti regbo kere Imotise agbiatiyo na ni mbiko pa berãyo kurii agu apai namangi. (Yesaya 65:17; Amokedi 24:15) Gu nyemuse du Mbori na ni koyo du aboro ni nafu gu kido nga ko nika digiso gako akidohe adigiso.—Yoane 3:16.

 Dungu agu aboro pai agbiayo ti regbo kere Imotise na i ki bati, gayo raka nadu ni wenehe sa ho i arugatiyo ni na ndu gupai Mbori nambu gene ti ni fu gbegberẽ apai si niimangi, na pa wai ko nakidohe ka nyasariipa agu asangbanapai dunduko si naye na ni.